Aiseya 62 - ALLALA KUMƐ

Yerusalɛm Tɔgɔ-Kurɛ Wara-Koe

¹ Yerusalɛm di n ye min kɛ, n ti fara a wara-ko-fɔɛ la. N si to a matɔgɔla ha ale Marita nyimaya-silɛɛ ni to tiila a ma iko tele. N si to a tantola ha ata kisi-koe ni malan iko tɛ.

² Ile Yerusalɛm, sibolenu si ita nyimayɛ yen. Mansɛ bɛɛ si ita gbiliyɛ yen. Wo wati rɔ, i si tɔgɔ-kurɛ sɔrɔn. Mari nyɛrɛ le ye i tɔgɔ-kurɛ wo sala.

³ Wole, ata mɔgɛnu si ma Mari kɔɛn rɔ iko mansaya-fula-hakikɛ.

⁴ Mɔgɛnu ti wo kele tun ko, “Allata Mɔgɔ-Bolokanɛnu.” Mɔgɛnu ti wola nyamanɛ kele tun ko, “Allata Nyamani-Halakini-Kɔrɛ.” Anu si wo kele ko, “Alla Diyana-Mɔgɛnu.” Wola nyamanɛ si kele ko, “Allata Kɔɛn-Kurɛ.” Wo dama ye mala le bawo wo di Mari ye. Wola nyamanɛ si taran a bolo iko musi ye taranna ala kei bolo nya min.

⁵ Iko keminɛ ye a wasila kɔɛn-kura-biyi la nya min, Mari ye a wasila wo biyi la wo nya na le. Iko kei ye sewala ala musu-kurɛ la nya min, ale Mari fanan bi sewala wo la wo nya na le.

⁶ Mari ara so-makandannɛnu sigi tala tarɛ kuma. Suyi rɔ, tele rɔ, anu ti anu tade. Wonu bi nyɔ alako Mari hɛnkili la ni bila ata lanyirinu ko. Wonu kana sɔn, Mari ni nyina doni bɛrɛni!

⁷ Wonu kana sɔn, Mari ni a niyi madɛn doni bɛrɛn ha a ni ban Yerusalɛm sɔ-kurɛ kɛla, ado a si a ma, duninya mumɛ bɛɛ si to soe wo matɔgɔla.

⁸ Mari ara yili-madiyɛ kɛ. A si lanyiri wo latɔnbagaya ata sɛnbɛ la. A ko a ti wola dɔn-fannu di wo yogenu ma tun. Wo ara tɔrɔ minni-fan min sɔrɔn la, a ti sɔn sundannu ni wo min tun muk!

⁹ Min bi tɔrɔla dɔn-fan min na, wo le ye wo dɔnna, ado wo le si to Alla tantola. Min bi tɔrɔla minni-fan-sɔrɔn la, wo le ye a yi minna. Wo si wo min Bato-Bɔn lu-kole ma.

¹⁰ Wole Yerusalɛm kɛnu, wo bɔ soe burɔ. Minnu bi sɛgila ka bɔ biralɛ rɔ, wo ni kilɛ rabɛn wonu ye yɔnyɔn! Wo ni kurinu bɔ kila-kole la. Wo ni falafalɛ layɛlɛ san ma tamasereyɛ la sibolenu ye.

¹¹ Mari ye a fɔla duninya mumɛ bɛɛ ye ko a ye nala Yerusalɛm kɛnu nakisila, ado a ara minnu kunyɛ bɔ biralɛ rɔ, a ye nala wonu na tun.

¹² Wole, ata mɔgɛnu si kele ko, “Allata Mɔgɔ-Sɛnimɛnu.” Mɔgɛnu si wo kele fanan ko, “Marita Mɔgɔ-Kunkanɛnu.” Anu si ile Yerusalɛm kele ko, “Alla Diyana-Soe.” Anu si i kele fanan ko, “Alla Ma A Ban Soe Min Na.”