Tɔn-Fɔɛ-Fila-Nyɔgɛ 18 - ALLALA KUMƐ

Saraka-Masɔlɛnu si Anu Beli-Fannu Sɔrɔn Nya Min

¹ “Saraka-masɔlɛnu si bɔ Lifayi bɔnsɔn rɔ. Wonu ti nyamanɛ wo dugi sɔrɔn anu nyɛrɛ ma. Hali wo, anu si beli-fan sɔrɔn Isirɛla mɔgɛnuta kɔ-fan anubɛ anuna sarakɛnu tɔ anu bi min dila Mari ma.

² Anu ti anu halala-dugi sɔrɔn iko bɔnsɔn-toenu si anutɛ sɔrɔn nya min. Anu denu baralɛ, anu ya gbiliyɛ sɔrɔn ka ma saraka-masɔlɛnu na Mari ye iko a ya lanyiri kiri anu ye nya min.

³ “Ni mɔgɛ ye turɛ mala sarakɛ la, ni wo ma, sagɛ, a si a kɛɛ wo, a gbaga-gbagɛ wo, anubɛ a burɔ-fannu ma saraka-masɔlɛnuta niyi la.

⁴ Wo si wola dɔn-fan kun-fɔlɛnu di saraka-masɔlɛnu ma Mari tɔgɛ rɔ. Wo si wola saga-siyinu matɛgɛ san wo la ka wonu fanan do di saraka-masɔlɛnu ma Mari tɔgɛ rɔ.

⁵ Mari Alla ya Lifayi bɔnsɔn-mɔgɛnu yabɔ Isirɛla bɔnsɔn doinu tɛma ka anu denu ma aleta wɔli-kɛlɛnu na.

^6-7 “Ni saraka-masɔlɛ do bɔra wola soe donu tɔ ka ta saraka-masɔ-wɔlɛ kɛ Mari ye, kan-tina-yabɔni-kelan wo rɔ nyɔ, a si wɔlɛ wo kɛ le iko saraka-masɔlɛ doi minnu siginɛ nyɔ.

⁸ Hali a ya a bolo-fan bɛɛsi mayira ka nɔnfuli sɔrɔn a bɔra kan min kɔnɔ saraka-masɔlɛnu bi fan min bɛɛsi sɔrɔnna Marita kan-tina-yabɔnɛ wo rɔ, anu damasi bɛnta worɔ.

Latelen Makawandilɛnu

⁹ “Mari Alla ye nala wota nyamanɛ min dila wo ma, wo wa ta nyɔ rɔ tumɛ min, wo kana mɔgɛ wonu kɛ-nya-yogomɛnu bi minnu siginɛ nyɔ de!

¹⁰ Wo kana wola dannu ma sarakɛ la ka anu nakɛ tɛ rɔ. Wo ka sɔn Isirɛla mɔgɛnu ni suwagayɛ anubɛ bolo-tafɛlan kɛ. Anu kana bɛsɛ nyini ka anu nyɛrɛ ma mɔgɔ-kun-nyininɛnu na anubɛ durinu.

¹¹ Anu kana anu nyɛrɛ ma yi-kɔrɔ-fɛlɛnnɛnu anubɛ kulubɔlɛnu na fanan.

¹² Ko-su min ma daga wole Isirɛla mɔgɛnu tɛma, ni min ya wo ko-sufa ma, wota Mari Alla si diminya mɔgɔ-su wonu ma. Woletɔ Mari ya anu gben wo yarɔ nun.

¹³ Wo ni to latelan rɔ Mari ye.”

Nɛbinuna Na-Koe Lanyiri

¹⁴ Musa ya a fɔ anu ye ko, “Wo ye nala tala sigila kan min, mɔgɛ minnu bi nyɔ kaka, wonu bi anu tayala ka yarɔma-koe fɔ duriya-wɔlɛ rɔ. Woleta Mari Alla ti sɔn wole ni wo ma.

¹⁵ Yanni wo ni kɛ ma, wota Mari Alla si to ata nɛbinu nanala ka bɔ wo tɛma minnu si ma iko nde, Musa. Wo ni wonu kuman-kan bira.

¹⁶ “Wo tumɛ ma ye Sinayi kɔnkɛ dafɛ, wo ya Alla madiya nyɔ ko wo kana a kuman-kan lamɔɛn nyɔ rɔ, anubɛ ka ale Alla yen ta-mɛlan rɔ nyɔ bawo wo ya a lɔn ko wo ye fagala le.

¹⁷ Alla ya a fɔ nde ye wo wati rɔ ko mɔgɛ kɛnu bara hɛnkilimaya-kumɛ fɔ.

¹⁸ A ya a fɔ ko a si nɛbinu nabɔ wole Isirɛla mɔgɛnu tɛma ka anu nana wo ma minnu manɛ iko nde, Musa. Mari ko nɛbi wonu bi kumɛ minnu fɔla wo ye, ale le ye wonu fɔla wonu ye.

¹⁹ Wonu si kuma Alla tɔgɛ rɔ. Minnu ba wonu kuman-kan masɔsɔ, Mari Alla ko a si wonu tɔrɔ.

²⁰ Ni foninya-nɛbi min kumara Mari Alla tɔgɛ rɔ, a ma min sɔ wo wara, wo tigi si faga. Ni nɛbi min ya bɛsɛ dola koe fɔ wo ye, wo tigi fanan si faga.

²¹ “Wo si to kɔndɔfili rɔ wo rɔ, ni nɛbi do ya kumɛ do fɔ min ma bɔ-a-la. Wo si a lɔn kama worɔ ko kumɛ wo bɔra Alla le bolo?

²² Ni nɛbi kɛ ye kumala Alla tɔgɛ le tɔ kɔnɔ a kuman-kan sa bɔla-a-la, wo si a lɔn worɔ ko kumɛ wo ma bɔ Alla bolo. Nɛbi wo ya a sakorɔ-kumɛ le fɔ. Wo kana kilan mɔgɔ-sufa wonu na.”