Aiseya 6 - ALLALA KUMƐ

Aiseya Kele-Koe Nɛbiya-Wɔlɛ ma Alla Bolo

¹ Mansa Yusaya ya so-sɛgi-kɛ san min na, n ya Mari yen ko-rayirɛ rɔ. A mayiginɛ ala waganɛ rɔ san ma, ado a gbiliyanɛ. Ala mansaya-duruki ya a Bato-Bɔn lafa pen!

² Nima-fen-kanbannamɛnu sɔnɛ ala foolɛ rɔ. Kanban wɔrɔ-wɔrɔ le anu dama ma. Anu yakɔrɛ yamatogonnɛ kanban fila la, anu fɛrɛ yamatogonnɛ fila la, anu si anu gban filɛ la.

³ Nima-fan wonu kulu-mayɛlɛnɛ ye a fɔla anu nyɔgɔn fɛ ko, Sɛnima, sɛnima, sɛnima! Mari Sɛnbɛ-Bɛɛ-Tigi sɛnima! Duninya lafanɛ ala gbiliyɛ la pen!

⁴ Nima-fan wonu kuli ye Bato-Bon-kuruka-tinɛ layɛrɛyɛrɛnna. Bato-Bɔn wo burɛ lafanɛ ta-sisi la.

⁵ Nde, Aiseya ya a fɔ ko, “Gbalo ye n ma bawo n dɛ ma kin, ado n bi mɔgɛ minnu tɛma, wonu fanan dɛ ma kin. Ado nfan, n bara Mansa Alla yen n nyɛrɛ yɛ la, Mari Sɛnbɛ-Bɛɛ-Tigi, kɔni. Ka a tɛgɛ kɛ dama ma, yigi-wo-yigi sa n bolo tun.”

⁶ Wo kɔma, nima-fan wo kelen gbanta ka yigi n bara. A ya ta-wɔlɔn do bi saraka-mintan-tinɛ kuma baran la.

⁷ A ya ta-wɔlɔn wo tugu n da-gbole la. A ko, “Kɛ tugi i da-gbole la, i hakɛ bɛɛ ma ara koto, i yulumu ara ban.”

⁸ Wo kɔma, n ya Mari kan lamɔɛn ko, “N si yon sɔ? Yon si ma mala kilayɛ la?” Nde ya a fɔ ko, “Nde sɔ, n si ta le!”

⁹ A ya a fɔ n ye ko n ni ta kilayɛ kɛ fɔ mɔgɛnu ye. N ni a fɔ anu ye ko hali anu ya anu tole masɔ nya-wo-nya, anu ti a nya-yen. Hali anu ya a mafɛlɛn nya-wo-nya, anu ti a lɔn ni min bi mala.

¹⁰ Wo kɔma, a ya a fɔ n ye ko n ni a ma, fan do ni sa mɔgɛnu miriya-ya ma alako anu kana ko nya-yen. N ni a ma, anu tole ni gbere alako anu kana na ko lamɔɛn. N ni a ma, fen ni sa anu yɛ ma alako anu kana na ko ragbɛ. A ko n ni kɛnu ma alako anu kana anu ya-lamunun ale Mari la anu nakɛndɛya-koe la.

¹¹ N ya Mari manyinika. N ko, “Kɛ si to a la ha wati nyamintan?” A ya a fɔ n ye ko, “Kɛ si to a la ha soenu ta ni kolonya ka tii mɛmɛ! Ha bɔnnu na ni kolonya filili! Fɔ nyamanɛ bɛrɛn ni kasara pɔ!

¹² N si mɔgɛ kɛnu nata wula-yan la pon! N si nyamanɛ kɛ ma tonbɔn la.

¹³ Mɔgɔ-kɔnɔntɔ wo mɔgɔ-kɔnɔntɔ, hali a tan nyɔgɛ min tora, n si wo fanan kasara. Nta mɔgɔ-yabɔnɛ minnu tonɛ kɛ, wonu si ma iko kɔlɔma-kuru-wɛ min tɛgɛnɛ dugi rɔ. Kɔnɔ kɔn-kundi min tonɛ wo la, wo si a matii ka ma Allata mɔgɛnu tamasere la.”