Aiseya 8 - ALLALA KUMƐ

Aiseyala Dan Ma-Koe Tamasere la Mɔgɛnu Ye

¹ Mari ya a fɔ nde, Aiseya ye tun ko n ni walan-belebele do bi ka sɛbɛli gbode-gbode do kɛ a ma. A ko n ni a sɛbɛ ko, “Kankan anubɛ bumalɛ si na tiriya!”

² N lanɛ mɔgɔ fila minnu na, Saraka-Masɔla Yuraya anubɛ Yɛbɛrɛkiyala den Sakaraya, kɔni, a ko n ni wonu kele. Wonu ni ma n sere la.

³ A ma mɛ, nna musi ya buyi bi. Den-kei wo sɔrɔn nna musi bolo, Mari ko n ni a tɔgɔ sa “Kankan anubɛ Bumalɛ Si Na Tiriya!”

⁴ A ko yanni dan wo ni kusanya a fa anubɛ a na rakelela, a ko wo si a taran, Asiriya mansɛ ara ban Damasika fen-kolomɛnu kankanna anubɛ Samariya fen-kolomɛnu ka ta anu na a warɛ.

Asiriya Mansɛ Wuli-Koe

⁵ Mari kumara n ye tun. A ko

⁶ ale Mari manɛ iko Silowa tenke min bi yigila a fɛrɛma. Mɔgɛnu bara anu ban tenke wo la min kɛ ka kilan Mansa Risen anubɛ Mansa Peka la,

^7-8 a ko ale Mari si Asiriya mansɛ anubɛ ala kɛlɛ-dannu nana Yuda nyamanita-mɔgɛnu kan ma. A ko wole Yuda kɛnu si to kɛlɛ tɛma Yuda nyamanɛ rɔ iko Yufereti bɛ wa yanba gbesi ha ka ke mɔgɔ kanban-kunyɛ ma. Hali wo, Alla ya a kɔɛn lafulen Yuda nyamanɛ kuma ka nyamanɛ wo bɛɛ to a kanban kɔrɔ bawo ale Alla ye ma fɛ.

⁹ A ko wole sibolo-gbɛrɛnu, wo ni wo ladɛn kilan bolo. Wole minnu bi duninya-dan la pon, a ko wo ni wo tole masɔ. Hali wo rabɛnnɛ kɛlɛ-koe la kɔnɔ wo kun ma si kɔ kilan bolo.

¹⁰ A ko wo ni wo raya ko-rabɛn tinɛ kɔnɔ ko ti bɔ a rɔ. A ko wo ni kuma iko a di wo ye nya min kɔnɔ wo bɛɛsi fufafu bawo Alla ye ma fɛ.

Nɛbi Makawandi-Koe Mari Bolo

¹¹ Mari ya n makawandi ata sɛnbɛ-makawanɛ la ko n kana n sanka mɔgɛnu ma. A ko

¹² n kana kofu mɔgɛnu ma kɛwuyɛ rɔ. A ko anu kilannɛ min na, nde kana kilan wo la.

¹³ A ko n ni n hɛnkili to ale Mari Sɛnbɛ-Bɛɛ-Tigita sɛninyɛ ko. A ko a bɛnta, n ni kilan ale le dɔrɔn na.

¹⁴ Ka a tɛgɛ ata sɛninya-makawanɛ ma, a ko ale si ma kuri la, mɔgɛnu si anu kian latugu min na. A ko a si ma gbɛrɛ fanan na min si Yuda anubɛ Isirɛla anubɛ Yerusalɛm kɛnu bira.

¹⁵ Mɔgɛnu si anu kian latugu ka bui. Anu ta ni sɔnsɔn. Anu si bira gbɛrɛ la.

Yi-Kɔrɔ-Fɛlɛnnɛnu Makawandi-Koe

¹⁶ Nna karan-dannu, Mari ya sarakanɛ minnu don n bolo, wo ni kumɛ wonu namara kan tinɛ do rɔ yanba ti yalan anu ma kan min.

¹⁷ Hali Mari ara a dogon ala mɔgɛnu ma, nde lanɛ ale la bawo n yigi le ale la.

¹⁸ Ale Mari ara dan minnu di n ma, mabɛ wonu bi yan. Mari Sɛnbɛ-Bɛɛ-Tigi min bi Yerusalɛm kɔnkɔ-sɛnimɛ kuma, wo le ya ma ma sarakani-sɛnimɛ la Isirɛla mɔgɛnu ye.

¹⁹ Mɔgɛnu bi a fɔla wo ye ko wo ni yi-kɔrɔ-fɛlɛnnɛnu manyinika alako wo ni hɛnkili sɔrɔn anu bolo, ado anu bi huma-humana dɔrɔn. Mɔgɛnu bi a fɔla ko, “A kin mɔgɛnu ni furi manyinika kɛndɛwagɛnuna ko la.”

²⁰ Wole ni mɔgɛ wonu yabi ko, “Mari ye min fɔla ma ye, ma tole masɔnɛ wo le la.” Wo kana wo tole masɔ yi-kɔrɔ-fɛlɛnnɛ wonu kan la bawo wonu bi min fɔla wo ye, wo ti ko-wo-ko nyinya wo ma.

Tɔrɔya-Wati Wara-Koe

²¹ Mɔgɛnu si to yilan-yilanna nyamanɛ rɔ bawo anu kɔnkɔtoe, anu yigi la ara tɛgɛ. Wo si a ma, anu ni anuta mansɛ anubɛ anuna bɛsɛnu danka yisi-bɔɛ bolo. Hali anu ya anu yɛ sigi san-kole kɔrɔ

²² anubɛ ka anu yɛ gbala dugi la, anu ti fenfen yen fɔ tɔrɔyɛ anubɛ pinpi. Anu bi tala kan min, anu ti fenfen taran nyɔ fɔ pinpi-makilanni-bɛ.