Daniyɛli 12 - ALLALA KUMƐ

Watila Ban Wara-Koe

¹ Linɛn-kurɛ donnɛ melika min kan na, wo ya a fɔ n ye ko, “Wati wo si a taran, ila nyamanita-mɔgɛnuna kandan-melika min tɔgɛ Maikali, wo si bɔ gbɛ rɔ. Wo wati rɔ, tɔrɔyɛ si koloya duninyama-tɔrɔyɛ bɛɛ ko. Ile Daniyɛlila nyamanita-mɔgɛ minnu tɔgɛ sɛbɛnɛ Allata buku rɔ, wonu si kisi.

² Minnu bara faga nun kɔrɔma la, wo siyaman niyi si bila anu tɔ tun. Donu si taran anu diya habadan-nimayɛ rɔ, donu si taran anu gboya habadan-yarabiyi kɔrɔ.

³ Minnu si Allata hɛnkilimayɛ bira anu bolo filɛ la ka kila-latelennɛ yira mɔgɔ-siyaman na, wonuna hɛnkilimayɛ si malan iko lolenu.”

⁴ Melika kelan wo ya a fɔ n ye tun ko, “Daniyɛli, i ni buku kɛ dɛ gbalɔn ha duninyala-ban-wati. Kɛ-wati-mumɛ bɛɛ rɔ, mɔgɛnu si to yigi-ni-yɛlɛla hɛnkili-sɔrɔn-koe rɔ.”

⁵ Wo kɔma, nde, Daniyɛli ya kei-fila-sɔnɛ yen tun yi dafɛ. Kelan sɔnɛ yi-tɔnkɔn doi rɔ, kelan fanan sɔnɛ yi tɔnkɔn doi rɔ.

⁶ Mɔgɔ filɛ wo mɔgɔ kelen ya melika linɛn-kura-gbɛ-tigi wo manyinika min bi yi wo kuma. A ko, “Kabana-koe kɛ damasi ye nala mala wati nyamintan?”

⁷ Melika wo ya a bolo filɛ layɛlɛ san ma ka lanyiri kiri habadan-Mari tɔgɛ rɔ. Nde, Daniyɛli ya a lamɔɛn a ye a fɔla ko, “A si san sawa ani a tala bɔ. Allata mɔgɛnuta tɔrɔya-wati wa ban tumɛ min, wo le ye a taranna ko-nya kɛ damasi ara ka-a-la.”

⁸ Melika kɛ ya min fɔ, n ya wo lamɔɛn kɔnɔ nde, Daniyɛli ma a kɔrɛ lɔn. Woletɔ n ya nyinikalɛ sa, n ko, “N fa, koe kɛ damasi si a laban kama?”

⁹ A ya n yabi ko, “Daniyɛli, ta i ye bawo kumɛ kɛ si to gbundi rɔ ha watila ban.

¹⁰ Hɛnkili ye minnu na, wonu si anu kɛ-nya latelen kɔnɔ mɔgɔ-karagbɛlɛnu ti ko-wo-ko nya-yen kɛ rɔ fɔ ka to anuna karagbɛlɛyɛ kun na tolon!

¹¹ “Ka a bi tɔn-sigi-wati ma sɔgɔma ani wurala-saraka-bɔ-koe rɔ, ha anu si kisimiriya-bɛsɛ sɔ Alla Bato-Bɔn kan-tina-sɛnima rɔ, wo si tele waga kelen, tele kɛmɛ fila ani tele bi-kɔnɔntɔ (1,290) bɔ.

¹² Duwa-mɔgɛ le wo mɔgɛnu na minnu si to anu munyuna telenbagayɛ rɔ tele waga kelen, tele kɛmɛ sawa, tele bi-sawa ani tele loli (1,335) kɛnu kɔrɔ.

¹³ “Ile Daniyɛli, i ni ma telenbagɛ la i siyi-tele-bɛɛ kɔrɔ. I wa ban fagala tumɛ min, i si i lasɔ tun wati-laban ka ila kɔntɔ-diya-fan sɔrɔn.”