Daniyɛli 3 - ALLALA KUMƐ

Bɛsi-Ladan-Koe Mansa Nɛbukanasa Bolo

¹ Lunyɛ do, Mansa Nɛbukanasa ya sɛnɛ do ladan ka wo ma ata bɛsɛ la. Ala yanyɛ, nunkan-nya bi-wɔrɔ. A kɔnɛ, nunkan-nya wɔrɔ. Lɛɛ min tɔgɛ Dura, Babilɔn nyamanɛ rɔ, a tara bɛsɛ wo sigi nyɔ.

² Ale mansɛ ya kilayɛnu nata ala nyamanɛ wo tonke bɛɛ rɔ ka ala mɔgɔ-banu kele alako anu ni ta anu kundɛn lɛɛ wo rɔ. Ala kandɛ wo, a pati-mansa wo, a sigisɔn-mansa wo, a so-tigi wo, a makawandila wo, a nɔnfulu-lamarala wo, a kiti-tɛgɛla wo anubɛ ala sɛbɛla wo, a ya a mɔgɔ-ba wonu dama kele alako anu ni na bɛn bɛsɛ wo dantɛgɛ-koe rɔ.

³ Wonu dama kundɛnta Mansa Nɛbukanasata bɛsɛ wo yakɔrɔ tumɛ min,

⁴ mansɛla ko-mayonnɛ ya a kan mayɛlɛ a fɔ tinɛ. A ko, “Sibole min damasi la ara dɛn yan tɔ bi, wo ni wo tole masɔ mansɛ kuman-kan la.

⁵ A sa mɛla tun, wo si buru-kan lamɔɛn. Wo kɔma, tolonnɛnu si a kɛ-a-rɔ. A fulu-fɛla wo, a bɔlon-fɔla wo, a sɔrɔn-fɔla wo, a bala-fɔla wo, anubɛ a fɔli-fen-toenu, wonu damasi si a kɛ-a-rɔ. Tolonnɛ kɛ bɛɛsi wa a kɛ-a-rɔ tumɛ min, wo damasi si wo madu mansɛta bɛsɛ kɛ kɔrɔ ka a matɔgɔ.

⁶ Ni mɔgɔ-wo-mɔgɔ ma sɔn a madula a kɔrɔ ka a matɔgɔ, anu si wo mɔgɛ lakɛ sulubondon tɛ rɔ tiriya!”

⁷ Tolonnɛ wonu ya a kɛ-a-rɔ tumɛ min, sibole min bɛɛsi ye nyɔ rɔ, wonu ya anu madu mansɛla bɛsɛ wo kɔrɔ ka a matɔgɔ.

Isirɛla Mɔgɛnu Manafigiya-Koe Mansɛ Ye

⁸ Wo ya a taran, Babilɔn kɛ donu bi Yahudiyanu madɔnna.

⁹ Anu ya a fɔ Mansa Nɛbukanasa ye ko, “Alamɛ mansɛ mɛra. Alamɛ mansɛ kɛndɛyara.

¹⁰ Ile, ma tigi, ara a fɔ nun ko tolonnɛnu ba a kɛ-a-rɔ tumɛ min, a fulu-fɛla wo, a buru-fɛla wo, a bɔlon-fɔla wo, a sɔrɔn-fɔla wo, a bala-fɔla wo, anubɛ a fɔli-fen-toenu, ko mɔgɛ bɛɛsi ni a madu ala bɛsɛ kɔrɔ ka a matɔgɔ.

¹¹ Ni min ma sɔn kɛ ma, ile, ma tigi, ko ka wo mɔgɛ lakɛ sulubondon tɛ rɔ.

¹² Kɔnɔ Yahudiya donu bi nyɔ, mansɛ nyɛrɛ ara minnu ma kun-tigi la ala nyamanɛ kɛ rɔ, Sadiraki wo, Mɛsaki wo, anubɛ Abɛdinigɔ, kɔni, wonu ma ma tigita kumɛ to a gbɛ rɔ. Anu ti sɔn anu madu-koe ma mansɛla bɛsɛ kɔrɔ i wara min nadan anubɛ a bɛsi-toenu.”

¹³ Mansɛ ya wo lamɔɛn tumɛ min, a yisi bɔra dɔgɔma-ma-de! A ya a fɔ anu ye ko, “Wo ta mɔgɔ sawɛ wonu kele.” Mɔgɔ sawɛ wonu nanɛ,

¹⁴ Mansa Nɛbukanasa ya a fɔ wonu ye ko, “N bara a lamɔɛn ko wo sa sɔnna wo madu-koe ma nna bɛsɛ kɔrɔ n bara min nadan sɛnɛ la anubɛ nna bɛsi-toenu. Tonyɛ le wo la, wa?

¹⁵ Kɔnɔ ni wo ya tolon-kan lamɔɛn gbɛ ka wo madu nna bɛsɛ kɔrɔ, wo kin. Kɔnɔ ni wo ma sɔn wo madu-koe ma, anu si wo lafili sulubondon tɛ rɔ tiriya! Wola bɛsɛ nyamintan si ke wo kunyɛ bɔla wo rɔ nde bolo?”

¹⁶ Sadiraki wo, Mɛsaki wo, anubɛ Abɛdinigɔ ko, “Ma tigi, miriya-gbɛrɛkɛ mumɛ sa kumɛ kɛ rɔ.

¹⁷ Ni ile, ma tigi, ya ma lafili sulubondon tɛ rɔ, male ye Alla min batola, wo si ke ma latankala ma tigita sɛnbɛ ma hali sulubondon tɛ wo.

¹⁸ Min tenbira wo la, hali a ma ma latanka wo ma, ma ye a rɔ le mansɛ ni a lɔn ko male ti ila bɛsɛ kɛ matɔgɔ ka ma madu ila bɛsi-toenu kɔrɔ.”

Kemini Sawɛ Wonu Nakɛ-Koe Tɛ rɔ Mansɛ Bolo

¹⁹ Mansɛ ya kumɛ wo lamɔɛn tumɛ min, a yakɔrɔ rapinpira diminyɛ bolo. Ale mansɛ ya a fɔ ala wɔli-kɛlɛnu ye ko anu ni tɛ wo ladɛn. A wuyan ni tenbi a fɔlɔtɛ la pirr!

²⁰ Ala kɛlɛ-dan minnu kolo gbɛlɛ ka tenbi doinu na, a ya a fɔ wonu ye ko wonu ni mɔgɔ sawɛ kɛnu kiri ka anu nafili tɛ kɛ rɔ.

²¹ Wonu ya anu kiri gben! Anu ma anuna durukinu bɔ anu kan na anubɛ anuna kurusinu, hali anuna fulɛnu. Anu ya anubɛ wonu nafili sulubondon tɛ rɔ.

²² Bawo mansɛ ara a ma, anu bara tɛ ladɛn belebele kɛ, nba kɛlɛ-dan minnu ya kemini-mɔgɔ sawɛ kɛnu nafili tɛ rɔ, ta-wuyan ya wonu faga.

²³ Kɔnɔ mɔgɔ sawɛ wonu kirinɛ tora tɛ wo tɛma.

²⁴ Tiriyante wo rɔ, Mansa Nɛbukanasa ya a lasɔ bawo a ara kabana-koe min tayen tɛ wo rɔ. A ya ala makawandilɛnu manyinika. A ko, “Ma ma mɔgɔ sawa le lakɛ tɛ kɛ rɔ nun, wa?” Wonu ko, “Ma tigi, mɔgɔ sawa le, yɔ!”

²⁵ Ale mansɛ ko, “Nfenna worɔ, n bi mɔgɔ nani yenna tagamana tɛ wo rɔ? Wo ni wo yɛ lata. Anu kirini ma tun, ado n ma la a la ni anu tanbannɛ le. Anu nani nyɔgɛ wo mani de iko Allata melika.”

Mɔgɔ Sawɛ Kɛnuta Alla Gbiliya-Koe Mansɛ Bolo

²⁶ Ale mansɛ wo nyɛrɛ-nyɛrɛ tara sulubondɔn wo don-dɛ la. A ya a kuli mayɛlɛ ka kemini-mɔgɔ sawɛ wonu takele. A ko, “Sadiraki! Mɛsaki! Abɛdinigɔ! Alla Min Bi Fan Bɛɛ Kun Na, wole, a batolɛnu, wo bɔ tɛ rɔ. Wo ni na yan.” Mɔgɔ sawɛ wonu bɔra tɛ rɔ.

²⁷ Mɔgɛ bɛɛ ya mɔgɔ sawɛ kɛnu mafɛlɛn, a pati-mansa wo, a sigisɔn-mansa wo, a so-tigi wo, a makawandila wo. Wonu damasi ya mɔgɔ sawɛ kɛnu mafɛlɛn bawo tɛ ma ko-wo-ko ma anu na. Hali anu fɛrɛma-siyinu, tɛ ma ko ma wonu denu gbuyɛ la. Anuna kurɛnu ma mintan mumɛ, ado hali ta-sisi-sumɛ ma sigi anu ma.

²⁸ Ale mansɛ ya a fɔ ko, “N si mɔgɔ sawɛ kɛnuta Alla tanto bawo ale le ya ata melika lana alako ka anu natanka tɛ kɛ ma. Anu lara anuta Alla la feu! Yanni anu ni anu madu nta bɛsɛ kɛ kɔrɔ, anu ya nna tɔn tinya hali ka anu niyi fili bawo a ma di anu ye, anu ni bɛsi-wo-bɛsi matɔgɔ anuta Alla kɔma.”

²⁹ Ale mansɛ ya a fɔ tun ko, “N bara ban a latɛgɛla bi, n ko ni mɔgɔ-wo-mɔgɔ ya mɔgɔ sawɛ kɛnuta Alla lafɛya, wo tigi si gbegbe ka ala bɔn ma sundu-kunyɛ la. Bɛsi-wo-bɛsi sa nyɔ min si ke mɔgɛ latankala iko kɛnutɛ.”

³⁰ Woletɔ mansɛ ya Sadiraki wo, Mɛsaki wo, anubɛ Abɛdinigɔ sɔ-tinɛ mayɛlɛ Babilɔn nyamanɛ rɔ.