Emɔsi 9 - ALLALA KUMƐ

Ko-Rayira Loli Nyɔgɛ

¹ N ya Mari yen, a ya a lakɔɛnma saraka-bɔ-tinɛ dafɛ. A ko, “I ni Bato-Bɔn sɛnbɛrɛn-kɔn-kumɛnu gbesi alako dandan-kɔrɛ ra ni maga. Anu kumɛ ni bui mɔgɛnu kunyɛ ma.” A ko a mɔgɛ toe si faga kɛlɛ rɔ. Mɔgɔ-wo-mɔgɔ ti ke a burila. Bɛɛ si faga tɛrr!

² A ko hali minnu ba denkɛ sin fɔɔ lakira, a si wo bira nyɔ. Hali minnu yɛlɛta san ma pon, a si wo layigi dugi ma.

³ Ni minnu ya a dogon Kamɛli kɔnkɛ kuma, a ko a si a nyini nyɔ ha a ni wo yen. Hali minnu ya a dogon kɔgɔ-yi-dumɛ rɔ, a ko a si a fɔ ala yi-kɔrɔ-fen-makilanni-bɛ ye ko a ni wo kin.

⁴ Wo yogenu ba ta wo la biralɛ rɔ, a ko a si a ma, wo yogenu ni wo faga. A ko a ye wo kasara-koe le tɔ, wo kisi-ko ma de!

⁵ Ma Tigi Mari Sɛnbɛ-Bɛɛ-Tigi wa a kɔɛn tugu dugi la, a ra si maga. Nyɔ-sigilɛnu si di biribiri, ado dugu-kole mumɛ si yigi-ni-yɛlɛ kɛ iko Nayɛli bɛ si yɛlɛ ka sagan nya min.

⁶ Mari warɛ le ye san-kole kɔma pon! A ya dugu-kole kɛ tuwa-fen sigi san-kole kuma. A wa kɔgɔ-yi rakele san ma a si wo labɔn dugu-kole ma, ado a tɔgɛ le Mari!

⁷ Mari ko wole Isirɛla mɔgɛnu, wobɛ Sudan kɛnu takɛn a ya la. A ko a nara Filisitinu na ka bɔ Kariti yi-tɛma-dugi rɔ. A nara Siriyanu na ka bɔ Kira nyamanɛ rɔ. A ko a nara wole fanan na ka bɔ Iyipiti nyamanɛ rɔ wo nya na le.

⁸ A ko a kolan ye wole, hakɛ-tiginu na tolon! A si wo firan dugu-kole kɛ kuma. Kɔnɔ a ko a ti Yakoba kegeyɛ bɛɛ lato de!

⁹ A ko a wa a fɔ tumɛ min, Isirɛla mɔgɛnu ta si maga iko nyɔɛ wa kɛ fɛrɛ rɔ nya min. A ko a si anubɛ sibolo doinu funfan anu nyɔgɔn fɛ alako a yogenu si bɔ a kɛndɛnu ya la nya min.

¹⁰ A ko minnu ba a fɔ ko, “Alla ti sɔn ko-wo-ko ni male dumɛ,” hakɛ-tigi wonu kunyɛ si to kɛlɛ rɔ.

Isirɛla Mɔgɛnu Sɛgi-Koe Anu Diyɛ Rɔ

¹¹ Mari ko tele wo ye nala, Mansa Dawudata bɔn min manɛ tonbɔn la, a si wo sɔ a kurɛ la. A si ala dandannu sɔ tun ka wo bɛɛ rabɛn iko a ye nya min fɔlɔ nun.

¹² A ko Idɔm nyamani-toe min tora a bibɛlɛ nun, ata Isirɛla mɔgɛnu si wo fanan nɔ ka anubɛ sibole doinutɛ ma anutɛ la. Mari ko a nyɛrɛ gbɛ le wo bɛɛ la.

¹³ Wati ye nala, fui-fen-tɛgɛlɛnu ti ke fui-fan tɛgɛla siyayɛ bolo. Kɔn-gbɔ-yi-bɔlɛnu ti ke a yi bɔla siyayɛ bolo. Wo yi-diyamɛ si to bɔla kɔnkɛnu tɔ iko gbɔrɔn-gbɔrɔnna-yi.

¹⁴ Mari ko a si ala mɔgɛnu nasɛgi anu halala-dugi ma. Anu si anuna so-tinyanɛ sɔ tun ka anu sigi nyɔ. Anu si kɔlɔmanu ki ka anu gbɔɛ dɔn. Anu si ki-fannu ki ka wo fanan dɔn.

¹⁵ A ko a si ala mɔgɛnu ki anu halala-nyamanɛ rɔ. A ko anu ti wurun nyɔ ma tun. Mari kan le wo la.