Tɔn-Fɔɛ-Fila-Nyɔgɛ 23 - ALLALA KUMƐ

Minnu Ma Bɛn Mari Madiya Tinɛ

¹ “Ni mɔgɔ-wo-mɔgɔ mara tɛgan la wo, ni a keiya-tina sa nyɔ wo, a ma bɛn, wonu ni taran wole Isirɛla mɔgɛnu fɛ Mari madiya tinɛ.

² “Ni kei anubɛ musi ya dan min sɔrɔn yɛlɛnyɛ rɔ, ka a bi dan wo ma ha ka a sigi a bɔnsɔn tan ma, a ma bɛn, wonu ni taran wole Isirɛla mɔgɛnu fɛ Mari madiya tinɛ.

³ “Amonnu wo, Mohabu mɔgɛnu wo, ka a bi anu denu ma ha ka a sigi anu bɔnsɔn tan ma, a ma bɛn wonu ni taran wole Isirɛla mɔgɛnu fɛ Mari madiya tinɛ

⁴ bawo wo ye tagamana ka bɔ Iyipiti nyamanɛ rɔ, anu ma sɔn dɔntɛ anubɛ yi dila wo ma. Min sanɛ wo kuma, anu ya Beyorila dan Nɛbi Belam kele ka bɔ Petori soe burɔ Babilɔn nyamanɛ rɔ pon! Anu ya a sara wole Isirɛla mɔgɛnu danka-koe la.

⁵ Hali wo, wota Mari Alla ma sɔn Nɛbi Belamta dankɛ ma. A ya ata dankɛ wo yɛlɛma duwɛ la bawo a ya wole Isirɛla mɔgɛnu keni.

⁶ Fananta wole Isirɛla mɔgɛnu bi wo kɛndɛ la, wo kana ko lakiri wobɛ mɔgɛ kɛnu tɛma.

⁷ “Idɔm mɔgɛnu sɔgɛ la kana bɔ wo la bawo wobɛ wonu kɛmɔgɔni-kelan-sɔrɛ le wonu na. Iyipiti mɔgɛnu fanan sɔgɛ la kana bɔ wo la bawo wo ara mɛ anu barɛ sundanyɛ la nun.

⁸ Kɔnɔ ni kɛ do siginɛ wo tɛma kaka, wonu tolo-birɛnu si kofu wole Isirɛla mɔgɛnu ma Mari madiya tinɛ.”

Dagɛ Sɛninya-Koe

⁹ “Wo tenbi wo yogenu kɛlɛla tumɛ min, ni wo ya wo daga makɛ kan min, wo kana wo tugu fenfen na min sɛninyani ma iko tɔn ya a fɔ nya min.

¹⁰ Ni kei do kira dagɛ rɔ nyɔ, a ara ala kurusi ratinya a keiya-yi la, wo tigi ara kɔsɔ iko tɔn ya a fɔ nya min. Fɔ a ni ta dagɛ kɔma kilɛ la ka telen sigini nyɔ.

¹¹ Wurɛ la, a si a ku. Tele-kolo-wulan ma, a ni ta dagɛ rɔ a gbɛ rɔ.

¹² “Wo si kan tinɛ do ladan wola dagɛ kɔma wo si ta kilɛ fɛ kan min.

¹³ Wo si ta denka-sin-fannu na wo bolo, woletɔ wo wa ta kilɛ fɛ tumɛ min, wo si denkɛ sin ka wo gbɛ yamatogon.

¹⁴ Wo ni wola dagɛ sɛninya iko tɔn ya a fɔ nya min tuma-wo-tuma bawo wota Mari Alla ye wo fɛ dagɛ rɔ ka wo tanka wo yogenu ma ka anu nɔ. A ma di wota Mari ye ka wo daga makɛ tinɛ wo kɔsɔnɛ yen min si a ma, a ni a kan-kɔ sɔ wo la.”

Tɔn-Su-Siyamɛ Donu

¹⁵ “Ni yɔɔn ya a buri ka na i wara ko i ni a kisi, i kana a lasɛgi a tigi ma.

¹⁶ Soe min ba diya yɔɔn wo ye, wo ni fɛrɛ di a ma, a ni sigi nyɔ. I kana a bira boloko-yogomɛ-kɛ.

¹⁷ “Isirɛla mɔgɔ fenfen kana a nyɛrɛ ma yɛlan la bɛsi-kɔ-tinɛnu tɔ.

¹⁸ Ni min ya wodi sɔrɔn yɛlɛnyɛ wo rɔ, a kana na wodi wo la wota Mari Alla Bato-Bɔn la ka wo ma a dakan-kanbali-fan la. Wo ko-sunu gbo Mari ye.

¹⁹ “Ni mɔgɛ ya a na-kelen-nyɔgɛ Isirɛla mɔgɛ do dɔndɔ fenfen na iko wodi, ni wo ma, dɔn-fan, a kana a tɔnɛ sa a kuma.

²⁰ Kɔnɔ ni wole Isirɛla mɔgɛ min ya sibolo-gbɛrɛkɛ-mɔgɛ do dɔndɔ, ni a diyara wo ye, wo si tɔnɛ sa le a kuma. Ni wo ya tɔn kɛnu bira lanyiri-nyamanɛ rɔ, wota Mari Alla si ata duwɛ layigi wo kuma koe bɛɛ rɔ.

²¹ “Ni mɔgɛ ya a dakan don Mari ye, a kana a kun kimaya dakan wo kanbali-koe rɔ. Ni mɔgɛ ya dakan kiri kɔnɔ a ma a kanbali, Mari si a bira wo yili la. Wo si ma hakɛ la a bolo.

²² Ni mɔgɔ ma Alla yili-madiya fenfenna ko la, tana ma wo la

²³ kɔnɔ ni a ya a yili-madiya a yisi-gbɛnɛ la, a fɛrɛ-wo-fɛrɛ sa fɔ a ni wo kanbali.

²⁴ “Mɔgɛ tenbi tenbila mɔgɛ dola ki-fan la, a si min ban yɛ, a ni wo dɔn nyɔ rɔ kɔnɔ a kana ta fen na a bolo.

²⁵ Ni a ye tenbila mɔgɛ dola sɛnɛ la, a si min ban yɛ, a ni wo bi kɔnɔ a kana wɔrɔtɛ bi a tɛgɛ tinɛ.”