Aiseya 39 - ALLALA KUMƐ

Yuda Nyamanɛ Lakɔrɔsi-Koe Babilɔn Mansɛ Bolo

¹ Wo wati nyɛrɛ le tɔ, Baladanla dan Mɛrodaki min bi mansayɛ la Babilɔn nyamanɛ rɔ, wo ya a lamɔɛn ko Mansa Hɛsakaya ma kɛndɛ Yuda nyamanɛ rɔ. A ya kɛdi sɛbɛ ka wonubɛ a sanbɛnu don ala kilayɛnu bolo ka wonu nata a kɔndɔ tinɛ.

² Wonu ke Mansa Hɛsakaya ma, a ya wonu sɛnibɔ. Fen-kolomɛ min bɛɛ lamaranɛ ale Mansa Hɛsakaya bolo, a ya wonu yira sundan wonu na. Sɛnɛ wo, wodi-gbɛ wo, dɔn-fen-ladiya-fan anubɛ fen-suma-diyamɛ wo, anubɛ kɛlɛ-kɛ-miran minnu namaranɛ a bolo wo, a ya wo bɛɛ yira sundan kɛnu na. Fenfen sa ala nyamanɛ wo rɔ a ma min yira sundan wonu na.

³ Nde, Aiseya tara ale mansɛ manyinika ko, “Sundan kɛnu bɔra mintɔ? Anu ya nfen fɔ i ye nun?” Mansa Hɛsakaya ko, “Anu bɔra fɔɔ Babilɔn nyamanɛ rɔ pon!”

⁴ Nde, Aiseya ko, “Anu ya nfen yen ila bolɔn la nun?” Mansa Hɛsakaya ko, “Fenfen sa nyɔ anu ma min yen anu yɛ la. Nna bolonna-fen wo, nna fen-namara-tinata-fen wo, n ya wo bɛɛ yira anu na.”

⁵ Nde, nɛbi ya a fɔ mansɛ ye ko, “Nba, Mari Sɛnbɛ-Bɛɛ-Tigi ko

⁶ wati do ye nala, i wara fen-kolomɛ minnu nadɛn ila bolɔn la wo, i benbanu bara fen-kolomɛ minnu nadɛn wo, wo bɛɛ si ta Babilɔn nyamanɛ rɔ. A ko hali wo kelen ti to yan.

⁷ A ko hali ile mansɛ bɔnsɔn donu si ta. Wo donu si ma tɛgan la minnu si to wɔlila Babilɔn mansɛla bolɔn la.”

⁸ Mansa Hɛsakaya ya a lɔn kumɛ wo le ma ko ata wati si ma yisi-kimɛ anubɛ lafɛrɛ la. Woletɔ a ya a fɔ n ye ko, “I wara Marita kilayɛ min nake n ma kɛ la, wo kin fasai!”