Aiseya 37 - ALLALA KUMƐ

Nɛbi Aiseya Manyinika-Koe Mansa Hɛsakaya Bolo

¹ Mansa Hɛsakaya ya kumɛ wonu namɔɛn tumɛ min, a ya ala duruki rafara yisi-tinyɛ bolo. A tara kasa-kurɛ don a kan na. A tara Mari Bato-Bɔn la.

² Ilayakim min bi bolon-mafɛlɛnna wo, anubɛ Sɛbana min bi ala kɛdi-sɛbɛla wo, anubɛ saraka-masɔla-kun-tiginu wo, Mansa Hɛsakaya ya wonu nata nde, Emɔsila den Nɛbi Aiseya ma. Wonu fanan tara kasa-kurɛ la anu kan na.

³ Mansa Hɛsakaya ya a fɔ anu ye ko anu ni a fɔ nde, Nɛbi Aiseya ye ko, “Tɔrɔ-tele le bi la. Ma ye tɔrɔyɛ anubɛ yarabiyi kɔrɔ bi. Ma mani de iko musi min bi mui-koe rɔ kɔnɔ sɛnbɛ sa a bolo tun den sɔrɔn tinɛ.

⁴ Asiriya mansɛ ara ala kandɛ lana Alla-nimɛ masɔrɔn tinɛ. Alamɛ ita Mari Alla ya a masɔrɔn-kan wo lamɔɛn ka a masɔrɔnnɛ wo tɔrɔ. Woletɔ male Yakoba kegeya-toe minnu tonɛ, i ni Alla madiya ma ye.”

⁵ Nde, Aiseya ya Mansa Hɛsakayata kilayɛ lamɔɛn tumɛ min,

⁶ nde fanan ya n sara Mansa Hɛsakaya wara. N ko, “Ni Asiriyanu bi a fɔla ko Mari ti ke anu kisila, hali kumɛ wo ma a rakilan.

⁷ Mari si a ma, Asiriya mansɛ ni kumɛ do lamɔɛn. Wo si a ma, anubɛ ala mɔgɛnu ni anu buri tala anuta nyamanɛ rɔ. Mari si a ma, anu ni ale mansɛ faga nyɔ rɔ.”

Mari Madiya-Koe Yuda Mansa Hɛsakaya Bolo

⁸ Asiriya mansɛla kandɛ wo ya a lamɔɛn ko anuna mansɛ ara bɔ Lesi soe burɔ ka ta Libina kɛnu kɛlɛ tinɛ. Kandɛ wo tara a manyinika tinɛ.

⁹ Asiriya Mansa Sɛnakaribu ya a lamɔɛn tumɛ min ko Sudan Mansa Teriheka ara na Iyipiti kɛlɛ-dannu na a bolo a kan ma Asiriya nyamanɛ rɔ, ale Sɛnakaribu ya kɛdi sɛbɛ Mansa Hɛsakaya ma Yuda nyamanɛ rɔ.

¹⁰ Min sanɛ kɛdi wo rɔ, a ko, “Ile lanɛ ita Alla min na, wo ara a fɔ i ye ko i ti sa nde, Sɛnakaribu bole tɔ. Kɔnɔ i kana sɔn, a ni i mayuwaya.

¹¹ N bara min sigi nyamanɛ doinu ma, i wara wo lamɔɛn? I lanɛ a la ko i kunyɛ si bɔ n bolo tɔ?

¹² N benbanu ya Koson kɛnu nɔ anubɛ Hɛran kɛnu anubɛ Resɛfu kɛnu anubɛ Idɛn kɛnu minnu bi Tɛlasa nyamanɛ rɔ, ado wonuna bɛsɛnu ma ke anu kunkala n benba wonu bolo.

¹³ Hamati kɛnuna mansɛ ye mintɔ? Arapadi kɛnuna mansɛ ye mintɔ? Sifafeyim kɛnuna mansɛ ye mintɔ? Hena kɛnuna mansɛ ye mintɔ? Ifa kɛnuna mansɛ ye mintɔ?”

¹⁴ Kɛdi wo ke Mansa Hɛsakaya ma Yuda nyamanɛ rɔ, a ya a rakaran. A tara Mari Bato-Bɔn la ka kɛdi kɛ sa nyɔ rɔ Mari ye.

¹⁵ A donta madiyali-kɛ rɔ, a ko,

¹⁶ “E, Isirɛlata Mari Alla, ile min mayiginɛ melika filɛ muninyɛ tɛma tɔn-kenkirɛ kuma. Alla, ile le kelen pe le duninya rɔ. Ile le ya san-kole anubɛ dugu-kole dan.

¹⁷ Kɔnɔ Mari, i wɔlɔ matɔlɔ ka i kolan maka. I ni a yen min bi sigila ma ma. E, Alla-nimɛ, i wɔlɔ matɔlɔ i masɔrɔn-kan la Sɛnakaribu bolo.

¹⁸ Mari, bɛɛ ya a lɔn ko Asiriya mansɛnu bara nyamani-siyaman kasara

¹⁹ ka anuna bɛsɛnu mintan, ado ma ya a lɔn ko Alla ma wonu na. Kɔlɔma anubɛ kuru-lɛsɛnɛ le wonu na dɔrɔn. Anu nadannɛ hadama-dan bolo la.

²⁰ I yandi, mata Mari Alla, ma tanka Asiriyanu masibɛ ma alako duninya bɛɛ ni a lɔn ko ile Mari kelen pe le Alla la.”

Mansa Hɛsakaya Yisi-Sa-Kumɛ Fɔ-Koe Mari Bolo

²¹ Wo kɔma, Nde, Nɛbi Aiseya ya kilayɛ lata Mansa Hɛsakaya ma n ko, “Mari ara ila madiyalɛ yabi.

²² A ko Yerusalɛm kɛnu si tɛgɛ Asiriya Mansa Sɛnakaribu rɔ ka a mayɛlɛn.

²³ A ko ale Sɛnakaribu mirinɛ ko a ye yon nafɛyala? A sa Isirɛlata Mari Alla-sɛnimɛ gbiliyala,

²⁴ fɔ a ye kilayɛnu nanala ka a nyɛrɛ matɔgɔ. A ko ale Sɛnakaribu ye a fɔla ko anubɛ ala kirindinu ya Lɛbanan kɔnkɔ-layan-bɛnu nɔ ka kɔlɔma-layan-bɛnu nawuya hali ka ta gbɔngbɔn-makilannɛ bɛɛ kɔrɔ.

²⁵ A ye a nyɛrɛ matɔgɔla ko a ye kɔlɔnnu sinna sibolo-gbɛrɛnu barɛnu tɔ. A ko anubɛ ala kɛlɛ-dannu bara Iyipiti bɛnu gbala anu kian la.

²⁶ “A ko ale Sɛnakaribu ma a lamɔɛn ko Marita miriya le kɛ la? Ado nfan, a ye wo dafa tinɛ le. Mari le ya sɛnbɛ di ale Asiriya mansɛ ma ka so-kunbɛnu yɛlɛma tonbɔnnu na.

²⁷ Mɔgɛ minnu bi so-kunbɛ wonu tɔ, wonu kumakɔra. Anu kilanta dɔgɔma-ma-de! Mɔgɛ wonu kun mayɛlɛmanɛ iko taraba-tele wa sɔ yerima-fɛrɛn san la.

²⁸ “Mari ko a ya Sɛnakaribu wara-koe bɛɛ lɔn, ado a ko a ya a don-woe anubɛ a bɔ-woe lɔn. Mari ko a ya a lɔn Sɛnakaribu ye diminyala a ma nya min.

²⁹ A ko a ara diminya min kɛ, Mari ara wo nya-yen. A ko a ara ala wasinteyɛ lɔn. Mari ko a si a sunyɛ-sɔgɔ-lunyɛ la ka karafɛ kɛ a dɛ ma ka a lasɛgi a gbere fɛ a bɔra kan min.”

³⁰ Wo kɔma, nde, Nɛbi Aiseya ya a fɔ Mansa Hɛsakaya ye tun ko, “Nyina, fɔ wo ya ki-fen-bananu dɔn. Yari, fɔ wo wa wonu gba-mabunsannu dɔn. Yari kɔ, wo si wola ki-fannu ki ka wola fui-fannu fui. Wonu ba ke tumɛ min, wo si wonu tɛgɛ. San sawa, ko-nya kɛnu si ma tamasere la wo ye

³¹ ko a mɔgɛ toe min tonɛ Yuda nyamanɛ rɔ, wonu si sabati iko ki-fan min bi a suli layigila dugi rɔ pon, ka gbɔ-nyimɛ kɛ.

³² Mɔgɛnu si to anu niyi la Yerusalɛm soe burɔ nyɔ kɔnkɛ kuma bawo Mari ara ban a latɛgɛla wo nya na le.”

³³ Nde, Nɛbi Aiseya ya a fɔ Mansa Hɛsakaya ye tun ko, “Mari ara kɛ le fɔ Asiriya mansɛ wara-koe rɔ ko a ti a kunyɛ ladon soe kɛ burɔ. A ko ka kalabɛn kelen bɛrɛn nakɛ soe burɔ yan, wo ti ma tun. Hali ala kɛlɛ-dannu ti gbɛrɛn soe ma tun! Hali ka bɔnkɛ ladɛn tarɛ fɛ anu si yɛlɛ min ma, wo ti ma anu bolo muk!

³⁴ Mari ko a nara gbere min fɛ, a ye sɛgila wo le fɛ. A ti a kunyɛ ladon soe burɔ.

³⁵ Mari ko ka a tɛgɛ ata gbiliyɛ anubɛ ata lanyiri ma a ya min kiri Mansa Dawuda ye, a si soe kɛ latanka.”

³⁶ Marita melika yigira Asiriyanuna dagɛ rɔ. A ya mɔgɔ waga kɛmɛ kelen mɔgɔ waga bi-segin ani mɔgɔ waga loli faga Asiriyanu tɔ (185,000). Bandɛ kanɛ, wonu furi taranta nyɔ.

³⁷ Woletɔ ale Sɛnakaribu sɛgira a kɔma Ninɛfa soe burɔ.

³⁸ Lunyɛ do, ale Sɛnakaribu ye ala Bɛsi Nisirɔki kɔ tinɛ tumɛ min, ala den fila Adamɛlɛki anubɛ Sarisa tara anu fa wo faga nyɔ. Wonu ya anu buri tala Ararati nyamanɛ rɔ. Ala dan do min tɔgɛ Isahadɔn, wo sigira a gbɛ rɔ.