Daniyɛli 7 - ALLALA KUMƐ

Sogo-Ferema Nani Yen-Koe Kiyo rɔ Daniyɛli Bolo

¹ Bɛlisasata mansayɛ san fɔlɔtɛ Babilɔn nyamanɛ rɔ, Daniyɛli kiyora. Ko-rayirɛ minnu kera a ye kiyo wo rɔ wulɔn suyi rɔ, a ya wonu sɛbɛ.

² Daniyɛli ko, “Nna kiyo kɛ rɔ, n ya fɔnyɔ yen bɔla duninya-tonko-nanɛ bɛɛ rɔ. A ye kɔgɔ-yi ralonkon-lankanna.

³ N ya sogo-subolo-belebele-ba nani yen bɔla yi rɔ ka ta gbele ma.

⁴ N ya a fɔlɔtɛ min yen, wo mani de iko yarɛ kɔnɔ a kanbannu bi a ma iko kokɛ. N bi a mafɛlan wo kun na, n ya fan do yen a kanban wonu wurunnɛ a ma. Fan do ya a bi ka a sɔ a kin filɛ kun na iko hadama-dan. Hadama-den-miriya dira a ma wati wo rɔ.

⁵ “Wo kɔma, n ya sogo-ferema fila nyɔgɛ min yen, wo mani de iko yarama-yɛlɛnkan. Wo sɔnɛ a kɔma kin filɛ kun na. Kɔgɔ-barasa-kolo sawa kankannɛ a dɛ la. Soge wo ya kuman-kan lamɔɛn ko, ‘Ta, i ni soge dɔn iko a di i ye nya min.’

⁶ “N bi kɛ fanan mafɛlan kun na tumɛ min, n ya a sogo-sawa-nyɔgɛ yen. Wo manɛ le iko kuli kɔnɔ a kanban nani sɔnɛ a kɔɛ ma. Wonu manɛ iko konatɛ, ado a kunyɛ nani. Mansaya-sɛnbɛ dira a ma.

⁷ “N bi kɛ fanan mafɛlan kun na tumɛ min, n ya a sogo-nani-nyɔgɛ wo yen. A makilanta dɔgɔma-ma-de, ado a fanka kolo. Nɛgɛ-belebelenu denu manɛ a nyin la. A ye fan min birala, a nyin si wo ramɛsɛ-mɛsɛya. A toe min bi tola, a si wo nunku a kian la. Ale faranɛ soge doinu ma feufeu, bawo kere tan ye a kunyɛ ma.

⁸ N bi n mirila kere wonu bara-koe ma tumɛ min, n ya kere-nɛ do yen yɛlɛla kere doi wonu tɛma. A yɛlɛmatoe ya kere sawa tuntun kere kɛnu tɛma ka wonu nabɔ. Hadama-den-yɛ ye kere nɛ wo bolo, ado mankan-tugu-dɛ ye a bolo.

⁹ “N bi wo fanan mafɛlan kun na, anu ya mansaya-waganɛnu nabɔ ka wonu sigi-bole rabɛn iko a bɛnta, anu ni sigi nya min. N ya Habadan-Tigi-Alla yen. Wo tara a mayigi waganɛ wo kelen tɔ. Ala kurɛnu gbɛnɛ perr! A kunyɛ gbɛnɛ ha ka gbɛ! Ala waganɛ wo, kiannu bi a la iko kirindi. Waganɛ wo ye malanna iko ta-mɛlan. Waganɛ wo kiannu silɛɛ ye tiila a ma iko ta-mɛlan.

¹⁰ Tɛ ye bɔla waganɛ wo kɔrɔ iko ba-yi. Melika-wulu-yirika-siyaman sɔnɛ a yakɔrɔ. Wonu bi ata wɔlɛ kɛla. Kiti-tɛgɛlɛnu ya anu sigi ka kiti-sa-bukunu dɛ laka.

¹¹ “N bi wonu mafɛlan kun na, n bi kere-nɛ wo nyɛrɛ-matɔgɔ-kan lamɔɛnna. Wo le tora a la, fan do ya a sogo-nani-nyɔgɛ wo faga. Anu ya a suyi lakɛ ta-wɛ rɔ alako a ni mintan gburr!

¹² Sogo sawɛ minnu tora, anu ya wonuta sɛnbɛ bi anu bolo kɔnɔ wonu tora anu niyi la wati-kundu-ni kɔrɔ.

¹³ “Nna kiyo kɛ rɔ, n ya fan do yen min muninyanɛ hadama-dan la. A ye nala n magbenna, a lafoonɛ banda-finyɛ la. A tara a sɔ Habadan-Tigi-Alla dafɛ, anu ya a raka wo la.

¹⁴ Habadan-Tigi-Alla wo ya sarati anubɛ gbiliyɛ anubɛ mansaya-sɛnbɛ di a ma alako duninya-sibole bɛɛ ni wɔli a ye. Ala saratiyi si to burubukai, ado ala mansayɛ ti ban mumɛ!

Kiyo Wo Kɔrɛ Rakaran-Koe

¹⁵ “Kiyo kɛ ya n yakɔrɔ-mamɔ ka nde, Daniyɛli takilan dɔgɔma-ma-de!

¹⁶ N tara melika kelen taran melika-siyamɛ kɛnu tɔ ka a manyinika ni kiyo kɛ kɔrɛ ye min na.” A ya a kɔrɛ fɔ n ye.

¹⁷ “A ko, ‘Sogo-ferema nanɛ kɛnu bi mansa-bon nani dela ko la minnu bi wulila duninya rɔ.

¹⁸ Kɔnɔ tɔ-a-la, Alla Min Bi Fan Bɛɛ Kun Na, wola mɔgɔ-sɛnimɛnu si duninyama-kun-tigiyɛ sɔrɔn, ado wo ti bɔ anu bolo muk!’

¹⁹ “Wo kɔma, a sogo-ferema-nani-nyɔgɛ kɛ, a sɔgɛ ye n na, n ni wo wara-koe lɔn bɛrɛkɛ bawo anubɛ sogo-ferema sawɛ kɛnu ma kɛn. A nani nyɔgɛ kɛ min makilanta, a suran nadannɛ silɛɛ la anubɛ a nyin nadannɛ nɛgɛ la. A wa fan min bira, a si wo ramɛsɛ-mɛsɛya wonu na. A toe min bi tola, a si wonu nunku a kian la.

²⁰ A sɔgɛ ye n na fanan, a kere tan minnu bi a kuma, n ni wonu bara-koe lɔn. A sɔgɛ ye n na fanan, kere-nɛ min yɛlɛta kere doinu tɛma ka sawa bɔ nyɔ, n ni wo wara-koe lɔn fanan. Kere-nɛ wo, a yɛ ye nyɔ, ado mankan-tugu-dɛ ye a kuma. Hali a dɔgɔ kɔnɔ a ragbɛlɛ a ta-nyɔgɛnu ko.

²¹ “N tora wo mafɛlan kun na, n ya ale kere-nɛ wo yen Allata-mɔgɔ-sɛnimɛ wonu kɛlɛla, ado a ye anu nɔla le nun.

²² Kɔnɔ Habadan-Tigi-Alla Min Bi Fan Bɛɛ Kun Na, wo nɛ, a ya yoe di ala mɔgɔ-sɛnimɛnu ma kiti tɛgɛ tinɛ, ado a tumɛ ara ke ala mɔgɔ-sɛnimɛnu ye ka duninya-mansayɛ kɛ.

²³ “Melika kelan wo ya kiyo kɛ kɔrɛ rakaran n ye nya min, wo le kɛ la. A ko a sogo-ferema-nani-nyɔgɛ kɛ si ma mansa-bon-nani-nyɔgɛ la. Dan-nafarɛ ye mansa-bon sawɛ anubɛ a nani-nyɔgɛ kɛ tɛma. A nani nyɔgɛ si duninya kɛ rakese-kesen ka a nunku.

²⁴ A ko kere tan kɛ, mansa tan de wonu na. Mansa-gbɛrɛkɛ si na minnubɛ mansɛ doi kɛnu ma kɛn. Wo si mansa sawa labui mansa tan kɛnu tɔ.

²⁵ Alla Min Bi Fan Bɛɛ Kun Na, mansɛ wo si wo rasɛ ka ala mɔgɔ-sɛnimɛnu nyankankantan. A si anuta ladɛn-sɛnimɛnu tinya anubɛ anuta tɔnnu, ado Allata mɔgɛnu si taran ata sɛnbɛ kɔrɔ san sawa anubɛ a tala.

²⁶ Wo wa ban, a ko n ya kiti-tɛgɛlɛ minnu yen wo la, anu si mansɛ wo kiti tɛgɛ. Anu si ala mansaya-sɛnbɛ bɔ a bolo ka a kasara feu!

²⁷ Alla Min Bi Fan Bɛɛ Kun Na, mansaya-sɛnbɛ anubɛ ala kinyɛ min bi duninya bɛɛ rɔ, a si wo latenbi ala mɔgɔ-sɛnimɛnu ma. A ko anu si to mansayɛ la burubukai! Min sanɛ wo kuma, duninya-mansɛ toenu si wɔlɛ kɛ anu ye ka anu gbiliya.

²⁸ “N ya koe min bɛɛsi yen nna kiyo rɔ, wo le kɛ la. N kilanta furr, ha n mɔlɔkɔnta kɔnɔ n ya a bira n tɔ.”