Tɔn-Fɔɛ-Fila-Nyɔgɛ 12 - ALLALA KUMƐ

Mari ya Kan-Tina-Kelan min Yabɔ Saraka-Bɔ-Koe Rɔ

¹ Musa ya a fɔ anu ye tun ko, “Fananta wo siginɛ lanyiri-nyamanɛ wo rɔ, wo ni tɔn kɛnu bira. Wo ni wo tole masɔ Marita kumɛ la a kilɛ fɛ.

² Wo wa ta nyamanɛ wo rɔ, wo ni nyɔ-mɔgɛnuna bɛsi-kɔ-tinɛnu tinya feufeu! Ni anu bi kɔnkɛ denu kuma, wo ni ta anu tinya. Ni anu bi gbɔngbɔn denu kɔrɔ, wo ni ta anu tinya fanan.

³ Anu si sarakɛnu mintan anuna bɛsɛnu bi kan min, wo ni wonu wayan ka anu tanyɛnsɛn. Anu bi kuru-lɛsɛnɛ minnu kɔla, wo si anu tatii. Anuna kɔlɔma minnu nadannɛ iko musila muninyɛ, anu bi min kelela Asura, wo ni bɛsɛ wonu tɛgɛ ka anu mintan. Wo le si a ma, mɔgɛnu ti ta bɛsɛ wonu kɔ kan-tinɛ wonu tɔ tun.

⁴ “Wo kana wota Mari Alla bato iko mɔgɛ kɛnu bi anuna bɛsɛnu kɔla nya min.

⁵ Wo bɔnsɔn mumɛ lakofunɛ, Mari Alla si kan-tina-kelen yabɔ bɔnsɔn tan-ni-filɛ wo ye wola nyamanɛ wo rɔ wo si ta a bato kan min.

⁶ Nyɔ si ma wola saraka-bɔ-tinɛ la, a mara saraka-mintantɛ la wo, a mara yaka la wo, a mara dato-saraka la wo, a mara hɛniki-sarakɛ la wo, a mara kolo-fen-den fɔlɔtɛ la wo,

⁷ wo si a dama bɔ nyɔ wota Mari Alla ye. Bɛɛ si ta ala denbayɛ la nyɔ rɔ ka fen-dɔn-kɛ ka sewa wo fannuna ko la wo ara minnu sɔrɔn wo Mari bolo.

⁸ “Wo wa ke nyɔ tumɛ min, wo ti Mari bato nyɔ iko wo ye a mala nya min kaka. Wo ye Alla batola iko a di wo ye nya min nun

⁹ bawo wo ma ta wɛ lanyiri-nyamanɛ rɔ wo si sigi yisi-kimɛ rɔ kan min.

¹⁰ Wo wa Yorodan bɛ kɛ tɛgɛ wati min, wota Mari Alla si a ma, wo si lanyiri-nyamanɛ wo bi wo si sigi kan min. A si wo tanka wo yogenu ma. Wo si sigi lafɛrɛ rɔ.

¹¹ Wo wati rɔ, wota Mari Alla si kan-tina-kelen pe yabɔ wo si a bato kan min. Wo si na fan wonu di a ma nyɔ le iko n bara a fɔ wo ye nya min, saraka-mintanta wo, yaka wo, dato-saraka wo, anubɛ a saraka-toenu, wo si wonu di a ma nyɔ.

¹² Wole anubɛ wola dannu anubɛ wola wɔli-kɛlɛnu anubɛ Lifayi bɔnsɔn-mɔgɛ minnu siginɛ wo tɛma, wo si ta wo ladɛn ka sewa wo nyɔgɔn fɛ Marita kan-tina-yabɔnɛ wo rɔ. Wo si wo miri Lifayi bɔnsɔn-mɔgɛnu ma bawo anu ti nyamanɛ wo fenfen sɔrɔn anu nyɛrɛ ma.

¹³ Wo kana belenna wola saraka-mintantɛnu bɔla loroko-laraka!

¹⁴ Mari ara kan-tina-kelan min yabɔ wo ye bɔnsɔn-mɔgɛ donuta nyamanɛ rɔ, wo ni sarakɛnu bɔ nyɔ rɔ. Wo ni a bɛɛsi ma nyɔ le iko n bara a fɔ wo ye nya min kɛ la.

¹⁵ “Wo si kolo-fan minnu faga ka wo ma wo nyɛrɛ ladiya-fan la, kan-tina wo kan-tina diyara wo ye, wo si anu faga nyɔ. Wo si a dɔn iko a di wo ye nya min bawo Mari le a dila wo ma. Hali mɔgɛ sɛninyani ma iko tɔn ya a fɔ nya min, a si kolo-fen-su kɛnu sufa dɔn iko a si bintɔ-sogo-sɛnimɛnu dɔn nya min.

¹⁶ Kɔnɔ wo kana anu yele dɔn de! Ni min ya ata soge faga, a ni a makɔnɔ a yele bɛɛsi ni bɔ a rɔ dugi ma iko yi.

¹⁷ Ni mɔgɛ ye fenfen mala kɔ-fan la Mari ye, a kana wo dɔn a sigi-tinɛ rɔ, fɔ a ni ta a la kan-tina-kelan wo rɔ min yabɔnɛ Mari bolo. Wo ye yaka min sɔrɔnna wola fui-fannu tɔ anubɛ wola ki-fannu tɔ, fɔ ka ta wonu na Mari ye. Wola kolo-fannu den fɔlɔtɛ wo, wola dato-kɔ-fannu wo, wola hɛniki-sarakɛnu wo, wola kɔ-fen-toenu wo si min di Mari ma wo, wo si ta wonu damasi la kan-tina-kelan wo rɔ.

¹⁸ Wobɛ wola dannu anubɛ wola wɔli-kɛlɛnu anubɛ Lifayi mɔgɛ minnu siginɛ wo tɛma, wo damasi ni kɔ-fan kɛnu dɔn wota Mari Allata kan-tina-yabɔnɛ wo rɔ. Wo si sewa nyɔ rɔ ka a tɛgɛ wo ara koe minnu nadan Mari ye.

¹⁹ Fananta wo ye nyamanɛ wo rɔ, wo ni a ma wo fɛrɛma de, wo kana nyina Lifayi mɔgɛnu ko dɛɛ!

²⁰ “Tumado wati do si na, wota Mari Alla si do sa wota nyamanɛ kuma iko a ya lanyiri kiri wo ye nya min nun. Wo wati wa ke, ni mɛyɛ ya wo bira, wo si soge dɔn wo rɔ iko a di wo ye nya min.

²¹ Mari ya kolo-fan minnu di wo ma, wo si ke le ka anu faga ka anu boso ka anu dɔn wola bɔnnu na bawo Alla bato-tinɛ wo fɛ-yan.

²² Hali mɔgɛ sɛninyani ma iko tɔn ya a fɔ nya min, a si kolo-fen-su kɛnu sufa dɔn iko a si bintɔ-sogo-sɛnimɛnu dɔn nya min.

²³ Kɔnɔ wo kana soge anubɛ a yele dɔn bawo niyi ye a yele nyɛrɛ rɔ. Woletɔ wo kana niyi anubɛ soge dɔn.

²⁴ Wo kana yele-kuran dɔn, fɔ wo ni a to, sogenu yele ni bɔ a rɔ dugi ma iko yi.

²⁵ Ni wo ya tɔn kɛnu bira, wo si a ma, Mari ni nyagalen wo la. Wota koe bɛɛ si ta a kilɛ fɛ hali wo mamanɛnu fanan.

²⁶ “Mari ya kan-tina-kelen pe min yabɔ wo ye, wo si ta wola sarakɛnu anubɛ wola kɔ-fannu na nyɔ rɔ.

²⁷ Wo ye sarakɛ minnu mintanna gburr ka ban, wo si ta wonu na nyɔ. Wo si sarakɛ minnu dɔn, wo si ta wonu fanan na nyɔ ka wonu yele labɔn saraka-mintan-tinɛ kɔrɔ.

²⁸ N bara tɔn kɛ minnu fɔ wo ye kɛ la, wonu biranɛ ni to wo bolo tuma-wo-tuma. Ni wo ya wo ma, koe bɛɛ si ta a kilɛ fɛ wobɛ wo mamanɛnu ye bawo wo ye ko-telennɛ ladanna. Mari si sewa wo la worɔ.

Makawandili Bɛsi-Kɔ-Koe Rɔ

²⁹ “Wota Mari Alla si wo dɛnbɛ ka mɔgɛ wonu faga wo yarɔ, wo ye tala wo sigila kan min.

³⁰ Wo wa ban mɔgɛ wonu fagala wota Mari Alla sɛnbɛ kɔrɔ tumɛ min, wo kana anuna batoli-kɛ-nya bi. Ni wo ya wo ma, wo si ma gbalo la wo ye. Anu bi anuna bɛsɛnu kɔla nya min, wo kana a lɔn defan!

³¹ Wo kana wota Mari Alla bato iko anu denu bi anuna bɛsɛnu kɔla nya min bawo anu bi layarabi-koe ladanna min ma di Mari ye. Hali anuna dannu kɛndɛ, anu bi anu mala sarakɛ la ka anu mintan gburr!

³² “Wo ni tɔn kɛnu bira iko n bara a fɔ wo ye nya min kɛ la kɔnɔ wo kana fen bɔ a la, wo kana fen sa a kuma.