Tɔn-Fɔɛ-Fila-Nyɔgɛ 11 - ALLALA KUMƐ

Allata Kabana-Koe Lɔn-Koe Anu Bolo

¹ Musa ya a fɔ tun ko, “Wo ni wota Mari Alla keni ka ata tɔn bɛɛ bira tuma-wo-tuma.

² Wo ara a yen Mari ara kabana-ko-siyamɛ minnu kɛ wo yala. Wo nyɛrɛ-nyɛrɛ le kɛ sereyɛ la, wola dannu ma de! Nba, bi, wo ara hɛnkili min sɔrɔn Allata koe rɔ, ado wo ara ko-tenbinɛ minnu tayen wo yɛ la, wo ni wo miri wonu ma. Wo ya a lɔn ko a dan sa, ata fanka kolo.

³ Ata kabana-koenu kolo fanan. A ya min ma Iyipiti nyamanɛ anubɛ a mansɛ la, wo ya wo yen wo nyɛrɛ yɛ la.

⁴ Iyipiti mansɛ anubɛ a kɛlɛ-dannu bi wo sagaranna tumɛ min, wo ya a yen wo nyɛrɛ yɛ la wota Mari Alla ya Kɔgɔ-Yi-Wulan latugu anubɛ anuna kirindinu anubɛ anuna soeenu kuma nya min.

⁵ Yanni wo ni ke Yorodan bɛ dafɛ yan tɔ, wo ya a lɔn wota Mari Alla ya min ma wo ye wulɛ rɔ.

⁶ A ya min ma Rubɛn bɔnsɔn-mɔgɔ filɛ do la, Ɛliyabula dannu, Datan anubɛ Abairam, wo ya wo yen. A ya dugu-dɛ laka anu kɔrɔ. Dugi ya wonu nakunu anubɛ anuna denbayɛnu anubɛ anuna bɔnnu anubɛ anu bolo-fan bɛɛsi mɔgɛ bɛɛ yala.

⁷ Tonyɛ le, wole ara kabana-koe kɛ damasi yen wo yɛ la.”

Dankɛ anubɛ Duwɛ Sɔrɔn-Koe

⁸ “N ya tɔn kɛ min damasi di wo ma bi, wo ni wonu bira. Ni wo ya wo ma, wo si ke le Yorodan bɛ tɛgɛla worɔ ka ta nyamanɛ wo bi, wo ye tala sigila kan min.

⁹ Mari ya lanyiri kiri nyamani-hakikɛ minna ko la wo benbanu anubɛ anu kegeyɛnu ye, wo si simayɛ sɔrɔn ka mɛ sigini nyɔ rɔ.

¹⁰ Nyamanɛ wo mani ma iko wo siginɛ Iyipiti nyamanɛ min tɔ nun. Ni wo ya sugi fui Iyipiti nyamanɛ rɔ, fɔ wusi wa bɔ wo la a yi-kɛ-tinɛ.

¹¹ Kɔnɔ wo ye tala kan min, wo sa iko Iyipiti nyamanɛ. Wo wa ke nyɔ, wo si kɔnkɛnu yen anubɛ folenu. Wo si a yen bandɛ ye nala nyɔ biribiri!

¹² Wota Mari Alla nyɛrɛ le nyamanɛ wo fɛ-birala san mumɛ bɛɛ kɔrɔ.

¹³ “Min sanɛ wo kuma, n bara Marita tɔn minnu di wo ma bi, wo ni wonu bira. Wo ni Mari Alla keni ka ata wɔlɛ kɛ wo yisi bɛɛ la.

¹⁴ Ni wo ya wo ma, a si bandɛ lana a wati rɔ, wo ye nyinina a ma tumɛ min. Wo si a ma, wo ni ki-fen-siyaman tɛgɛ anubɛ fui-fannu.

¹⁵ Hali wola kolo-fannu bi binyɛ min dɔnna, wo si nanfa kubukubu! Wo ye nyinina dɔn-fan min bɛɛsi ma, wo si wo sɔrɔn duk!

¹⁶ “Kɔnɔ hali wo, wo ni a ma wo fɛrɛma de! Wo kana wo kan-kɔ sɔ wota Mari la ka ta bɛsɛnu kɔ tinɛ.

¹⁷ Ni wo ya wo ma, Mari si diminya wo ma. A si a ma worɔ, banda ti na. Dugi si gbala kerrkerr! Hali dugi wo kin a nya su bɛɛ ma, a ti mɛ wo si faga nyɔ.

¹⁸ “Wo ni wo miri tɔn kɛnu ma ka anu bira wo yisi rɔ gben! Wo ni anu sɛbɛ ka anu kiri wo bolenu na. Wo ni anu kiri wo telɛ ma, woletɔ wo si to wo mirila anu ma a kilɛ fɛ.

¹⁹ Wo taranta kan-bo-kan, wo tenbi luyi ma wo, wo tenbi bɔn na wo, wo tenbi wɔlila anubɛ wo tenbi wo sulenna, wo ni to wola dannu makolola karan kɛ la. Wo ni to anu karanna wola dannu ye tuma-wo-tuma.

²⁰ Wo ni anu sɛbɛ wola bonda-dɛ tɔnkɔn filɛ ma anubɛ wola soenu tarɛ-don-dɛ ma.

²¹ Ni wo ya wo ma, wobɛ wola dannu si simayɛ sɔrɔn lanyiri-nyamanɛ wo rɔ. Ni wo ya tɔn kɛnu bira, fananta san-kole ye wo kuma, wo si to simayɛ rɔ hali wola dannu.

²² “Wo ni wota Mari Alla keni ka ata kumɛ bɛɛsi bira ka ma telenbagɛ la a ye. Ni wo ya tɔn kɛnu bira tuma-wo-tuma,

²³ hali fanka-tigi le wo yogenu na, wo ye tala sigila minnuna nyamanɛ rɔ, hali anu kolo wo ko, Mari ko a si anu nayarabi wo ye.

²⁴ Wo tagamanta nyamanɛ wo kan-tina wo kan-tina rɔ, wo si ma wotɛ la. Wola nyamanɛ min ya a dabira dugula wara la wulɛ rɔ ha ka ta ke Lɛbanan kɔnkɛnu ma, wo dugi si ma wotɛ la. Ka a fɔlɔ Yufereti bɛ ma tele-bɔɛ wara la ha ka ta a sigi Mɛdetereniyan kɔgɔ-yi la tele-yigi wara la, wo dugi fanan si ma wotɛ la.

²⁵ Wo tara nyamanɛ wo kan-tina wo kan-tina rɔ, wota Mari Alla si a ma, nyɔ-mɔgɛnu ni kilan wo la iko a ya lanyiri kiri wo ye nya min. Mɔgɔ-wo-mɔgɔ ti ke kilɛ tɛgɛla wo ma.

²⁶ “N bara a to wole ma. Wo ni wota bi duwɛ anubɛ dankɛ rɔ.

²⁷ Wota Mari Alla ya tɔn min di wo ma bi, ni wo ya wo bira, wo si duwɛ kɛ sɔrɔn.

²⁸ Ni wo don ya tɔn kɛnu tinya ka wo kan-kɔ sɔ Alla la ka ta bɛsɛnu kɔ tinɛ, dankɛ kɛ si wo bira.

²⁹ Mari wa ta wo la wo sigi tinɛ wo rɔ tumɛ min, Mari ya duwɛ min kɛ wo ye kɛ la, wo si wo labira Kɛrisim kɔnkɛ bu la. Mari ya dankɛ min kɛ kɛ la, wo si wo labira Ebali kɔnkɛ bu la.

³⁰ Kenan mɔgɛ donu siginɛ Yorodan bɛ kɔgɔma tele-yigi wara la Morela kɔlɔma-kuru-latankanɛ donu tɔgɔfɛ Kiligali soe wara la. Kɔnkɔ filɛ kɛnu bi mɔgɛ kɛnuna nyamanɛ rɔ.

³¹ A ara to doni, wo ni Yorodan bɛ tɛgɛ ka ta wo sigi lanyiri-nyamanɛ rɔ. Wo wa ban nyamanita-mɔgɛ wonu kɛlɛla tumɛ min ka wo sigi-bole rabɛn,

³² wo ni a ma wo fɛrɛma tɔn kɛnuna ko la n bara min di wo ma kɛ la bi.”