Aiseya 36 - ALLALA KUMƐ

Yuda Kɛnu Makuma-Koe Asiriyanu Bolo

¹ Yuda Mansa Hɛsakayala mansayɛ san tan-ni-nani nyɔgɛ ma, Asiriya Mansa Sɛnakaribu tara bui Yuda nyamanɛ ma ka so-kunbɛnu bi tarɛ mininɛ minnu ma.

² A ya a fɔ ala kandɛ ye ko a ni bɔ Lesi soe burɔ ka ta kɛlɛ-den-siyaman na a bolo Yerusalɛm soe burɔ. Wo si a fɔ a ye ko fɔ Mansa Hɛsakaya ni dɛgɛ min a ye. Kandɛ wo danta kura ku tinɛ dafɛ. Yi min siginɛ a rɔ kɔnkɛ kun tɛma, wo worɔn ye yigila ha kura ku tinɛ wo dafɛ.

³ Helikayala den Ilayakim min bi mansɛla-bolon-mafɛlɛnna wo, Sɛbana min bi ala kɛdi-sɛbɛla wo, Esafila den Yowa min bi kɛdi-sɛbɛnɛnu-namarala wo, wonu tara a taran yi dɛ la nyɔ. Yuda kɛ le mɔgɔ sawɛ wonu na.

⁴ Asiriya kandɛ wo ya a fɔ mɔgɔ sawɛ wonu ye ko, “Mala nyamani-tigi le ya ma sɔ Hɛsakaya wara ko ma ni na a manyinika ko nfen ya a to, tamayi sa a yisi rɔ.

⁵ Wole ya a lɔn ko wola mansɛla kuma-teleka-telekɛ si sɛnbɛ sɔrɔn ka tenbi kɛlɛ-dannu anubɛ anuna halliyɛ la? Wole lanɛ a la ko yon sɔnɛ wo fɛ murutiyɛ kɛ rɔ.

⁶ Ni wo yili-madiyanɛ Iyipiti mɔgɛnu denu ma wo dɛnbɛn-koe rɔ kɛlɛ rɔ, wonu mani de iko puka-gbalɛ min bi sewuruyɛ la bawo a si keri mɔgɔ bolo tɔ ka a tanban. Mɔgɔ-wo-mɔgɔ ya a lɛngbɛn Iyipiti mansɛ rɔ, a ye mala wo tigi la wo nya na le.

⁷ Tumado wo ye a fɔla le ma ye ko wo ye lala le wota Mari Alla la? Mansa Hɛsakaya ya kan-tina-mayɛlɛnɛ minnu tinya wonu na, ale Mari bato tinɛ le ma wonu na, wa? Wo kɔma, a ma a fɔ wole Yuda kɛnu ye ko wonu ni to sarakɛnu bɔla saraka-mintan-tina kelan wo rɔ Yerusalɛm, wa?

⁸ “Nba, awa, ma ni sarama-kan do kiri wona mala mansɛ tɔgɛ rɔ. Ni wole si ke mɔgɔ waga fila sɔrɔnna minnu si sigi soeenu na, ma si soeenu di wo ma ha waga fila.

⁹ Hali kɛlɛ-den-kunyɛ min dɔgɔ ma rɔ, wo ti bɔ wo yakɔrɔ. Wole lanɛ a la ko Iyipiti kɛnu si soeenu anubɛ kirindinu nana wo dɛnbɛn-tinɛ kɛlɛ rɔ, wa?

¹⁰ A fɔra le ko male nara dinkirɛ kɛ kasara-tinɛ ma nyɛrɛ ma le ni Mari ma ma lana? Mari nyɛrɛ-nyɛrɛ le ya a fɔ ma ye ko ma ni na wola nyamanɛ kɛ kasara pɔ!”

¹¹ Wo kɔma, Ilayakim anubɛ Sɛbana anubɛ Yowa ya a fɔ Asiriyanu mansɛla kandɛ wo ye ko, “I yandi, kuma ma ye Aramaki-kan rɔ. Ma si wo ragbɛ le. I kana kuma ma ye mata Hiburu-kan rɔ alako minnu bi tarɛ kuma san ma, wonu kana na ma kan ragbɛ.”

¹² Kandɛ wo ya a fɔ anu ye ko, “A sɔgɛ le wo la nta mansɛla kumɛ kɛ ni fɔ wobɛ wota mansɛ dɔrɔn de ye, wa? N ma na wo la de! N bi kumala mɔgɛ bɛɛ le ye hali minnu bi san ma wo la. Wole dɔrɔn sa wo boe dɔnna ka wo suli min. Hali minnu bi tarɛ kuma pan, wonu fanan si anu boe dɔn ka anu suli min.”

¹³ Wo kɔma, Asiriya mansɛla kandɛ wo ya a sɔ ka a kuli mayɛlɛ Hiburu-kan rɔ, a ko, “Wo ni wo tole masɔ. N bi nala mala mansa-makawanɛla kumɛ latenbila wo ma.

¹⁴ A ko wola Mansa Hɛsakaya kana na wo mayuwaya bawo a ti ke wo kunkala a bolo.

¹⁵ A ko fanan Hɛsakaya kɛ kana na a ma, wo ni la Mari la. A ko wo kana wo miri ko Mari si wo kisi le, ado wo ni la a la ko mata kɛlɛ-dannu si wola soe kɛ bi wo bolo.

¹⁶ A ko wo kana wo tole masɔ Hɛsakaya kɛ la. Mata mansɛ ko wo dama ni bɔ soe kɛ burɔ ka wo niyi latenbi ma ma. A ko ni wo ya wo ma, a si a ma wo rɔ, wo ni to wola ki-fen-gbɔɛnu dɔnna anubɛ wola kɔlɔntɔ-yinu minna

¹⁷ ha a ni wo bi yan ka ta wo la ata nyamanɛ rɔ min bi iko wotɛ kɛ. Wo ye tala ata nyamanɛ mintɔ wo la, wo si nɔnbɔ-gbɔ-yi sɔrɔn nyɔ, wo si fui-fan sɔrɔn nyɔ ka a ma biredi la.

¹⁸ A ko wo kana a ma, Hɛsakaya kɛ ni wo mayuwaya ka wo miri ko Mari si wo kisi le. Sibolo-gbɛrɛkɛ do ye nyɔ rɔ minnuna bɛsɛ ara anuna nyamanɛ kunka Asiriya mansɛ bolo?

¹⁹ Mala mansɛ ko Hamati kɛnu anubɛ Arapadi kɛnuna bɛsɛnu bi mintɔ gbɛ? Sifafeyim kɛnuna bɛsɛnu bi mintɔ? A ko bɛsɛ kɛ do kera Samariya soe kunkala, wa?

²⁰ A ko fanan, bɛsɛ kɛ do-wo-do ma ke ala nyamanɛ kunkala a ma. Nfenna wole mirinɛ ko ‘Mari’ si Yerusalɛm soe kɛ kunka a bolo?”

²¹ Kɔnɔ mɔgɛ wonu tadenɛ tora sɔni iko Mansa Hɛsakaya ya a fɔ anu ye nya min. Anu ma fenfen fɔ!

²² Ilayakim anubɛ Sɛbana anubɛ Yowa ya anuna durukinu tafara yisi-tinya bolo. Kandɛ ya kumɛ min bɛɛsi fɔ anu ma, anu tara wonu takaran Mansa Hɛsakaya ye.