Daniyɛli 9 - ALLALA KUMƐ

Matarali-Kɛ-Koe Daniyɛli Bolo Ala Mɔgɛnu Ye

^1-2 Midiya kɛ Sakasisila den Dariyasila mansayɛ san fɔlɔtɛ Babilɔn nyamanɛ kun na, nde, Daniyɛli ya buku-sɛnimɛnu bi. N ya wonu karan ka n miri Yerusalɛm soe tinya-koe ma san bi-wɔrɔnfila kɔrɔ iko Mari ya a fɔ Nɛbi Yɛrɛmaya ye nya min.

^3-4 Woletɔ n ya kasa-kurɛ don n kan na ka n sigi ta-gbangban rɔ bawo n yisi ara tinya Isirɛla mɔgɛnu hakɛla ko la. N ya sunyɛ don ka n Tigi Alla matara n sɛbɛ-kuna-wɛ la. Nta mataralɛ wo rɔ, n ko, “E, n Tigi Alla, ma si i gbiliya bawo i makawara. I sarata min na mabɛ ile tɛma, i ye wo latɔnbagayala. Mɔgɛ min si i keni ka ita tɔnnu bira, ile si wo tigi keni burubukai!

⁵ “Kɔnɔ male ara hakɛ kɛ ka ko-yogomɛ anubɛ karagbɛlɛyɛ ladan. I ya min fɔ ma ye, ma ara ma ban wonu na. I ya ko-telennɛ-kilɛ min yira ma la, ma ara ma kan-kɔ sɔ wo la ka bila ma nyɛrɛta kilɛ fɛ.

⁶ Mala mansɛnu wo, mala mɔgɔ-banu wo, ma benbanu wo, anubɛ mala nyamanita-mɔgɛ bɛɛ, i ya nɛbinu sɔ ka ila kumɛ fɔ ma ye kɔnɔ ma ma ma tole masɔ wo fenfen na.

⁷ Ile n Tigi, i ya ko-wo-ko ma, wo telennɛ kɔnɔ male waralɛ, ma ara koe min bɛɛsi ma, fenfen sa wo kɔma fɔ miliya-koe gbansan! A mara Yuda nyamanita-mɔgɔ la wo, a mara Yerusalɛm so-burɔ-mɔgɔ la wo, a Isirɛla mɔgɔ to wo, kɛlɛ tara minnu na wo, kɛlɛ ma ta minnu na wo, ma damasi ye kɛ yilikiyi kɔrɔ.

⁸ E, Mari, mala mansɛnu wo, mala mɔgɔ-banu wo, anubɛ ma benbanu, anu damasi ara hakɛ kɛ ile Mari la ka miliya-koenu ma.

⁹ Hali ma murutiyanɛ i ma, i wara kinikini ma ma ka ma makoto.

¹⁰ E, mata Mari Alla, i ya ila nɛbinu nata ma ma alako ka tɔnnu di ma ma kɔnɔ hali wo, ma ma ma tole masɔ.

¹¹ Male Isirɛla mɔgɛ bɛɛsi ya ila tɔnnu tinya. Anu ma sɔn ila kumɛ birala mumɛ! Ma ara hakɛ kɛ i la, woletɔ ita wɔli-kɛla Nɛbi Musa ya dankɛ minnu sɛbɛ ata buku rɔ, ile le ya a ma, dankɛ wonu ya ma dama bira.

¹² I ya a fɔ ko i ye nala koe min bɛɛsi mala male anubɛ mala kun-tiginu na, i wara wonu ma ma la serr! I wara Yerusalɛm soe tɔrɔ ka tenbi soe bɛɛ la duninya rɔ.

¹³ I ya ma tɔrɔ iko Musa ya a sɛbɛ ala tɔn-buku rɔ nya min. Kɔnɔ mata Mari Alla, ma ma ma raya ka duwɛ nyini i bolo ka fara mala hakɛnu na alako ma ni bila ita kila-telennɛ fɛ.

¹⁴ Ile, mata Mari Alla, i ya i rabɛn ma tɔrɔ kan ma, ado i ya a ma le, yɔ! I ya wo ma bawo i ya ko-wo-ko ma, wo telennɛ le tede! Kɔnɔ hali wo, ma ma ma tole masɔ i la.

¹⁵ “E, ma Tigi Alla, i nara ila mɔgɛnu na ka bɔ Iyipiti nyamanɛ rɔ tumɛ min, i ya ita sɛnbɛ-makawanɛ yira anu na wulɔn. Ha bi, ma ye ma mirila ita kabana-ko-sɛnbɛ wo ma. Kɔnɔ hali wo, ma ara hakɛ kɛ ka karagbɛlɛyɛ sigi i la.

¹⁶ Kebi fɔlɔ, ile le ya ma latanka. Hali i fonde ma ma gboya Yerusalɛm soe ma bawo i halalɛ le wo la, ita kɔnkɔ-sɛnimɛ, kɔni. Ka a tɛgɛ ma benbanu anubɛ maleta hakɛ ma, sibolo-gbɛrɛ minnu bi mala foolɛ rɔ, wonu yoonɛ ma ma.

¹⁷ E, mata Alla, nta matarali-kan lamɔɛn. Ila Bato-Bɔn min bara tinya, i ni wo sɔ-kurɛ-kɛ tun. A sɔ a kurɛ la woletɔ mɔgɛ bɛɛ si a lɔn ko ile le Alla la.

¹⁸ E, Alla, i wɔlɔ matɔlɔ ma la. I ni i kolan maka, i ni a yen ma tɔrɔyanɛ nya min. I ni a yen fanan ko i tɔgɛ sanɛ soe min kuma, wo ye tɔrɔya-sufa min tɔ. Ka a fɔ ma telennɛ, woletɔ ma ye i matarala, wo ma de! Ma ye i matarala bawo ila kinikinɛ kolo ma wara la.

¹⁹ E, n tigi, i wɔlɔ matɔlɔ ma la. E, n tigi, ma makoto. E, n tigi, ma makoe kɛnu nyinya. I kana matanbani kɛ woletɔ mɔgɛ bɛɛ si a lɔn ko ile le Alla la, ado i ya a lɔn ko i tɔgɛ ye soe kɛ anubɛ ila mɔgɛnu kuma.”

Wɔlɔyiya-Kumɛ Fɛsɛfɛsɛ-Koe Melika Yibirila Bolo

²⁰ N tora matarali-kɛla ka n sɔ mabɛ Isirɛla mɔgɛnu hakɛ la. N bi nta Mari Alla matarala ko a ni ata Bato-Bɔn sɔ-kurɛ-kɛ.

²¹ N bi n matarali-kɛ kun na, n ya Yibirila kelan min yen nna ko-rayen doi rɔ, wo yigira iko kokɛ. A ye yigila n ma wati min, wo ya a taran, wurala-saraka-bɔ-wati ara ke.

²² Wo kɔma, Yibirila ya a fɔ nde, Daniyɛli ye ko, “N bara yigi yan alako i ni wɔlɔyiya-kumɛ kɛ kɔrɛ lɔn.

²³ Kebi i ya ila mataralɛ dabira wati min, Alla ya ila matarali-kan wo lamɔɛn. I di a ye woletɔ ko-rayirɛ min kera i ye, n bara na ka wo kɔrɛ yira i la.

²⁴ “Alla ara ban a latɛgɛla nun ko fɔ san bi-wɔrɔnfila sigi tina wɔrɔnfila (490) wa tenbi yanni ila mɔgɛnu anubɛ ila so-sɛnimɛ Yerusalɛm ni bɔ anuna hakɛ kɔrɔ. Wo kɔma, Alla si anu makoto ka telenbagayɛ lasɛgi anu tɛma. Woletɔ ko-rayirɛ anubɛ wɔlɔyiyɛ min kera i ye wo la, wonu na si tɔnbagaya. Wo kɔma, Alla Bato-Bɔn si dantɛgɛ tun.

²⁵ I tole masɔ bɛrɛkɛ! Ka a bi anu ya Yerusalɛm sɔ-koe fɔ a kurɛ la tumɛ min ha Allata-Mɔgɔ-Yabɔnɛ ni na, fɔ san wɔrɔnfila sigi tina wɔrɔnfila (49) wa tenbi. Anu si soe wo tarɛ kɔmɛ lafoo denka-rayan-bɛ la ka so-burɔ-luyinu tabɛn a kilɛ fɛ. A si san bi-wɔrɔ san fila sigi tina wɔrɔnfila (434) bɔ, soe wo sɔnɛ si to. Kɔnɔ wati wo bɛɛ si ma anu bolo tɔrɔyɛ la.

²⁶ Wo wati wa tenbi, anu si Allata-Mɔgɔ-Yabɔnɛ faga hali a ma ko tinya. Kun-tigi-sɛnbɛmɛ do si ala kɛlɛ-dannu nata ka ta Yerusalɛm anubɛ Alla Bato-Bɔn tinya pɔ! Wola ban si na iko gboron-gboronna-yi. Kɛlɛ anubɛ kasarɛ si ma anutɛ la burubukai iko Alla ya a fɔ nya min.

²⁷ Ale kun-tigi-sɛnbɛmɛ wonubɛ mɔgɔ-siyaman si lanyiri kiri anu nyɔgɔn tɛma san wɔrɔnfila kɔrɔ. Wati wo wa tala a tɛma, a si tɔn sigi saraka-mintantɛnu anubɛ saraka doinu na. Kun-tigi wo si kisimiriya-bɛsɛ do sigi Alla Bato-Bɔn la kan-tina-sɛnimɛ rɔ. A si to nyɔ ha min ya ale bɛsɛ ladan, wo tɔrɔya-wati ni na iko Alla ya a rabɛn a ye nya min.”