Tɔn-Fɔɛ-Fila-Nyɔgɛ 10 - ALLALA KUMƐ

Tɔn-Tan Sɛbɛ-Koe Kuru-Walan Fila Nyɔgɛ Ma

¹ “Mari ya a fɔ nde, Musa ye ko n ni kuru-walan fila malɛsɛ ka anu ma iko a fɔlɔtɛnu. A ko n ni kenkirɛ ladan kɔlɔma la ka wo ma kuru-walan filɛ wonu sa-fan la ka ta kuru-walan wonu na kɔnkɛ kuma.

² A ya a fɔ n ye ko a ya min sɛbɛ a fɔlɔtɛ ma, n ya min tatii, a ye wo le sɛbɛla kɛ fanan ma. A wa ban a sɛbɛla, a ko n ni anu sa kenkirɛ wo rɔ.

³ “N ya a ma iko Mari ya a fɔ n ye nya min. N ya Akasiya kɔlɔma bi ka wo ladan kenkirɛ la. N ya kuru fila malɛsɛ iko a fɔlɔtɛ. N tara anu na kɔnkɛ kuma.

⁴ Wo tumɛ wo ladɛnnɛ Sinayi kɔnkɛ kɔrɔ, Mari kumara wo ye kɔnkɛ wo kuma ta-mɛlan rɔ ka Tɔn-Tan di wo ma. Mari ya Tɔn-Tan min di wo ma ta-mɛlan rɔ, wonu denu sɛbɛnɛ kuru-walan fɔlɔtɛ ma. A ya wo le sɛbɛ a tolatɛ fanan ma. Mari ya kuru-walan wonu don n bolo.

⁵ N sɛgira n kɔma kilɛ la ka yigi kɔnkɛ kɔrɔ. N ya kuru-walan wonu sa kenkira-ladannɛ wo rɔ iko Mari ya a fɔ n ye nya min. Ha bi, anu bi nyɔ.

¹⁰ N ya su bi-nani ani tele bi-nani de bɔ kɔnkɛ kuma. Mari ya a wɔlɔ matɔlɔ nna madiyali-kɛ-kan la, woletɔ a ma wo faga.

¹¹ Wo kɔma, a ko n ni ta sɔ wo yarɔ ka ta lanyiri-nyamanɛ wo bi a tiginu bolo.”

⁶ Isirɛla mɔgɛnu bɔra Yekan kebila-mɔgɛnuna kɔlɔn dafɛ tumɛ min ka ta anu sigi kan tinɛ min tɔgɛ Mɔsɛra, Aruna fagara nyɔ le. Anu ya a togon nyɔ. Ala den-keminɛ Ɛliyasa, wo ya a gbɛ bi ka saraka-masɔ-wɔlɛ kɛ.

⁷ Anu bɔra nyɔ. Anu tara San-Gbalama-Sɛrɛn-Tinɛ. Anu bɔra nyɔ ka ta Kan-Tina-Nyimaya, yi siya kan min.

⁸ Wo wati rɔ, Mari ya Lifayi bɔnsɔn-mɔgɛnu yabɔ ko anu ni tɔn-kenkirɛ wo fɛ-bira. Anu si ma saraka-masɔlɛnu na. Anu si to Mari anubɛ mɔgɛnu tɛma ka duwa anu ye Mari tɔgɛ rɔ. Wɔli-su wo le anu bolo ha bi.

⁹ Anu mɛ saraka-masɔlɛnu na Mari ye iko Mari Alla ya a fɔ anu ye nya min, wo le ya a ma, anu bɔnsɔn ma anuna lanyiri-nyamani-fen sɔrɔn anu nyɛrɛ ma iko bɔnsɔn doinu ya a sɔrɔn nya min. Anu mako-nyinyalɛ le nde le kelen pe la.

Alla ye Nyinina min ma Mɔgɛnu Bolo

¹² Musa ya a fɔ tun ko, “Wo Mari ye nyinina min ma wo bolo, wole Isirɛla mɔgɛnu, wo ni wo tole masɔ wo la. Wo ni Alla bato ka ata kumɛnu bira ka a ma iko a ya a fɔ wo ye nya min. Wo ni a keni ka ata wɔlɛ kɛ wo yisi bɛɛ la,

¹³ ka ata tɔn bira n ya min di wo ma wo nyɛrɛ munanfaga-koe la bi.

¹⁴ “Fan min bɛɛsi ye san-kole rɔ anubɛ dugu-kole kuma, Maritɛ le wonu na.

¹⁵ Kɔnɔ a ya wo benbanu keni nya min, wo gbɛlɛ gben! A ya wole ma mɔgɔ-yabɔnɛnu na sibolo-mɔgɛ doinu tɛma duninya rɔ. Ha bi, wo manɛ mɔgɔ-yabɔnɛnu na a bolo.

¹⁶ Ka a dabira bi ma, wo ni Marita tɔnnu bira. Wo ni fara tolo-gbɛlɛyɛ la.

¹⁷ Ale wota Mari Alla tenbira bɛsɛ mumɛ bɛɛ la. Ale tenbira kun-tiginu na. Alla-makawanɛ le ale la. Ata sɛnbɛ kolo. A bɛnta wo ni a gbiliya ka yɛrɛyɛrɛn a kɔrɔ. A ti lafisayalɛ kɛ. A ti sɔn gbundu-koe ma.

¹⁸ Wo ni a lɔn ko Mari ti sɔn mɔgɛ ni kɛɛ-nyaganɛnu anubɛ kelennɛnu bira boloko-yogomɛ-kɛ. Sundan minnu bi wo tɛma, wonu di Alla ye, ado ale le ye anu makoe nyinyala.

¹⁹ Wole fanan ni keninteyɛ yira sundannu na bawo wo ye sundanyɛ le la Iyipiti nun.

²⁰ Wo ni wota Mari Alla gbiliya ka ale kelen pe bato. Wo ni ma lanaya-mɔgɛ la ale Alla ye ka wola lanyirinu kiri ale kelen pe tɔgɛ rɔ.

²¹ Wo ni a tanto bawo ale le wota Mari Alla la. A ya kabana-ko-wɛ minnu kɛ wo ye, wo ara wonu yen wo nyɛrɛ yɛ la.

²² Nba, wo ni wo miri kɛ ma de! Wo benbanu bi tala Iyipiti tumɛ min, anu mɔgɔ bi-wɔrɔnfila pe! Kɔnɔ kaka, wota Mari Alla ara a ma, wo ara siyaya iko lolenu.”