Tɔn-Fɔɛ-Fila-Nyɔgɛ 17 - ALLALA KUMƐ

¹ Fɛɛ ye kolo-fan minnu na, wo kana wonu ma sarakɛ la wota Mari Alla ye. Mari gboyana-koe le wonu na. Wonu ma di a ye muk!

^2-3 “Mari ye nala lanyiri-nyamanɛ min dila wo ma, wo wa ban wo sigi-bole rabɛnna nyɔ, bɛsɛ wo, tele wo, lole wo, karɛ wo, ni mɔgɛ do ya wo fenfen kɔ wo tɛma nyɔ, wo tigi ara hakɛ kɛ Mari la ka ata tɔn anubɛ lanyiri tinya min bi ale anubɛ wole tɛma.

⁴ Ni wo ya a lamɔɛn ko mɔgɛ do ye kɛ sufa kun na, fɔ wo ni a fɛsɛfɛsɛ a kila-bɛrɛbɛrɛ fɛ. Ni wo ya a yen ko tonyɛ le, a ara ko-yogoma-sufa kɛ lana wo tɛma,

⁵ wo si mɔgɛ wo bi ka bɔ a la soe kɔma ka a mabon kuri la. A ni faga don!

⁶ Kɔnɔ wo kana mɔgɔ-wo-mɔgɔ faga mɔgɔ kelenta sereya-bɔɛ ma fɔ a da wa fa fila ma, ni wo ma, ka tenbi wo la.

⁷ Sereya-bɔlɛ wonu fɔlɔn si a mabon kuri la. Wo kɔma, mɔgɛ bɛɛsi ni to a mabonna kuri la. Wo le si ko-yogoma-sufa kɛ labɔ wo tɛma.

⁸ “Ni a taranta, kiti tɛgɛ gbɛlɛyara wola kiti-tɛgɛlɛ do bolo, a ti ke min natɛgɛla a nyɛrɛ ma, a si kumɛ wo lata Marita kan-tina-yabɔnɛ wo rɔ. A ni a taran, bolo-fen-ko-kɛlɛ le, ni wo ma, a ni ma gbalo-ko-kiti la, ni wo ma, a ni ma mɔgɛ-faga-ko-kumɛ la, ni a ti ke kuma-su kɛnu banna,

⁹ a si ta kumɛ wo la saraka-masɔlɛnu bara Marita kan-tina-yabɔnɛ wo rɔ anubɛ kiti-tɛgɛla-kun-tigi-wɛ min bi soe wo kun na.

¹⁰ Kun-tigi wonu ya kiti sa nya-wo-nya gbɛ, wo si a bira iko anu ya a fɔ wo ye nya min.

¹¹ Wo ni a ma wo fɛrɛma, ni kun-tigi wonu ya sereya min sa wo kɔrɔ, wo ni wo bira. Wo ni kilɛ tagama ka a bɛn wo ma.

^12-13 Ni min ya a tui ka kun-tigi kɛnu kuman-kan masɔsɔ, wo si wo tigi faga. Woletɔ mɔgɔ-gbɛrɛkɛ minnu bi wo sufa rayenna, wonu si kilan ka wo nyɔgɔn ko sufa ma. Ni wo ya mɔgɔ-sufa wo faga, wo si karagbɛlɛyɛ wo sufa ban de Isirɛla mɔgɛnu tɛma.

Nyamani-Tigi si Ma Nya Min Wo Tɛma

¹⁴ “Mari Alla ye nala nyamanɛ min dila wo ma, wo wa ta wo sigi-bole rabɛn nyɔ rɔ, ni a sɔgɛ ya wo bira ka wota mansɛ sigi wo kuma iko wo dafɛ mɔgɛnuta mansɛnu siginɛ anu kuma nya min,

¹⁵ ni Mari ya min yabɔ wo ye, wo si wo sigi. Mansɛ wo si ma Isirɛla mɔgɔ-bɛrɛbɛrɛ la, a kana ma sibolo-gbɛrɛkɛ-mɔgɛ la de!

¹⁶ Wo ye mansɛ min yabɔla ka a sigi wo kuma, a fɔlɔtɛ, a kana a raya ka soeenu nadɛn siyaman ata kɛlɛ-dannu ye. A kana mɔgɛnu nata so san tinɛ Iyipiti bawo Mari ya a fɔ ko Isirɛla mɔgɛnu kana sɛgi nyɔ tun mumɛ!

¹⁷ A fila nyɔgɛ, mansɛ wo kana musu-siyaman furu bawo musi wonu si a ma, a ni Allata kilɛ boloka. A sawa nyɔgɛ, a kana a raya ka sɛnɛ anubɛ wodi-gbɛ ladɛn a nyɛrɛ ye ka a nyɛrɛ ma nɔnfulu-tigi la mɔgɛnu kuma.

¹⁸ A wa ma mansɛ la tumɛ min, Allata tɔn-buku min bi saraka-masɔlɛnu bolo, anu si wo do ladan ale mansɛ ye ka tɔn sɛbɛ a ma ka wo don ale mansɛ bolo.

¹⁹ Wo si to ale mansɛ bolo. A ni to a karanna a siyi-tele mumɛ bɛɛ kɔrɔ. Wo si a ma, a ni ata Mari Alla gbiliya ka ata tɔnnu bira a bolo filɛ la gben!

²⁰ Fananta a ye tɔn wonu karanna, a si a lɔn worɔ ko anubɛ Isirɛla mɔgɛ toenu, kelen de anu na. A ma tenbi anu na nya-wo-nya. Min sanɛ wo kuma, a ti Marita tɔnnu fanan tinya mumɛ! Wo si a ma, a ni mɛ mansayɛ la. Hali ala dannubɛ a mamanɛnu anubɛ a kegeyɛnu si a gbɛ bi Isirɛla mɔgɛnu kuma.