Tɔn-Fɔɛ-Fila-Nyɔgɛ 13 - ALLALA KUMƐ

¹ “Tumado wɔlɔyi do ya wo taran, ni wo ma, kiyo-kɔrɔ-takarannɛ. Hali a ya a fɔ ko kabana-koenu si kɛ,

² alako wo ni bɛsɛ donu kɔ, wo ma duru minnu kɔla nun, wo mɔgɔ-su ye wo kɔndɔfili-koe le tɔ. Hali a si ke le ka kabana-koenu nadan iko a ya a fɔ nya min,

³ wo kana wo tole masɔ a la. Ko-sufa wonu si ma wo kɔrɔbɔ-koe le la wota Mari Alla bolo ka a lɔn ni wo ya ale Alla keni wo yisi bɛɛ la.

⁴ Wo si bila wota Mari Alla fɛ ka a gbiliya bɛrɛkɛ ka ata kumɛnu anubɛ ata tɔnnu bira. Wo ni ale bato ka ma lanaya-mɔgɛnu na ale ye.

⁵ Ni wɔlɔyi anubɛ kiyo-kɔrɔ-takarannɛ do ya wo labila kɛwuyɛ do la alako wo ni murutiya Alla ma, wo si wo tigi faga. Wota Mari le ya wo kunka ka wo labɔ Iyipiti nyamanɛ rɔ. Maritɛ le wole la gbɛ! Mɔgɔ-sufa wo yogo. A sɔgɛ ye mɔgɔ-sufa wo la ka wo labɔ Allata kilɛ fɛ. Wo si a faga alako ka ko-yogoma-sufa wonu nabɔ wo tɛma.

⁶ “Ni a sɔgɛ ya mɔgɛ do bira ka mɔgɛ do sagan kɛwuyɛ la bɛsi-kɔ-koe rɔ, hali wobɛ wo benbanu ma minnu kɔ tele-kelen-bɛrɛni, wo kana kinikini wo mɔgɔ-su ma. Hali a mara i na-kelen-nyɔgɛ le la wo, i halala-dan la wo, i diyana-musi la wo, i diyana-mɔgɔ-bɛrɛ la wo, wo kana mɔgɛ wo madɛnbɛ.

⁷ Tumado wo mɔgɔ-su si a ma, i ni wo dafɛ-mɔgɛnuna bɛsɛnu kɔ, ni wo ma, wula-yanna-mɔgɛnuna bɛsɛnu,

⁸ i kana sɔn ka i tole masɔ mɔgɔ-su wola kɛwuya-kumɛ la ka bila a fɛ. I kana kinikini a ma ka a latanka.

⁹ Wo wa wuli ale mɔgɛ mabonna tumɛ min ka a faga, ile fɔlɔn ni kuri lakɛ a ma.

¹⁰ Wo ni a mabon kuri la bawo ale le ye kɛwuyɛ ladan-koe rɔ ka wo bɔ wo Mari Allata kilɛ fɛ min ya wole labɔ yɔɔnyɛ rɔ Iyipiti.

¹¹ Ni wo sɔnta mɔgɔ-sufa wo mabonna, Isirɛla mɔgɛ toenu ba wo lamɔɛn tumɛ min, anu si kilan kɛwuya-su wo ladanna anu ta-nyɔgɛnu na wo rɔ.

Soenu Halaki-Koe Bɛsi-Kɔ-Koe Rɔ

¹² “Wo wa sigi lanyiri-nyamanɛ rɔ tumɛ min, ni wo ya a lamɔɛn ko

¹³ wo na-kelen-nyɔgɔ-kuntan do ara mɔgɛnu kɔndɔfili soe do rɔ ka anu nabɔ Allata kilɛ fɛ,

¹⁴ wo si ta ka wo ko-su mafɛlɛn a kila-bɛrɛbɛrɛ fɛ. Ni wo ya a yen ko tonyɛ le, anu bi bɛsɛnu kɔla wole ma duru minnu kɔla,

¹⁵ wo si soe mɔgɛ damasi faga anubɛ anuna kolo-fannu.

¹⁶ Wo si mɔgɛ wonu bolo-fannu nadɛn soe tɛma kan-tina-kelen. Wo si soe anubɛ fan wo damasi mintan. Wo mani de Mari yala iko saraka-mintantɛ. Wo kana soe wo sɔ tun. A si ma tonbɔn la.

¹⁷ Wo kana mɔgɛ wonu bolo-fan ma wo halalɛ la, fɔ ka a dama mintan tɛrr! Wo si a ma, Mari fonde ni kimɛ. A ni kinikini Isirɛla mɔgɛ toenu ma. A si a ma, wo ni siyaya iko a ya lanyiri kiri wo benbanu ye nya min.

¹⁸ Alako tun, wo ni ata tɔnnu bira iko n ya a fɔ wo ye nya min kɛ la ka a sako kɛ.”