Tɔn-Fɔɛ-Fila-Nyɔgɛ 22 - ALLALA KUMƐ

¹ “Ni Isirɛla mɔgɛ do ya a ta-nyɔgɛ dola kolo-fan yen tala a kun fɛ, a ni a bira ka na a don a ta-nyɔgɛ wo bolo.

² Ni a tigi fɛ-yan a la wo, ni a ma a tigi lɔn wo, a si a bi ka ta a la a nyɛrɛ warɛ bɔn la. Ni a tigi nara a nyini tinɛ, a ni a don a bolo.

³ Hali a mara sofɛlɛ la, a si a ma wo nya na le. “Ni mɔgɛ nyinara ala duruki ko wo, a ni nyina fenfen ko wo, ni mɔgɛ do ya wo yen, a si a don a tigi bolo.

⁴ “Ni i na-kelen-nyɔgɛ Isirɛla mɔgɛ dola sofɛlɛ buira kilɛ la, ni wo ma, ala sara-ninki, i kana i kan-kɔ sɔ a la ka ta i ye, fɔ ka ala kolo-fan wo dɛnbɛ alako a la ni sɔ.

⁵ “Kei kana musila kurɛ don a kan na, musi kana keila kurɛ don a kan na. Minnu bi kɛ ko sufa mala, wo ma di wota Mari Alla ye muk!

⁶ “Ni min ya kona-nyagan yen kɔlɔma rɔ, ni wo ma, dugi ma, a ni a taran, kona wo burunnɛ a kɛwɔlɛnu kuma, ni wo ma, ala dannu, a kana koni-kɛwɔlimɛ anubɛ koni-denbɛ wo bira wo nyɔgɔn fɛ. Denba-bolokanɛ wo ni ta.

⁷ Ni a ya ala dannu bira wo, ni a ya a kɛwɔlɛnu bi wo, tana ma wo la kɔnɔ fɔ a ni koni-denbɛ wo boloka. Ni min ya wo ma, wo tigi si simayɛ sɔrɔn yisi-kimɛ rɔ.

⁸ “Ni min ya ala bon-kurɛ sɔ min kumɛ ralɛɛnɛ, fɔ wo tigi ni sansan don ala bɔn kun tɛmɛ wo ma alako mɔgɔ kana bɔ porokɔlɔla nyɔ ka bui dugi ma ka faga. Ni do buira min bolo, wo ara ni-koe bi. Wo dunɛ si sigi ale kuma.

⁹ “Wo kana ki-fen subolo filɛ ki kan-tina kelen. Ni min ya wo ma, anu filɛ bɛɛ si ma sɛninyabɛlɛ la iko tɔn ya a fɔ nya min, ado a si foo a bɛɛ la.

¹⁰ “Wo kana sofɛlɛ anubɛ ninki kiri sara kelen na wɔli-kɛ-tinɛ.

¹¹ “Wo kana kurɛ don wo kan na min dannɛ saga-siyi anubɛ yesekara-hakikɛ la min tɔgɛ linɛn.

¹² “Wo ni wola kurɛ ladan ka a bunsan sɔ a tonko nanɛ la.”

Sɔn-Yogoma-Kɛlɛnu Bara-Koe

¹³ “Ni kei do ya sunkurɔn do furu, anu ni sunkurɔn wo latenbi a kɔma kɔnɔ tɔ-a-la, a sɔgɛ ni a bira ka a ban a la,

¹⁴ ni a ya tɔgɛ do layɛlɛ sunkurɔn wo ma ko a ya a furu wati min, a kɔɛn ma ke a ma,

¹⁵ dunmusi wo sɔrɔnnɛnu si kɔnyɔ-fanɛ wo bi ka ta a yira mɔgɔ-banu na kiti-tɛgɛ-tongbe la.

¹⁶ A si a fɔ mɔgɔ-banu ye ko, ‘Nba, nde le ya nna dunmusi di kei kɛ ma. Kɔnɔ kaka gbɛ, a ara a ban a la.

¹⁷ A ara tɔgɛ sa nna dan la ko a kɔɛn ma ke a ma. Wo ma fani-gbɛ yen anu kira min kuma?’

¹⁸ Soe mɔgɔ-banu si keminɛ wo bira ka a tii kɔrr!

¹⁹ Anu si kei wo bɔni wodi-gbɛ-gbu kɛmɛ la ka a di dunmusi wo fa ma bawo keminɛ wo ara Isirɛla musi wo layarabi. Min sanɛ wo kuma, ala musi le wo la a siyi-tele-bɛɛ rɔ. A ti a yili bɔ mumɛ!”

²⁰ “Kɔnɔ ni keminɛ wo ya min fɔ, tonyɛ le wo la, sunkurɔn wo kɔɛn ma ke a ma, ni dunmusi wo fa ma ke a yirala mɔgɔ-banu na ko a kɔɛn kera le,

²¹ anu si ta dunmusi wo la a fala bonda-dɛ la. Kei minnu bi soe wo burɔ, wonu si a mabon kuri la nyɔ, ha a ni faga. Sunkurɔn ya miliya-koe le ladan male Isirɛla mɔgɛnu tɛma bawo a ara kei-koe tɛgɛ a fa warɛ bɔn la, ado anu ma a latenbi wɛ ala kei ma fɔlɔn. Ni wole Isirɛla mɔgɛnu ya wo ma, wo si ko-yogomɛ kɛ sufa ban de wo tɛma.

²² “Ni kei do ya a sa furu-musi do fɛ, anu ni anu bira ka anu filɛ faga, kei wo, musi wo. Ni wole Isirɛla mɔgɛnu ya wo ma, wo si ko-yogomɛ kɛ sufa ban de wo tɛma.

²³ “Ni mɔgɛ do ya kei do bira soe do rɔ, a ye a sala sunkurɔn do fɛ min mabiranɛ a ta-nyɔgɛ do bolo kɔnɔ sunkurɔn wo ma yerelen tɛgɛ,

²⁴ wo si anu mɔgɔ filɛ bi ka ta anu na soe kɔma ka anu mabon kuri la ha anu ni faga. Min bi a tola sunkurɔn wo ye fagala bawo a ma yerelen tɛgɛ, ado a ye soe kɔntɔ, anu si a kuman-kan lamɔɛn kan min. Min bi a tola kei wo fanan bi fagala bawo a ara a sa mɔgɔna musu-mabiranɛ fɛ. Ni wole Isirɛla mɔgɛnu ya wo ma, wo si ko-yogomɛ kɛ sufa ban wo tɛma.

²⁵ “Ni sunkurɔn do ye nyɔ min mabiranɛ kei do bolo, ni kei do buira a ma binyɛ rɔ, mɔgɔ ti ke a di-kɛ-kan lamɔɛnna kan min, wo si kei wo le dɔrɔn faga.

²⁶ Wo ti sunkurɔn wo faga de, bawo ale ma ko-yogomɛ ma wo si a faga min na. Kɛ ko-su mani de iko mɔgɔ wa bui mɔgɔ ma ka a faga

²⁷ bawo kei tara kɛ sunkurɔn wo ma binyɛ rɔ taragba! Hali sunkurɔn wo gbele-gbelenta, mɔgɔ sa nyɔ min si a dɛnbɛ.

²⁸ “Kɔnɔ ni mɔgɛ buira sunkurɔn do ma min kɔnyɔtoe, ado a mabirani ma,

²⁹ kei min buira a ma wo la, wo si wodi-gbɛ gbu bi-loli bɔ ka dunmusi wo furu wo la a fa ma. A ti a ban dunmusi wo la muk, bawo a buira a ma le.

³⁰ “Kei-wo-kei kana a sa a fala musi fɛ bawo wo si ma a fala miliya-koe la.”