Emɔsi 8 - ALLALA KUMƐ

Ko-Rayira Nani Nyɔgɛ

¹ Allatala ya ko-rayirɛ min yira n na, wo le kɛ la. N ya sende-lafanɛ yen kɔn-gbɔ-mɔɛ la.

² Mari ya nde, Nɛbi Emɔsi manyinika ko, “I ya nfen yen?” N ya a fɔ a ye ko, “Sende le, kɔn-gbɔ-mɔɛ ye a rɔ.” Woletɔ Mari ya a fɔ n ye ko, “Iko kɔn-gbɔɛ kɛ mɔnɛ ye nya min kɛ la, Isirɛla mɔgɛnu kasara-wati ara mɔ wo nya na le.” A ko a ti a fonde yɛlɛma mumɛ fɔ a wa wo kasara le.

³ Wo tɔrɔya-tele wa ke tumɛ min, musinu bi sewa-sigi minnu sala mansɛta bɔn la nun, sigi wonu si yɛlɛma saya-di-kɛ-kan la. Anu si a fɔ ko, “Furinu bolokanɛ belenna kan tinɛ bɛɛ rɔ. Ma ni ma rade wona.”

Isirɛla Nyamanɛ Kasara-Koe

⁴ Wole mɔgɔ bolo-labira-yilanu, wo ni wo tole masɔ Marita kumɛ la. A ko wo ye bolo-kolɔnnu bira boloko-yogomɛ-kɛla. Anu faga-sɔgɛ ye wo la.

⁵ Wo ye gbaranna wo nyɛrɛ la, wo ye a fɔla ko, “A sɔgɛ ye ma la, tele-sɛnimɛ kɛnuna wati ni ban tiriya, alako ma ni sɛgi mala yilaya-kɛ-tinɛ. Sulen-Tele kɛ wa ka-a-la, ma si don mala fen-mayirɛnu tɔ tun. Ma si mala fan dɛ gbɛlɛya. Ma si mɔgɛnu kensunya fen-suma-tinɛ. Ma si mɔgɛnu kensunya fannuna gbiliyɛ rɔ fanan.

⁶ Ma si dɔn-fen-tinyanɛnu dɛ lagbɛlɛya mɔgɛnu kuma. Fɛlɛtenɛ minnu ti ke sanbara-sɔnkɛ sɔrɔnna, ma si wonu nyini ka anu dɔndɔ alako ma si anu ma yɔɔnnu na nya min ka anu mayira bawo anu ti ke yili-sarɛ wonu sɔrɔnna.”

⁷ Wole fɛlɛtenɛnu, Isirɛla mɔgɛnuta Mari Alla ya lanyiri kiri wo ye a kila-bɛrɛbɛrɛ fɛ. A ko a ti nyina yila wonuna ko-yogomɛnu ko mumɛ!

⁸ A ko a si dugi layɛrɛyɛrɛn wo la ha wo ni kilan. Dugi wo si yɛlɛ wo la ka yigi iko Nayɛli bɛ si fa nya min ka sagan.

⁹ Wo wati ye nala, tele si fin tele-latelen-wati rɔ, wo kɔma, pinpi si burun wo kuma.

¹⁰ Wo si wo kundɛn wola sewa-tele minnu ma, Mari si tele wonu ma di-kɛ-tele la. Mari ko a si wola sewa-siginu yɛlɛma yisi-magboya-siginu na. A si a ma, wo ni wo kunyɛ gbana ka kasa-kurɛnu don wo kan na. A si kunaya wole, Isirɛla mɔgɛnu kuma iko mɔgɔ-kɔrɔyanɛla den kelan wa sa. A si gbɛlɛya wo kuma ha wola tɔrɔya-wati da ni fa.

¹¹ Mari ko wo wati ye nala, a si kɔnkɔ-fitinɛ lana wole, Isirɛla mɔgɛnu kuma. Kɔnkɛ si wo bira, hali fen-dɔn-kɔnkɔ ma. Wo kan la si gbala hali yi-ko-sɔgɔ ma. Kɔnɔ kan-nagbalɛ anubɛ kɔnkɛ minnu bi wo birala, wo le Marita kibara-nyimɛ lamɔɛn-koe la. Allatala nyɛrɛ-nyɛrɛ kuman-kan le kɛ la. A ya a fɔ tun ko

¹² wo kɔndɔfilinɛ si duninya tɔnkɔn nanɛ bɛɛ ratagama Marita kibara kelan kɛ nyinina kɔnɔ wo ti a yen mumɛ!

¹³ Hali wola fonike minnu tagbɛlɛ, wonu si belenna buila kan-nagbalɛ bolo.

¹⁴ Wo ye tola tala Samariya bɛsɛnu bara wo dɛnbɛn-koe rɔ. Wo ye belenna wo gborola Dan kegeyɛnuta bɛsɛ rɔ. Wo ye tagamana min kɛ ka ta Biri-Siba, wo ara wo yigi sa wo kuma. Kɔnɔ fufafu le wo la. Mari ko a si wo labui. Wo ti ke wo lasɔla tun.