Aiseya 9 - ALLALA KUMƐ

¹ Anu sɔrɔn-kila fenfen sa tɔrɔya-sufa kɛ la. Sɛbulɔn anubɛ Nafatali nyamanɛnu bi yarabiyi kɔrɔ fɔlɔ nun kɔnɔ tumɛ do si ke, nyamanɛ kɛnu si taran gbiliyɛ rɔ. Ka a fɔlɔ Mɛdetereniyan kɔgɔ-yi ma ha ka ke Yorodan bɛ kɔgɔma, hali Kalili nyamanɛ sundannu bi min tɔ, wo dama si taran gbiliyɛ rɔ.

Mansɛ min Bi Nala Yarɔ, Wo Wara-Koe

² Mɔgɛ minnu bi tagamana pinpi-fin-bɛ rɔ nun, wonu bara wan-takana-wɛ yen. Anu siginɛ pinpi-makilanni-bɛ rɔ nun kɔnɔ kaka, tele ara fɛrɛn anu ma.

³ E, Mari, i wara anu sewa-koe kɛ anu ye. I wara min ma anu ye, wo ara a ma, anu bara nyagalen dɔgɔma-ma-de iko fui-fen-tɛgɛlɛnu. Ni wo ma, iko kɛlɛ-dan bi fan minnu sɔrɔnna kɛlɛ rɔ, anu tenbi wonu farala.

⁴ Mari, i wara dunu-gbilima-wɛ bɔ anu kuma. I wara gbɛn da sawɛ bɔ anu kɔma. Sibolo-gbɛrɛ minnu bi anu yakɔrɔ-mamɔla, i wara wonu nabui anu kɔrɔ. I wara anu nabui iko i ya Midiyan kɛlɛ-dannu nabui nya min nun kɔrɔma la.

⁵ Wola kɛlɛ-dannuna sanbarɛnu anubɛ yele ye duruki minnu ma, wo bɛɛ ye mintanna le gburr!

⁶ Dan do si sɔrɔn ma ye! Den-kei dinɛ ma ma! Wo si ma mala kun-tigi la. Anu si a kele ko Makawandili-Kɛlɛ-Makawanɛ anubɛ Alla Sɛnbɛ-Bɛɛ-Tigi anubɛ Habadan-Fa anubɛ Yisi-Kima-Mansɛ.

⁷ Ata mansaya-dan sa. Yisi-kimɛ le ye ata mansayɛ rɔ burubukai! A si mansayɛ kɛ a kebila Mansa Dawuda gbɛ rɔ. Ka a bi wo wati ma ha tumɛ min di Alla ye, ata mansaya-sɛnbɛ le tɔn-birɛ anubɛ telenbagayɛ la. Mari Sɛnbɛ-Bɛɛ-Tigi ara a wakila wo kɛ-koe ma.

Isirɛla Tɔrɔ-Koe Mari Bolo

⁸ Mari ara ban Isirɛla nyamanita-mɔgɛnu yilikila, Yakoba kegeyɛnu, kɔni.

⁹ Isirɛla mɔgɛ damasi si a lɔn yati, ko Alla ara anu yiliki katarala minnu siginɛ Samariya soe burɔ, ado kaka, anu sa ko-wo-ko kun na fɔ kɔgɔ-ratugu anubɛ wasinteyɛ. Anu bi a fɔla ko,

¹⁰ “Mala bɔn minnu dannɛ bɔnku-bulɔku la, wonu bara bui, woletɔ ma ye anu yɛlɛmana kuru-bɔn la. Kɔlɔma minnu manɛ bon-gbaran la, denkerenafan le wonu na. Ma si wonu yɛlɛma yalɛ la.”

¹¹ Mari ara anu yogenu nawuli anu kan ma.

¹² Siriya minnu bi tele-bɔɛ wara la anubɛ Filisiti minnu bi tele-yigi wara la, wonu bara anu dɛ sa-a-ma fagba, Isirɛla mɔgɛnu dɔn-koe la. Kɔnɔ hali wo, wo ti a ma, Marita fondo-bɔɛ ni ban. Ha bi, Mari kɔɛn kɔrɔbinɛ anu tɔrɔ-koe la.

¹³ Hali Mari Sɛnbɛ-Bɛɛ-Tigi ara anu tɔrɔ, Isirɛla mɔgɛnu ma anu sɔ anu hakɛ la, ado anu ma sɔn anu ya-lamununna a la.

¹⁴ Mari si Isirɛla kun-tiginu anubɛ anuna mɔgɛ toenu tɔrɔ tele kelen kɔrɔ. A si anu kunyɛ anubɛ anu kɔɛ tɛgɛ a la gbat!

¹⁵ Kina anubɛ mɔgɔ-ba minnu gbiliyanɛ anu bolo, anu kunyɛ le wonu na. Anu kɔɛ le nɛbi-foninya-fɔlɛnu na.

¹⁶ Wonu minnu bɛnta ka kila-telennɛ yira mɔgɛnu na, anu ma wo ma fɔ ka kila-radunɛ yira anu na alako ka mɔgɛnu kɔndɔfili pirikali!

¹⁷ Woletɔ Mari ti sɔn kemini-mɛsɛ wo fenfen kunyɛ ni bɔ a rɔ muk! Hali kelennɛnu anubɛ kɛɛ-nyaganɛnu, a ti kinikini wonu ma bawo Alla-lɔnbɛlɛ anubɛ karagbɛlɛ le mɔgɛ damasi la. Anu darɔ-kan bɛɛ yogo. Kɔnɔ hali wo, wo ti a ma, Marita fondo-bɔɛ ni ban. Ha bi, Mari kɔɛn kɔrɔbinɛ anu tɔrɔ-koe la.

¹⁸ Mɔgɛnuna wunduyogoyɛ ye mintannɛ kɛla iko tɛ tenbi wɔnɔ-fira-gbalanɛ la. A si mintannɛ kɛ fanan iko tɛ tenbi kala-gbalɛ la. A sisi si yɛlɛ kulakula!

¹⁹ Mari Sɛnbɛ-Bɛɛ-Tigita fondo-bɔ-belebele kɛ si mintannɛ kɛ ka nyamanɛ mumɛ bɛɛ mintan gburr! Mɔgɔ-wo-mɔgɔ ti a nyɔgɔn denkun. Bɛɛ paraparɛ si ta a kun fɛ.

²⁰ Anu tara kan-bo-kan, anu si dugu-matɔnbɔn-kɛ kɔnɔ hali wo, anu buyi ti fa. Hali anu sɔrɔn-den-bɛrɛ, anu si a dɔn.

²¹ Hali Manasa kegeyɛ anubɛ Ifɛrɛm kegeyɛ si anu nyɔgɔn kɛlɛ. Wati do wa ke, anu na si kofu ka Yuda kɛnu kɛlɛ. Kɔnɔ hali wo, wo ti a ma, Marita fondo-bɔɛ ni ban. Ha bi, Mari kɔɛn kɔrɔbinɛ anu tɔrɔ-koe la.