Tɔn-Fɔɛ-Fila-Nyɔgɛ 14 - ALLALA KUMƐ

Allata Mɔgɛnu Kana min ma Saya-Koe Kuma

¹ “Bawo Mari Allata mɔgɛ le wole la, wo kana wo kunyɛnu sii ka wo fɛrɛnu mafarafara saya-koe kuma iko sibole doinu bi a mala nya min saya-di-kɛ tinɛ.

² Mari Allatɛ le wole la. A ya wole yabɔ ka wo ma ata mɔgɛnu na duninya-mɔgɛnu tɛma.

Isirɛla Mɔgɛnu Tanɛnu Bi min Na

³ “Wo kana fenfen dɔn Mari ara a fɔ min ma ko a sɛninyani ma.

⁴ Mari ko wo ni minnu dɔn, wo le kɛnu na, ninki wo, sagɛ wo, baa wo,

⁵ mina wo, yinkiyankɛ wo, sensɛ wo, anubɛ firala-baa.

⁶ Sogo-wo-sogo min tore faranɛ fila la, ado anu bi anu dɔntɛ nunkula, wonu denu denu si dɔn wo bolo.

⁷ Kɔnɔ wo kana nyomɛ dɔn anubɛ kɔnkɔbarɛ anubɛ fasan. Kɛnu ma sɛninya wo ye bawo kɛnu bi dɔn-fan nunkula kɔnɔ anu tore farani ma fila la.

⁸ Wo kana kɔsɛ anubɛ kungbilan dɔn bawo hali anu tore faranɛ, anu ti dɔntɛ nunku anu da rɔ. Wo kana soge kɛnu dɔn, hali ka i bole tugu anu suyi la.

⁹ Yɛgɛ-wo-yɛgɛ min wɔrɛ anubɛ a wɔnɛnu bi a ma, wo ni wonu dɔn.

¹⁰ Fenfen-sufa ye yi rɔ min wɔrɛ anubɛ a wɔnɛnu sa a ma, wo kana wonu dɔn. Wonu sɛninyani ma wo ye.

¹¹ “Kona minnu sɛninyanɛ Mari bolo, wo si wonu dɔn de!

^12-18 Kɔnɔ kona le kɛnu na wo kana minnu dɔn, kokɛ wo, gbingbinnyagan wo, tanbakɔrɔmanɛ wo, bibi wo, dogɛ wo, selekona wo, yi-fɛ-kona wo, yɛgɛ-faga-kanko wo, yi-fɛ-sisi wo, tinti-sɔgɛ wo, anubɛ tosɛnu.

¹⁹ “Kɔinkian minnu tɔnkɔnyɔ si gban anu nyɔgɔn fɛ, wonu sɛninyani ma. Wo kana wonu dɔn.

²⁰ Kɔnɔ kɔinkian minnu sɛninyanɛ Mari bolo, wo si ke le ka wonu dɔn.

²¹ “Ni soge min fagara a bolo ma, wo kana wonu dɔn. Wonu sɛninyani ma. Kɔnɔ sibole minnu bi wo tɛma, ni wonu ya sogo-sufa kɛnu dɔn, tana ma wo la. Ni a diyara wo ye, wo si a mayira sibolo-gbɛrɛnu ma. Kɔnɔ wole Isirɛla mɔgɛnu kana fen-sufa kɛnu dɔn bawo Marita mɔgɛ le wole la. “Wo kana saga-dan anubɛ baa-dan te a na kin-yi la.

Yaka Di-Nya Mari Ma

²² “San-bo-san, wo wa ban wola ki-fannu tɛgɛla tumɛ min, wo si anu yaka bɔ ka anu nadɛn anu dan na.

²³ Mari ya kan-tina-kelan min yabɔ wo ye wo si a bato kan min, wo tenbi tala nyɔ rɔ, wo ni ta wola fui-fannu na anubɛ wola nako-fannu anubɛ wola kolo-fannu den fɔlɔtɛnu na ka ta wonu ma yaka la nyɔ. Wo tenbi nyɔ rɔ gbɛ, wobɛ Lifayi bɔnsɔn-mɔgɛnu si wola yaka wo dɔn Marita kan-tina-yabɔnɛ wo rɔ. Wo si to kɛ le mala ka Alla gbiliya tuma-wo-tuma.

²⁴ Ni Allata duwɛ tora wo kuma, wo ni yaka-siyaman sɔrɔn kɔnɔ a ni a taran, wo ye tala a dila Mari ma kan min, wo fɛ-yan wo la,

²⁵ wo si anu mayira. Mari ya kan-tina-kelan min yabɔ wo ye, wo si ta wodi wo la nyɔ rɔ.

²⁶ Wo si wo diyana-dɔn-fan bɛɛ san wodi wo la. Wo si ninkinu san, ni wo ma, sagɛ. Wo si nɔnbɔ-gbɔ-yi san, ni wo ma, baan-yi. Wobɛ wola denbayɛnu si wonu dɔn nyɔ rɔ wota Mari Alla bato tinɛ nyɔ ka wo nyɛrɛ ladiya kɔikɔi!

²⁷ “Wo tenbi wonu mala, wo kana nyina Lifayi mɔgɛnu ko de bawo anu halala-fen sa anu bolo.

²⁸ San sawa sawɛ wa ban, wo ni to wola yakanu nadɛnna wola soenu tɔ.

²⁹ Yaka wonu, Lifayi mɔgɛnutɛ le wonu na bawo dugi sa anu bolo anu si wɔli kan min. Sundannu wo, kelennɛnu wo, anubɛ kɛɛ-musi minnu bi wola soenu tɔ, wo ni wonu fanan nahina yaka kɛ rɔ kamasɔrɔn anu dɛnbɛna-gbɛrɛkɛ sa. Ni wo ya wo ma, wota Mari Alla si ata duwɛ layigi wo kuma koe bɛɛ rɔ.”