Aiseya 46 - ALLALA KUMƐ

Babilɔn Bɛsɛnu Wara-Koe

¹ Mari ko Babilɔn bɛsɛnu wara-koe dan le kɛ la sɔɛn! Bɛsɛ min tɔgɛ Bɛli anubɛ Nibɔ, anu bi wonu kɔla nun kɔnɔ kaka, bɛsɛ wonu kirinɛ sofɛlɛnu kɔ tɛma. Anu bara ma dunɛ la dɔrɔn kolo-fen-bandannɛnu ye.

² Bɛsɛ wonu ti ke anu nyɛrɛ lakisila. Anu tara biralɛ rɔ. Babilɔn bɛsɛnu wara-koe laban le kɛ la.

³ Wole Yakoba kebila-toe min tonɛ, wo ni wo tole masɔ. Mari ko ka a bi wola denninya-wati ma, a ye wo fɛ-birala,

⁴ ado a ko wota Alla le ale la min si to wo fɛ-birala ha wo kunyɛ si gbɛ. A ko ale le ya wo dan, ale le ye wo marala. A si wo dɛnbɛ ka wo kunyɛ bɔ gbaran rɔ.

⁵ Mari ko wo si kɛ ale sankala nfen ma? Anubɛ yon takɛn?

⁶ Mɔgɛnu si anuna wodi-bɔrɛnu dɛ laka ka sɛnɛ rawuya. Anu bi wodi-gbɛnu sumanna ka anu gbiliyɛ dan lɔn. Anu bi siyaki sarala alako wo ni anuta bɛsɛ ladan anu ye. Wo kɔma, anu bi anu nyɛnkinna bɛsɛ wo kɔrɔ ka a kɔ.

⁷ Anu bi bɛsɛ wo sigila anu kan ma ka ta a la. Anu ba ban a sigila kan-tina-kelan min tɔ, a ti ke a ramagala nyɔ. Mɔgɔ wa a madiya, a ti ke a labirala. A ti mɔgɔ-wo-mɔgɔ kunyɛ bɔ kasarɛ kɔrɔ.

⁸ Mari ko wole min bara wo kan-kɔ sɔ a la, wo ni wo hɛnkili lamiri kɛ ma. Wo ni wo miri tun, ale Mari ara min ma.

⁹ Mari ko koe minnu bara tenbi nun kɔrɔma la, wo ni wo hɛnkili lamiri wonu ma de! Wo ni a lɔn yati, ko ale le kelen pe ye Allayɛ la. A nyɔgɔn-takɛn sa de!

¹⁰ A ko kebi duninya dabirɛ, a ya ko-laban-watinu fɔ. Koe min bi nala mala yarɔ, a ya wonu fɔ wo ye, bi ko ma wo la. A ya a fɔ ko ala ko-latɛgɛnɛnu ti tinya. A ko a ara ban koe minnu miriyala, fɔ a wa wonu ma le!

¹¹ A ko a ye kei do kelela tele-bɔɛ min si yigi wo kuma iko tanbakɔrɔmanɛ. A ko ale Mari ara minnu miriya nun, kei wo le ye anu natɔnbagayala. Ale Mari ko a ara ban a fɔla, ado a ye wo nya na le gbɛn!

¹² Wole tolo-gberenu, a ko wo ni wo tole masɔ, wole min fɛ-yan ko-telennɛ la, kɔni.

¹³ A ko a ti mɛ tun a si ko-telennɛ labɔ gbɛ ma. A ti mɛ tun a si Yerusalɛm nakanan alako Isirɛla mɔgɛnu ni gbiliyɛ sɔrɔn nyɔ.