Kɔlɔsi 4 - ALLALA KUMƐ

¹ Wole yɔɔn-tiginu, koe min telennɛ anubɛ min bɛɛ kin, wo ni wo kɛ wola yɔɔnnu ye. Wo ni wo hɛnkili to kɛ ko bawo wole fanan tigi ye Arinyɛni tɔ.

Madiyali Kɛ-Koe

² Wo ni to madiyali kɛla dɛɛ! Wo hɛnkili-lakanɛ ni to baraka-birɛ la madiyalɛ rɔ Alla ye.

³ Wo ni Alla matara male fanan ye alako Alla ni fɛrɛ-nyimɛ di ma ma ka Kirasitila gbundu-koe lake nya min, ado ka a tɛgɛ wo le ma, n bi yele la kaka.

⁴ Wo ni Alla matara ko n ni kuma gbɛ rɔ iko a bɛnnɛ n ni kuma nya min.

⁵ Wo ni ma hɛnkilimɛnu na dɛnkɛninyabɛlɛnu bara la. Wo ye fɛrɛ min bɛɛ sɔrɔnna, wo kana wo tinya.

⁶ Wola kumɛ ni mɔgɔ hɛnɛ ka diya tumɛ bɛɛ. Wo ni mɔgɛ bɛɛ yabi a kilɛ fɛ.

Kɔndɔli Labannu

⁷ Ma na-kelen-nyɔgɛ Tikika, lanaya wɔli-kɛlɛ le ale la anubɛ ma wɔli-kɛ-nyɔgɛ Marita wɔlɛ kɛ rɔ. Wo le si n bara-koe-bɛɛ fɔ wo ye.

⁸ N bi a latala wo ma alako a ni ma wara-koe rakaran wo ye. Wo si wo yisi-kimɛ ma wara la.

⁹ Ma na-kelen-nyɔgɛ anubɛ lanaya-mɔgɛ Onɛsima ye tala a fɛ. Wo ta-nyɔgɛ le wo la. Koe min bɛɛ ye kɛla yan, anu si wo bɛɛ rakaran wo ye.

¹⁰ Aritaka min bi n dafɛ yele la yan, wo ye wo kɔndɔnna anubɛ Banabasi na-kelen-nyɔgɛ Maraka fanan. (N bara a fɔ wo ye nun ko a wa ke wo ma, wo ni a rabira a kin na!)

¹¹ Yasowa, anu bi min kelela ko Yasita, wo fanan ye wo kɔndɔnna. Minnu bi wɔlila n fɛ Allata mansayɛla ko la, Yahudiya le mɔgɔ sawɛ kɛnu denu na. Wonu bara n dɛnbɛ kati!

¹² Wo ta-nyɔgɛ Ɛpafarasi ye wo kɔndɔnna. Yisa Kirasitita wɔli-kɛlɛ le ale fanan na. A si a raya madiyalɛ ma wo ye tumɛ bɛɛ. A ye Alla matarala ko wo kanbalinɛ ni to sɔnɛ yiri, ka Alla sako bira koe bɛɛ rɔ.

¹³ A ye wɔli-gbɛlɛmɛ kɛla wobɛ Leyodisiya kɛnu ye anubɛ minnu bi Hayɛrepoli soe burɔ. Nde si ke wo sereyɛ bɔla le.

¹⁴ Ma diyana-bɛsi-bɔlɛ Luka anubɛ Dimasi ye wo kɔndɔnna.

¹⁵ Wo ni ma na-kelen-nyɔgɛnu kɔndɔn ma ye minnu bi Leyodisiya soe burɔ. Wo ni n na Nimifa kɔndɔn anubɛ chɔchi-mɔgɛ minnu bi tala ladɛn rɔ ala bɔn la.

¹⁶ Wo wa ban kɛdi kɛ karanna tumɛ min, wo ni a lata Leyodisiya chɔchi ma fanan. Anu fanan ni a karan. Leyodisiya kɛnu bi kɛdi min natala wo ma, wo fanan ni wo karan.

¹⁷ Wo ni a fɔ Akipasi ye ko a ara wɔlɛ min sɔrɔn Mari bolo, a ni wo ban de!

¹⁸ Nde, Pɔli ara kɔndɔli kɛnu sɛbɛ n nyɛrɛ bole la. Wo kana nyina ka a fɔ ko n kirinɛ yɔlɔkɛ la yele la yan! Allata hinɛ ni taran wo fɛ.