Aiseya 44 - ALLALA KUMƐ

Mari Alla Kelan Wara-Koe

¹ Mari ko “Wole Isirɛla mɔgɛnu, nta wɔli-kɛlɛnu, kɔni, wo ni wo tole masɔ. Nta mɔgɔ-yabɔnɛ le wole Yakoba kebilɛnu na.”

² A ko ale le ya ma dan kebi ma ye ma na burɔ. Ale le ye ma dɛnbɛna tolon! A ko ma kana kilan bawo ata wɔli-kɛlɛ le male la. Ata mɔgɔ-yabɔnɛ le male la. Ma di a ye kosɛbɛ!

³ A ko nyamanɛ min kan lagbalanɛ, a si yi di nyɔ ma. A si a ma, yi ni siyaya mala nyamanɛ rɔ. A ko a si ata Sɛnbɛ di mala dannu ma duk! A si duwɛ di mala kebilɛnu ma.

⁴ Anu si to sabatila iko yi tenbi binyɛ kɔrɔ anubɛ kɔlɔma min kinɛ yi dɛ la.

⁵ A ko mɔgɛnu si to a fɔla kelen-kelenyɛ ma ko Marita mɔgɛ le anu denu na. Anu si kofu male Isirɛla mɔgɛnu ma. Anu kelen-kelennamɛ-bɛɛ si Mari tɔgɛ sɛbɛ anu bole ma ka anu nyɛrɛ kele ko Allata mɔgɛ donu.

⁶ Mari min bi maralɛ kɛla ka male Isirɛla mɔgɛnu kumafunfan, Mari Sɛnbɛ-Bɛɛ-Tigi, kɔni, wo ko, Alla fɔlɔtɛ anubɛ a laban le ale la. Alla-wo-alla sa nyɔ ale kɔma.

⁷ Ale ye ko sufa min mala, mɔgɛ yon si ke wo sufanu mala? Yon si ke ko-natoenu fɔla iko ale ka a dabira a fɔlɔtɛ ma ha wati-laban?

⁸ A ko ma kana kilan! Ma kana hɔn! Min bi nala mala ma la, a ye wonu fɔla ma ye tolon! A sere le male la kɛnuna ko la. Alla-gbɛrɛ ye nyɔ, wa? Alla-makawani-gbɛrɛ do ye nyɔ, a ma min wara-koe lamɔɛn bɛ?

Bɛsi-Mayɛlɛn-Koe

⁹ Mɔgɔ-fuyi le bɛsi-ladannɛnu na. Hali bɛsɛ di mɔgɛnu ye, fufafuyi le bɛsɛ wonu na. Minnu bi bɛsɛ wonu kɔla, fiyɔn anubɛ kun-takolɔn le wonu na. Anuna kun-takolonyɛ si a laban anu bolo yarabiyi ma.

¹⁰ Ka nɛgɛ ma kɔli-fan la, wo tɔnɔ sa a la.

¹¹ Ni min ya anu kɔ, wo tigi si miliya. Minnu bi bɛsɛ ladanna, mɔgɔni-gbuyi le wonu dɔrɔn na. Anu ni na kiti-bɔn la. Anu kun ma si kɔ ka yarabiyi sɔrɔn kudai!

¹² Siyaki wo si nɛgɛ-kundi do bi ka a ladon tɛ rɔ. A si kundu-wɛ bi ka a ratugu a sɛnbɛ la alako a ra ni bɛn yɔnyɔn! A tenbi wɔlɛ wo kun na, kan-nagbalɛ anubɛ kɔnkɛ anubɛ bandan ye ale forongbanna.

¹³ Kɔlɔma-lɛsɛlɛ wo si kɔlɔma suma. A si bɛsɛ wo ladan-bole suma kɔlɔma wo ma ka a lɛsɛ dabira. A si a ladan a kin na iko hadama-dan. A wa ban a ladanna, a si ta a sigi a kɔ tinɛ rɔ.

¹⁴ Tumado a si lɛnkɛ tɛgɛ gbɔngbɔn rɔ, ni wo ma, a ni gbɛni-mele tɛgɛ burɔn kɔrɔ. Ni wo ma, a ni denkerenafan ki ka a makɔni ha wo ni koloya.

¹⁵ Kɔlɔma wo do si ma sɔgɛ la. A kundu kelan, a si wo ma a gbala-fan la, a kundi doi, a si wo ma biredi-mintan-fan la. A toe si ma bɛsɛ wo la a si to min kɔla.

¹⁶ A si a kundi do ma sogo-mintan-fan la. A wa wo dɔn, wo si mɛyɛ bɔ a la. A si to a gbalala tɛ wo la ka a fɔ ko, “Tɛ kɛ, a di de!”

¹⁷ Kɔnɔ a si kɔlɔma wo toe ma bɛsɛ la. A si a nyɛnkin wo kɔrɔ ka a kɔ. A si a fɔ wo ye ko, “Nta alla le ile la, i yandi, n nakisi.”

¹⁸ Kun-takolɔn le mɔgɔ-sufa wonu na. Anu ma a lɔn anu bi min kun na. Fan do burunnɛ anu yɛ la. Anu sɔn-kunyɛ-dɛ latogonnɛ alako anu kana na tonyɛ lɔn.

¹⁹ Kun-takolɔn wo min ya bɛsɛ ladan, wo ti a fɔ ko, “N bara n gbala do la ka biredi mintan do la ka soge mintan do la. N ya a kɔlɔma-toe ma kisimiriya-fan la. N bi n nyɛnkinna kɔlɔma le dɔrɔn ye.”

²⁰ Hɛnkilimaya-sufa kɛ mani de iko mɔgɛ tenbi ta-gbangban muganna. Ala kun-takolon-miriya wo mani de iko mɔgɛ tenbi donna gbofɛ la. Dɛnbɛni-wo-dɛnbɛni sa a bolo tun. A ti ke a fɔla ko bɛsɛ min bi a bolo kɛ la, Alla ma.

Dali-Mari Wara-Koe

²¹ Mari ko male Isirɛla mɔgɛnu, ma yili ni to kɛ ko. A ko ala wɔli-kɛlɛ le male la. A ya ma dan de ka ma ma ata wɔli-kɛlɛnu na, ado a ti nyina ma ko muk!

²² A ya ma hakɛnu firan ma ma iko fɔnyɔ wa sigi banda-finyɛ kɔrɔ. A ye a fɔla ma ye ko ma ni sɛgi a ma. Ma lakanannɛ le ale la.

²³ Wole san-kolenu, wo ni wo dɛ sa-a-rɔ sewɛ bolo! Denka-rayan-bɛnu ni anu dɛ sa-a-rɔ! Wole kɔnkɛnu, wole gbɔngbɔn-makilannɛ, wo ni wo dɛ sa-a-rɔ sewɛ bolo! Mari ya male ata Isirɛla mɔgɛnu kisi tumɛ min, a ya ata kabana-koe mayira.

²⁴ Mari ko ma kisilɛ le ale la. A ko ale le ya ma dan kebi ma ye ma na burɔ, ado a ko ale le ya fan bɛɛ dan. A kelen pe le ya san-kole rafulen. A ye dugu-kole danna tumɛ min, mɔgɔ ma a madɛnbɛ.

²⁵ A ko a ara yi-kɔrɔ-fɛlɛnnɛnu ma kun-takolɔnnu na. Lole-lakɔrɔsilɛnu bi ko-natoe minnu fɔla, a ara wonu ma ko fuyi la. A ko minnu bi anu hɛnkili mayirala, a ara wonu sɔsɔ feu, woletɔ anu si a lɔn ko ko-fuyi le anuna hɛnkilimayɛ la.

²⁶ Kɔnɔ a ko ale nyɛrɛta wɔli-kɛlɛ wa wɔlɔyiya-kumɛ fɔ wo, ata kilayɛ wa na ata ko-rabɛnnɛ lankɛnimaya wo, a ko a si a ma, wo dama ni bɔ-a-la tɛrr! A wa a fɔ ko Yerusalɛm na si fa mɔgɛnu na tun, wo si ma le. A wa a fɔ ko Yuda nyamanita-soenu si sɔ a kurɛ la tun, a kan wo si bɔ-a-la. Soe wonu bɔtoe le tonbonyɛ la.

²⁷ A ko a wa a karɛ laka ka a fɔ ko a ni gbala kɔgɔ-yi ma, wo si gbala todo!

²⁸ A ko a si a fɔ Babilɔn Mansa Sairasi ye ko a ni ma mansɛ la ale ye, wo ni a sako bɛɛ kɛ. A ko Yerusalɛm soe ni sɔ a kurɛ la tun. A ko fanan, Bato-Bɔn kuru ni kɛ tun.