Emɔsi 5 - ALLALA KUMƐ

Saya-Ko-Sigi Sa-Koe Nɛbi Emɔsi Bolo

¹ Nɛbi Emɔsi ko, “Wole Isirɛla mɔgɛnu, n bi nala saya-ko-sigi min sala wo kuma, wo ni wo tole masɔ wo la.

² “Hali wole Isirɛla mɔgɛnu tagbɛlɛ nun, wo ara bui kɛlɛ bolo fugbu, ado wo ti ke wo lasɔla tun. Wo bolokanɛ taranta wo halala-nyamanɛ kɛ rɔ, ado mɔgɛnuna ko ma taran wo wara-koe rɔ.

³ “I ma a yen, Allatala ko, ‘Ni wole Isirɛla mɔgɛnuna kɛlɛ-dan waga kelen tara kɛlɛ rɔ, mɔgɔ kɛmɛ dɔrɔn si sɛgi. Ni soe min ya mɔgɔ kɛmɛ lata, mɔgɔ tan dɔrɔn si sɛgi.’ ”

Isirɛla Mɔgɛnuna Kisi Kilɛ

⁴ Nɛbi Emɔsi ya Mari kuman-kan latenbi Isirɛla mɔgɛnu ma ko, “Ni wole si wo gbɛrɛn ale Mari ma, wo si kisi.

⁵ Mari ko wo kana ta Kiligali a bato tinɛ tun iko wo duruta a mala nya min nun fɔlɔfɔlɔ bawo nyɔ si ma don-dɛ la wo ye ka don yɔɔnyɛ rɔ. Wo kana ta Bɛtɛli soe fanan tɔ min tɔgɔ-kɔrɛ le ‘Marita Bɔn’ bawo nyɔ si ma nyinɛnuna bɔn la. Hali wo ma ta Biri-Siba ka Mari bato wula-yan la.

⁶ Yanni wo ni wo damasi ma, wo ni wo gbɛrɛn Mari ma. A si wo kisi. Ni wo ma sɛgi Mari ma, a si yigi wo kuma iko tɛ. Tɛ wo si Bɛtɛli mintan. Mɔgɔ-wo-mɔgɔ ti ke tɛ wo ladufenna.

⁷ “Bawo wo ye ko-telennɛnu tadula ka mɔgɛnu kensunya anu halala-fannu kuma, woletɔ Mari ko a ara a ban wo la ka wo kasara.

⁸ “Alla ya lolenu nadan ka anu sigi-tinɛnu tabɛn san-kole rɔ iko a di a ye nya min. Ale le ye suyi yɛlɛmana tele la. Ale le ye tele yɛlɛmana suyi la. Ale le ye yi layɛlɛla san ma ka a labɔn dugu-kole kuma. Ale Mari nyɛrɛ-nyɛrɛ le ye wo mala.

⁹ Minnu tagbɛlɛ, ale le ye wonu kasarala pɔ! Anuna kisi-bɔn minnu sɔnɛ fanka rɔ, ale le ye wonu tinyana.

¹⁰ “Minnu bi ko-latelennɛnu kɛla kiti-sa-tinɛ, wonubɛ tonya-fɔlɛnu sɔgɔ-labɔnɛ wo la lass!

¹¹ Wo ara bolo-kolɔnnu tɔrɔ ka anuna dɔntɛnu bi anu bolo fufafu! Wo ara wo ma min kɛ, woletɔ Mari ko wo ara bon-hakikɛ minnu sɔ, wo ti don anu na. Wola ki-fen-hakikɛ minnu bi wo bolo, wo ti wonu dɔn.

¹² Mari ko a ya a lɔn wola hakɛnu yogo nya min. Wo ara ko-yogomɛ minnu nyɔgɔn ma, a ya wo bɛɛsi lɔn. Mɔgɔ-nyimɛ minnu bi wo tɛma, wo ye wonu bɛnsɛnkɔninyala ka anu tɔrɔ. Wo ye dogonta-fan birala mɔgɛnu bolo. Wo ye a mala, bolo-kolɔnnu ti yo sɔrɔn hali tonyɛ ye anu bolo.

¹³ Bawo a ma-kunya sa wole, mɔgɔ-tɔrɔnɛnu bolo, wo ni wo rade ka wo munyu anu kɔrɔ.

¹⁴ “Wo ni wo raya ka to ko-latelennɛ kɛla. Wo ni wo fara ko-yogomɛnu na. Wo si a ma, wo si simayɛ sɔrɔn. Ni wo ya wo ma, wota Mari Sɛnbɛ-Bɛɛ-Tigi si to wo fɛ iko wo ye wo wasila a la nya min ko a ye wo fɛ.

¹⁵ Koe min yogo, wo ni wo kɔn. Koe min telennɛ, wo ni wo keni. Wo ni wo raya alako ko-latelennɛ ni kɛ kiti tɛgɛ tinɛ. Tumado Isirɛla mɔgɛ toe min tonɛ, mata Mari si kinikini wonu ma.

¹⁶ “Allatala ko ka a tɛgɛ wola sɔn-yogomɛnu ma, wole mɔgɔ-yogomɛnu si faga. Mɔgɛnu si di-kɛ-kannu namɔɛn soenu kuma belenna. Anu si ta fɛlɛtenɛnu kele anuna sɛnɛnu tɔ alako anu ni na kofu mamusu-dɔn-kɛlɛnu ma wole, mɔgɔ sɔn-yogomɛnu saya-di-kɛ-tinɛ.

¹⁷ Hali wola ki-fannu-nadɛn-tinɛ, wo si sewa kan min, di-kɛ-kan si to bɔla nyɔ. Wo dama ye mala bawo Mari si na wo tɔrɔ tinɛ. Mari nyɛrɛ-nyɛrɛ le ya wo fɔ.”

Isirɛla Mɔgɛnu La-Koe Bɛsɛ La

¹⁸ Nɛbi Emɔsi ya Mari kan latenbi, “Wo ko a sɔgɛ ye wo la, Mari ni na wo kiti kɔnɔ hali wo, a si gbɛlɛya wo kuma. Wo si tɔnɛ nyamintan sɔrɔn wo wati rɔ. Wo tele si ma tɔrɔya-tele la. A ti ma tele-nyimɛ la wo ye.

¹⁹ Wo si ma iko kei min bi a burila yarɛ kɔrɔ ka ta bɛn suluki la. A wa a buri wo fanan kɔrɔ tumɛ min ka ta ala bɔn la alako a ni kisi, a wa a gbɔnkun ala bɔn rɔ, gbanwore fanan si a kin.

²⁰ Mari wa wuli wole, Isirɛla mɔgɛnu kitila lunyɛ min, wo tele si ma tele-yogomɛ la wo ye? Tɔrɔyɛ si burun wo kuma wulɔn tele rɔ bɛff, iko pinpi, hali bo-kɔinkian-mɛlannu, wo ti anu yen wo yɛ la.

²¹ “Mari ko wola ladɛn-sɛnimɛnu sɔgɔ-labɔnɛ le a la ka lass! Wo fenfen ma di a ye.

²² A ko hali wo nara wola saraka-mintantɛnu anubɛ wola dɔn-fen-sarakɛnu na a ye, a ti sɔn anu na muk! Hali wo nara wola kolo-fen-tɔlɔnɛnu na Mari ye, a ko a bɔrɔ ti taran a ye.

²³ Mari ko wo ni wo fara sɔnkɔ-sɔnkɔ-siginu sala a bato-koe la. Wola serema-kan, wo manɛ le a ya la fufafu!

²⁴ Yanni wo ni wo ma, wola ko-latelennɛnu ni wara iko bɛ wa yanbɛ gbesi, a ma ti sagan mumɛ!

²⁵ “Wole Isirɛla mɔgɛnu, Mari ko wo ye wulɛ rɔ san bi-nani kɔrɔ tumɛ min, wo ya wola sarakɛnu anubɛ kɔ-fan minnu di Mari ma, wo ma anu di a ma wo yisi bɛɛ la.

²⁶ Wo hɛnkili ye wola bɛsɛnu ma minnu tɔgɛ Molɛki anubɛ Saiyun bawo wo tora yilan-yilanna wola bɛsɛ kɛnu na wo bolo. Woletɔ Mari ko

²⁷ a si wo don yɔɔnyɛ rɔ wo yogenu bolo Damasika soe kɔma. Mari Sɛnbɛ-Bɛɛ-Tigi kuman-kan le kɛ la.”