Aiseya 65 - ALLALA KUMƐ

Murutinu Tɔrɔ-Koe Alla Bolo

¹ Mari ko a ara a nyɛrɛ yira mɔgɛ donu na minnu sa a nyinina lefan! Minnuna ko sa ala ko rɔ, a sɔnta ko wonu fɔlɔn fɔlɔn ni a yen. Sibole minnu sa a batola, a ya a fɔ wonu ye ko, “Wo ma n yen? Nde le ye wo dɛnbɛna.”

² A ko telen-gbɛn, a kɔɛn rasiginɛ mɔgɔ-murutiyanɛ wonu ye. Minnu bi sɛgila a ma, a rabɛnnɛ wonu tabira-koe la. Kɔnɔ anu kɛ-nya manɛ nya min, wo ma kin. Min ba diya anu ye, anu bi wo le mala.

³ A ko anu bi anu tuila ka ko-latinyanɛnu nadan iko a ya sa anu na. Anu bi sarakɛnu bɔla anuna bɛsɛnu ye anuna kan-tina-hakikɛnu tɔ. Anu bi isɛnti mintanna kan-tina-hakikɛ rɔ.

⁴ Anu bi anu sigila kaburu-soenu tɔ. Anu bi kila nyɔ alako anu ni kuman-kan-kɛndɛ sɔrɔn furinu bolo. Anu bi sogo-haramunɛnu dɔnna. Anuna dagɛnu kɔgɔ donnɛ kisimiriya-sogo sufa kɛnu na.

⁵ Kɔnɔ anu bi a fɔla donu ma ko, “Wo ni wo masɛgi ma la. Ma sɛninyanɛ ka tenbi wo le la.” Mari ko mɔgɔ-sufa wonu mani de iko ta-sisi tenbi a lagbesila a sunyɛ rɔ. A ko a diminyɛ min kɛnɛ wonu ma, wo mani de iko ta-dufenbɛlɛ.

⁶ A ko wo ni wo yɛ lata min sɛbɛnɛ a yakɔrɔ. A ti ke a muinna wo ma. A si a tayili sara wo bɛɛ la. A si wo tɔrɔ wo hakɛla ko la.

⁷ Ka a tɛgɛ wo benbanu hakɛ anubɛ wo hakɛ ma, Mari ko a si wo tɔrɔ. Wo benbanu ya isɛnti mintan bɛsɛnu ye kɔnkɛnu kun tɛma. Anu ya a ma, a miliyara kɔnkɛnu ye. Woletɔ a ye anu tɔrɔla iko a bɛnta, anu ni tɔrɔ nya min.

⁸ Mari ko fananta nɔnbɔ-gbɔ-yi ye a gbɔɛ rɔ, mɔgɛ ti anu tinya bawo anu ya a lɔn ko tɔnɛ ye nɔnbɔ-gbɔɛ wo rɔ. A ko ala wɔli-kɛlɛnu fanan bi wo nya na le. A ti anu nato.

⁹ A si a ma, Yakoba kegeyɛ donu ni to a niyi la. Ata kɔnkɔ-nyamanɛ ni ma Yuda bɔnsɔn donuta kɛɛ la. A si mɔgɛ donu yabɔ minnu si sigi nyɔ. Ata wɔli-kɛlɛ wonu si to sigini nyɔ rɔ.

¹⁰ Wo kɔma, a ko Sarɔn lɛɛ si ma sagɛnu de-nyini tinɛ la. Ekan lɛɛ si ma ninkinu daga makɛ tinɛ la. Mɔgɛ minnu bi bilala ale Mari fɛ, ninki wonu si ma wonu halalɛ la.

¹¹ Mari ko wole minnu bara wo kan-kɔ sɔ ale Mari la, wo si tɔrɔ bawo wo ara nyina ata kɔnkɔ-sɛnimɛ ko. Wo ye bɛsɛ minnu kɔla, kelan tɔgɛ le, “Hɛrɛ.” Wo ye doi min kɔla, wo fanan tɔgɛ le, “Ko-latɛgɛnɛ.”

¹² Mari ko ko-latɛgɛnɛ wo si ma wo ye faan la. Wo dama si wo kan panparan kan-natɛgɛlɛ ye. Ni i ya a yen, kɛ ye mala wo la bawo Mari ya wo kele min kɛ, wo ma a denkun defan! A kumara wo ye kɔnɔ wo ma wo tole masɔ a la. Koe minnu ma kin, wo ni wo fara wonu na. Wo tora wo gbɛ wonu denu da la, ado wo ma ale Mari hɛnɛ.

¹³ Woletɔ Mari Alla ya a fɔ ko Ata wɔli-kɛlɛnu si to anu buyi lafala kɔnɔ kɔnkɛ si to wole karagbɛlɛnu forongbanna. Ata wɔli-kɛlɛnu si to yi minna kɔnɔ wole karagbɛlɛnu sɔn ma si to gbalala yi-ko-sɔgɛ bolo. Ata wɔli-kɛlɛnu si to sewala tolon! Kɔnɔ miliyɛ ti bɔ karagbɛlɛnu kuma.

¹⁴ Ata wɔli-kɛlɛnu si to a lawɔyɔla sewɛ bolo ka a tɛgɛ ko-nyimɛ min bi anu sɔndɔmɛ rɔ. Kɔnɔ wole karagbɛlɛnu ya-denkɛnu ta ti gbala yisi-tinya bolo. Wole karagbɛlɛnu si wo dɛ sa-a-rɔ lungbɔn!

¹⁵ Wole karagbɛlɛnu tɔgɔ-ratɛgɛ mani de ala wɔli-kɛlɛnu bolo iko mɔɛn, ado ale Mari Alla nyɛrɛ le ye wo fagala. Kɔnɔ ale si ata wɔli-kɛlɛnu kele tɔgɔ-gbɛrɛ la.

¹⁶ Nba, min ya duwɛ sɔrɔn dugi ma, wo tigi ara duwɛ sɔrɔn Alla, tonya-tigi le bolo. Ni min ya a gboro dugu-kole kuma, wo tigi ara gboro Alla tonya-tigi le tɔ. Kɛnu bara ma bawo ma la ara nyina tɔrɔya-kɔrɔmɛnu na. A ko a si tɔrɔyɛ wonu masɛgi wo la.

San-Kolo-Kurɛ anubɛ Dugu-Kolo-Kurɛ Wara-Koe

¹⁷ Mari ko a si san-kolo-kurɛ anubɛ dugu-kolo-kurɛ dan. A ko mɔgɛ ti a miri a kɔrɔmɛnu ma tun. Anu yili ti to anu ko tun.

¹⁸ Ka a tɛgɛ ko-kurɛ wonu ma, ala mɔgɛnu si to sewala. A si Yerusalɛm ladan alako a la ni fa sewɛ la. A si a ma, ala mɔgɛnu fanan ni sewa.

¹⁹ Ale fanan si sewa Yerusalɛm na. A si sewa ala mɔgɛnu na. Mɔgɔ-wo-mɔgɔ ti yisi-magboyɛ anubɛ di-kɛ-kan lamɔɛn nyɔ rɔ tun.

²⁰ Tɔn si sigi den-pulan-sayɛ la. Mɔgɔ-wo-mɔgɔ ti taran nyɔ min siyi-fɛ ti yanya. Min ba san kɛmɛ bɔ, anu ko fonike le wo la fɔlɔn. Ni min siyi ma ke san kɛmɛ rɔ a ni faga, anu si a fɔ ko wunduyoge le wo la.

²¹ Soe wo burɔ, mɔgɛ si sigi a halala-bɔn kɔrɔ. Min bi sundi labɔla, wo le ye a tɔnɛ sɔrɔnna.

²² Ka a fɔ ko do ni ta a sigi a bɔla bon-nagbalanɛ kɔrɔ, wo ti ma. Do ti ki-fan ki, do ni ta a tɔnɛ dɔn. Mari ko ala mɔgɛnu si mɛ iko tili. Ata mɔgɔ-yabɔnɛnu si to anu diya nyɔ.

²³ Mɔgɛnuna wɔlɛ ti to anu ma tun fu! Anuna dannu ti to tɛgɛla a ma tun. Marita mɔgɛ bɛɛ si to duwɛ kɔrɔ. Marita mɔgɛnu anubɛ anuta dannu si to duwɛ sɔrɔnna.

²⁴ Yanni anu ni anu miri min ma, Mari ara wo di anu ma. Anu tenbi ale Mari manyinikala anu dɛnbɛn-koe rɔ, yaga, wo ye anu dɛnban kun na.

²⁵ Yarɛ anubɛ saga-dan si anu de-nyini kan-tina-kelen. Kuli si to binyɛ dɔnna iko ninki. Duguma-fan ti ko ma mɔgɛ la tun. Mari ko fenfen yogo, wo ti taran ata kɔnkɔ-sɛnimɛ kuma.