Aiseya 35 - ALLALA KUMƐ

Sɛninyɛta Kilɛ Wara-Koe

¹ Wula-da-rakolɔn si sewa. Nyɔ-bagɛnu si fere.

² Wulɛ wo si sigi sa ka sarandɛ ratii sewɛ bolo. Nyɔ si kinya iko Lɛbanan kɔnkɛnu. A dugi si kinya iko Kamɛli kɔnkɛ anubɛ Sarɔn lɛɛ ye nya min. Mɔgɛ bɛɛ si Marita fanka anubɛ ata gbiliyɛ yen nyɔ.

³ Bole anubɛ kunbelan minnu takunnɛ, i ni wonu tagbɛlɛya tun.

⁴ Min bɛɛ yisi tinyanɛ, a fɔ wonu ye ko anu ni anu sɛnbɛ don ka anu kerinteya. Alla ye nala anu nakananna. A ye nala anu yogenu tɔrɔla.

⁵ Fiyɔnnu si fen yen. Tolo-gberenu si ko lamɔɛn.

⁶ Namarɛnu si anu gban iko minan-dan. Bobenu si anu dɛ sa-a-rɔ sewɛ bolo. Yi-mɛsɛmɛnu si tugu dugu-gbalanɛ rɔ.

⁷ Kɛnkɛn-kalimɛ si ma dalɛ la. Tenkenu si taran nyamani-tagbalanɛ wo kan tinɛ bɛɛ rɔ. Fira-wulinu sigi tinɛ si ma gbofɛ la.

⁸ Kila-gbonkan-bɛ si taran nyɔ anu bi min kelela ko, “Allata Sɛninya Kilɛ.” Hakɛ-tigi fenfen ti tenbi nyɔ. Mɔgɔ-nyimɛ minnu bi tagamana kilɛ wo fɛ, kun-takolon wo kun-takolon ti ke wonu kɔndɔfilila.

⁹ Yara ti taran nyɔ. Sogo-ferema wo sogo-ferema ti a kian sɔ nyɔ. Mari ara anu denu minnu dɔrɔn nakanan, wonu denu si bɔ kilɛ wo fɛ ka ta anu barɛ.

¹⁰ Anu ba don Yerusalɛm lunyɛ min, anu si sewa dɔgɔma-ma-de! Anu si anu dɛ sa-a-rɔ sigi sa tinɛ sewɛ bolo. Anu si to sewɛ rɔ burubukai! Anu ti mɔnɛ anubɛ nyagbɛ sɔrɔn tun.