Tɔn-Fɔɛ-Fila-Nyɔgɛ 25 - ALLALA KUMƐ

¹ “Ni Isirɛla mɔgɔ fila sɔsɔra, anu si ta kiti-tɛgɛlɛnu bara. Ni kiti-tɛgɛlɛnu ya kumɛ wo mafɛlɛn, mɔgɔ kelan yo, mɔgɔ kelan yiliki,

² min yo sa kumɛ rɔ wo la, ni anu bi a gbesila le, kiti-tɛgɛlɛ si a fɔ ko a ni a sa dugi ma ka a laburun a ma. Anu si a gbesi iko a ya koe tinya nya min

³ kɔnɔ anu ti tenbi bosɛ da-nya bi-nanɛ la. Ni anu tenbira bosɛ da-nya bi-nanɛ wo la, wo si ma miliya-koe la a bolo.

⁴ “Wo kana wola sara-ninki dɛ makiri a tenbi wola fui-fannu tɛnna.”

Kɛɛ-Nyaganɛnu Bara-Koe

⁵ “Ni na-kelen-nyɔgɔma filɛ ye bɔn la, kelan ni faga, a ma den-kei to, kɛɛ-musi wo ti to kebila-gbɛrɛka-mɔgɛ ye. A si to ala kei na-kelen-nyɔgɔ-bɛrɛ wo ye.

⁶ Ni a taranta, anu ya den-kei-sarɛ sɔrɔn, anu si wo tɔgɛ sa mɔgɔ-faganɛ wo la, alako a tɔgɛ kana tunu male Isirɛla mɔgɛnu tɛma.

⁷ Kɔnɔ ni kei wo ya a ban kɛɛ-musi wo la, a ma sɔn den-sɔrɔn-koe ma musi wo ma, musi wo si a yasere-masa so-burɔ-mɔgɔ-banu ye ka a fɔ ko, ‘N tora kei min ye kɛ la, a sa sɔnna a na-kelen-nyɔgɛ dunu-bi-koe ma. A sɔgɛ ye a la, a na-kelen-nyɔgɛ tɔgɛ ni tunu male Isirɛla mɔgɛnu tɛma yen!’

⁸ So-burɔ-mɔgɔ-ba wonu si kei wo kele ka a makawandi. Hali wo, ni a ma sɔn musi wo la,

⁹ musi wo si ta mɔgɔ-banu yakɔrɔ nyɔ ka sanbarɛ kin kelan bɔ ale kei wo kian rɔ ka a nɔgɔ-yi kɛ kei wo yakɔrɛ ma. A si a fɔ a ma ko, ‘Mɔgɛ si kɛ le ma mɔgɔ-su kɛnu na minnu ti sɔn anu na-kelen-nyɔgɛnu tɔgɔ-sa-koe ma.’ Kei wo tɔgɛ si ta pon!

¹⁰ Wo si ma kebilɛ wo tɔgɔ-tinya-koe la male Isirɛla mɔgɛnu tɛma bawo sanbarɛ sa anu kebila-nyɔgɛ wo kin kelan rɔ. Anu si kebilɛ wo kele, ‘Sanbara Kin Kelen Tiginu.’ ”

Tɔn-Gbɛrɛnu

¹¹ “Ni kei fila kɛlɛta, mɔgɔ kelenta musi ni na a dɛnbɛ tinɛ, a ni kei doi wola kurusu-yalɛ bira alako ala kei si wo gbesi nya min,

¹² wo kana kinikini musi wo ma. Wole Isirɛla mɔgɛnu si musi wo bole tɛgɛ a la.

^13-14 “Wo tenbi fenfen sumanna, wo kana mɔgɔ kensunya.

¹⁵ Wola fen-suman-fannu ta ni kɛnya woletɔ wo si sumanni kɛ a kilɛ fɛ. Wo si a ma, wota Mari Alla ye nala wola nyamanɛ min dila wo ma, wo ni simayɛ sɔrɔn nyɔ rɔ.

¹⁶ Kensuntenu ma di wota Mari Alla ye.”

Amalɛkinu Faga-Koe Fɔ-Koe

¹⁷ “Amalɛkinu ya min ma wo la wo tumɛ wo ye nala ka bɔ Iyipiti nyamanɛ rɔ, wo ni wo miri wo ma.

¹⁸ Anu ma kilan Alla la mumɛ! Wo bandannɛ, anu bɔra wo kɛlɛla wo kɔma kilɛ la. Anu ya kɔma-tolɛnu faga.

¹⁹ Wota Mari Alla wa ban wo yogenu kɛlɛla ka wo sigi lanyiri-nyamanɛ rɔ yisi-kimɛ rɔ tumɛ min, wo kana nyina Amalɛkinu kɛlɛ-koe la. Wo ni ta anu kɛlɛ ka anu nato dogbe!”