Aiseya 55 - ALLALA KUMƐ

Alla Kinikini-Koe Ata Mɔgɛnu Ma

¹ Mari ko ni minnu kan lagbalanɛ, wonu ni na anu min. Ni wodi sa minnu bolo, wonu ni na dɔn-fen bi tinɛ. Wo ni na nonɛ anubɛ min-kɛ-fan min, wo ti fenfen bɔ.

² I si wodi labɔ fan dola ko rɔ min ti i fa? I si i sara-kunyɛ lagbana, kɔnkɛ ni to i niginigila? Ni wo ya wo tole masɔ ale Mari la, wo si to fen-diyamɛnu dɔnna. Dɔn-fan min bi i sɔndɔmɛ wasala, i si to wo dɔnna.

³ A ko wole, ata mɔgɛnu, wo ni wo tole masɔ a la ka wo gbɛrɛn a ma. Wo ni wo tole masɔ a la. A si niyi di wo ma. A ko a si habadan-lanyiri kiri wo ye iko a ya Dawuda yili-madiya nya min ata keninteya-dan-natɛgɛbɛlɛ la.

⁴ Mari ya Dawuda ma kun-tigi anubɛ kɛlɛ-kurugbɛ la sibolenu ye. Mari ya ata fanka mayira anu na Dawuda le tɔ.

⁵ Wo ma sibole minnu lɔn kɔrɔma la, wo si wonu kele kan-tina-kelen, ado sibole minnu ma wo lɔn, wonu burimatoe si na wo wara. Kɛ damasi si ma bawo wole Isirɛlata Mari Alla-sɛnimɛ le wara gbiliyɛ di wo ma.

⁶ Mari-nyini-tumɛ le kɛ la yanni tele ni ta wo ma, ado a rakele-tumɛ le kɛ la bawo a gbɛrɛnnɛ wo ma.

⁷ Karagbɛlɛ bɛɛ ni a kɛ-nya boloka ka anu miriyanu yɛlɛma. Anu ni anu ya-lamunun mata Mari Alla la, a si kinikini anu ma ka anu makoto feu!

⁸ Mari ko wo miriya anubɛ ale miriya kelen ma anu na. Wo kɛ-nya anubɛ aletɛ, kelen ma anu na.

⁹ Iko san-kole anubɛ dugu-kole fɛ-yan anu nyɔgɔn na nya min, a kɛ-nya anubɛ a miriya fɛ-yan wotɛnu na wo nya na le pon!

¹⁰ Mari ko ata kumɛ mani de iko bandɛ anubɛ duri ye dugu-yi kɛla nya min, anu si ki-fannu nananfa. Mɔgɛ si sugi anubɛ dɔn-fan sɔrɔn ki-fan wonu tɔ.

¹¹ Marita kumɛ ye wo nya na le. Ala kumɛ ti ma fufafuyi la. Ala kumɛ bɛɛ si bɔ-a-la iko ale ye nyinina a ma nya min.

¹² Wo kunyɛ sewanɛ si bɔ biralɛ rɔ ka nyɔ boloka yisi-kimɛ rɔ. Kɔnkɛnu anubɛ gburukulinu si bara sigi-sa-tinɛ wo yala. Kɔlɔma bɛɛ si lɛnkɛ gbesi.

¹³ Wɔnɔ-firɛnu si yɛlɛma kɔlɔma-hakikɛnu na. Kala-dugi si ma firɛ la. Kɛ wa ma tumɛ min, wo hɛnkili ni to bilala Marita lanyiri ko. Kɛ si ma habadan-misalɛ la min ti tinya muk!