Emɔsi 3 - ALLALA KUMƐ

¹ “Woletɔ wole Isirɛla mɔgɛnu, a ya wole min nana ka bɔ Iyipiti, kɔni, Mari ye nala kumɛ min fɔla wo kan ma, wo ni wo tole masɔ wo la.

² Mari ko wole Isirɛla mɔgɛnu di ale ye ka tenbi sibole bɛɛsi la duninya rɔ. Mari ya wole le dɔrɔn yabɔ ka wo fɛ-bira. Wo le ya a ma, wola hakɛ ara yogoya a ya la dɔgɔma-ma-de! Woletɔ a ko a fɛrɛ sa fɔ a wa wo tɔrɔ.”

Nɛbiya-Kumɛnu

³ Nɛbi Emɔsi ko tun ni mɔgɔ fila ma anu tabɛn tagamanta ta-koe rɔ, anu si ke tala anu nyɔgɔn fɛ, wa?

⁴ Yarɛ si wɔrɔndɔ wo nya na ni a ma kɛ fen ma? Yarɛ si wɔrɔndɔ-wɔrɔndɔ faran la ni a ma fen bira, wa?

⁵ Mɔgɛ si kona taran kose la ni i ma dɔn-fan sa nyɔ? Gbɛrɛ la si foo a nyɛrɛ ma ni fan do ma a lafoo?

⁶ Kɛlɛ-buri si fɛ soe burɔ, a ni to, mɔgɔ ma kilan? Soe do si halaki a nyɛrɛ ma, ni Mari ma sɔn min ma?

^7-8 Ni yarɛ wɔrɔndɔra, mɔgɔ kuma ti kɔ, wa? Allatala ti ko-wo-ko ladan a ti min kɔrɛ fɔ male nɛbinu ye. Woletɔ ni Allatala kumara, male nɛbinu ti a kuman-kan latenbi, wa?

Isirɛla Mɔgɛnu Halaki-Koe

⁹ Nɛbi Emɔsi ya Mari kuman-kan natenbi Iyipiti mansɛ ma anubɛ Filisitinuna mansɛ ma min siginɛ Asadadi soe rɔ. A ko, “Mari ko nyamani-kun filɛ kɛ mɔgɛnu ni anu nadɛn kɔnkɛnu kuma Samariya soe dafɛ ka anu yɛ bɛn Isirɛla mɔgɛ wonu ma, anu bi ko-yogoma-sifa minnu mala.

¹⁰ “Mari ko wo si a yen, anu bi anuna bon-hakikɛnu nafala kankanya-fannu na. Anu bi buila mɔgɛnu ma ka fan wonu bi anu bolo. Anu ma telenbagaya-kilɛ lɔn muk!

¹¹ Tamayi-wo-tamayi sa a rɔ, anu yogenu si na ka anuna nyamanɛ bira-a-la. Anu yogenu si anuna tarɛnu tugu a ma ka anu keri ka anuna bɔnnu tii.”

¹² Ni saga-fɛ-biralɛ si ke saga-woro kolo filɛ wa a tolo-lafɛlafɛ bila yarɛ dɛ la, mani Samariya kɛnu Isirɛla mɔgɛnu, kɔni, wonu si ke anu burila anu yogenu kɔrɔ, ado anu sanɛ anuna sa-fen kiannu na anu kin kɔrɔ.

¹³ Mari Sɛnbɛ-Bɛɛ-Tigi ya a fɔ ko wo ni wo tole masɔ ka Yakoba kegeyɛnu makawandi.

¹⁴ Wo ni a fɔ anu ye ko Mari wa na anu tɔrɔ tinɛ tumɛ min anu hakɛla ko la, a si anuna saraka-mintan-tinɛ tinya min bi Bɛtɛli soe burɔ. A si anuna saraka-mintan-tinɛ bolon nanɛ keri, mɔgɛnu si anu dun min na anu niyi kisi-koe la.

¹⁵ Mari ko a si anuna bɔn damasi tinya, a mara a kinama la wo, a mara a dɔgɔma la wo. Hali anuna bon-hakikɛ minnu tabɛnnɛ sogo-ba-nyin-malɛsɛnɛnu na, wo damasi si tinya pɔ!