Daniyɛli 1 - ALLALA KUMƐ

Daniyɛli anubɛ a Diyana-Mɔgɛnu Bara Koe ( 1.1–6.28 ) Yahudiya-Kemini-Mɛsɛ minnu bi Babilɔn Nyamani-Tigila Bolɔn Burɔ

¹ Mansa Yahoyakimta mansayɛ san sawa nyɔgɛ Yuda nyamanɛ rɔ, mansɛ min tɔgɛ Nɛbukanasa, wo ye Babilɔn nyamanɛ kun na. Wo wati rɔ, mansɛ wonubɛ ala kɛlɛ-dannu tara kurɔn don Yerusalɛm soe ma ka nyɔ-mɔgɛnu kɛlɛ.

² Ma tigi Alla le sɔnta Yuda Mansa Yahoyakim anubɛ ala kɛlɛ-dannu bira-koe ma anubɛ Alla Bato-Bɔn fen-kolomɛ donu bi-koe ma. Mansa Nɛbukanasa tara fen-kolomɛ wonu namara ata bɛsi-kɔ-bɔn la Babilɔn nyamanɛ rɔ.

³ Isirɛla kemini minnu bɔra mansaya-bɔn anubɛ tɔgɔlamɛnuna bɔn la, ale mansɛ ya a fɔ ala kandɛ ye min tɔgɛ Asipinasi ko a ni ta wo donu yatɔnbɔn.

⁴ Kɔnɔ a ye min yatɔnbɔnna, anu ni kinya, anu ni ma hɛnkilimɛnu na, anu ni ma mɔgɔ-kolonɛnu na, anu ni ko nya-yen yona, ado fɛɛ kana taran anu na fanan. A bɛnta, wo mɔgɔ-sufanu ni sigi mansa-bolɔn la. Ale mansɛ ya a fɔ tun ko ale Asipinasi si to wonu karanna anuna Babilɔn kan anubɛ anuna buku-sɛbɛni-kɔrɛnu karan ma.

⁵ Mansɛ wo ya a fɔ tun ko ala mɔgɔ-banu bi dɔn-fan anubɛ baan min sufa sɔrɔnna, a bɛnta, Isirɛla mɔgɔ-yabɔnɛ wonu fanan ni wo nyɔgɔn sufa sɔrɔn. Yanni anu ni to kofula mansɛla mɔgɔ-banu ma, anu si karan san sawa dɛgɛdɛgɛ!

⁶ Mɔgɔ nanɛ minnu taranta mɔgɔ-yabɔnɛnu tɛma, wonu tɔgɛ le kɛnu na, Daniyɛli wo, Hananaya wo, Misiyɛli wo anubɛ Asaraya. Yuda bɔnsɔn-mɔgɛ le kɛ dama la.

⁷ Anu karan-mɔgɛ ya tɔgɔ-kura sa anu kuma. A ya Daniyɛli tɔgɔ yɛlɛma Bɛlitisasa. A ya Hananaya tɔgɔ yɛlɛma Sadiraki. A ya Misiyɛli tɔgɔ yɛlɛma Mɛsaki. A ya Asaraya tɔgɔ yɛlɛma Abɛdinigɔ.

⁸ Daniyɛli ya a latɛgɛ a nyɛrɛ ma ko a ti a nyɛrɛ latinya mansɛla dɔn-fan wonu dɔn tinɛ. Woletɔ a ya anu karan-mɔgɔ Asipinasi madiya alako ale kana mansɛla dɔn-fan dɔn anubɛ ka ala baan min.

⁹ Alla ya a ma, Asipinasi kinikinita Daniyɛli ma ka to a mirila ko-nyimɛ ma a wara la.

¹⁰ Kɔnɔ hali wo, Asipinasi kilannɛ mansɛ la. A ya a fɔ Daniyɛli ye ko, “Mansɛ le wara ban ila fen-dɔn-koe anubɛ ila baan-min-koe latɛgɛla. Ni i ma sɔn mansɛla dɔn-fen-nyimɛ kɛnu dɔn-koe ma, i fɛrɛ si bɔ i la i ta-nyɔgɔnnu tɛma. Ni wo don mara, mansɛ si a ma, anu ni n kunyɛ tɛgɛ a la.”

¹¹ Asipinasi ya anu makandannɛ sigi anu mɔgɔ nanɛ wo kun na. Daniyɛli ya a fɔ anu makandannɛ wo ye ko,

¹² “Dɔn-fen-mɛsɛnɛnu anubɛ yi-gbansan di ma ma. I ni ma lakɔrɔsi tele tan kɔrɔ.

¹³ Wo kɔma, keminɛ minnu bi mansɛla dɔn-fen-hakikɛ dɔnna, i ni mabɛ wonu fɛrɛ mafɛlɛn ni minnu baranɛ. Nba, a tonɛ ile ma ni i ye ma de-nyinina nya min gbɛ!”

¹⁴ Woletɔ a sɔnta wo ma ka anu mafɛlɛn tele tan wo kɔrɔ.

¹⁵ Tele tan kɛ tenbinɛ, a ya a yen ko anu kɛndɛ, ado anu tagbɛlɛ ka tenbi dɔn-fen-hakika-dɔnnɛ wonu na.

¹⁶ Ka a dabira wulɔn ma, anu makandannɛ tora dɔn-fen-mɛsɛnɛnu dila anu denu ma. Anu ma mansɛta dɔn-fen-hakikɛ wo dɔn tun.

¹⁷ Alla ya hɛnkili di kemini-mɔgɔ nanɛ kɛnu ma ka buku-sɛbɛnɛ damasi kɔrɛ lɔn. Min sanɛ wo kuma, Alla ya a ma, Daniyɛli mara kiyo-kɔrɛ anubɛ ko-rayennɛ-takarannɛ la.

¹⁸ Anuna san-sawa-karan wo bannɛ, Asipinasi ya mɔgɔ-yabɔnɛ wonu bi ka ta anu yira Nyamani-Tigi Nɛbukanasa la.

¹⁹ Mansɛ kumara anu dama la. Kɔnɔ Daniyɛli wo, Hananaya wo, Misiyɛli wo, anubɛ Asaraya, wonu kuma-nya ya a diya don mansɛ rɔ ka tenbi doi wonu na. Mɔgɔ nanɛ wonu kofura mansɛla mɔgɔ-banu ma.

²⁰ Mansɛ kɛ wa nyinikalɛ sa, ni wo ma, ka hɛnkili nyini tuma-wo-tuma, mɔgɔ nanɛ kɛnu si wo nya-yen ka tenbi nyɔ-bolo-tafɛlɛnnɛnu anubɛ nyɔ-durinu na nyamanɛ wo bɛɛ rɔ pirr!

²¹ Daniyɛli tora mansɛ fɛ bolɔn la nyɔ furr, ha Pasiya nyamani-tigi min tɔgɛ Sairasi ya Babilɔn nyamanɛ bi.