Aiseya 34 - ALLALA KUMƐ

Alla Yogenu Tɔrɔ-Koe

¹ Wole sibolo-gbɛrɛnu, wo dama ni na ka wo tole masɔ. Mɔgɛ min bɛɛ ye dugu-kole kuma, wo ni na ka wo tole masɔ.

² Mari ara diminya sibole bɛɛ ma anubɛ anuna kɛlɛ-dannu. A ara anu dama kasara-koe latɛgɛ.

³ Anu togonna fenfen ti taran. Anu tulinɛ si to sani fɔ anu sumɛ min bi bɔla. Kɔnkɛnu si wulen anu yele bolo.

⁴ San-kole si tunu yen, iko gbolo-kolonɛ la wa mini. Tele wo, karɛ wo, lolenu wo, wo bɛɛ si bunden. Lolenu si to yalanna iko toro-gbɔɛ anubɛ a yanbɛ si a ma nya min.

⁵ Mari ara ala faan sagan a lɛɛ rɔ san-kole rɔ. A ye nala Idɔm kundu bɔla, ado a ara kasarɛ wara-koe fɔ mɔgɛ kɛnu ye nun.

⁶ Anu kɛɛn anubɛ anu yele si don faan wo ma iko saraka-masɔlɛta saraka-boso-muri. Mari si sarakɛ kɛ bɔ Bɔsira soe burɔ, ado kɛ si ma kan-natɛgɛ-ba la Idɔm nyamanɛ rɔ.

⁷ Mɔgɛnu si to buila iko ninki-feremɛ anubɛ tura-bulan si bui nya min bosoli-kɛlɛnu bolo. Anu yele si dugi wo wulen. Anu kɛɛn si nyɔ yamatogon.

⁸ Mari si ata kɔnkɔ-sɛnimɛ lakanan wati kɛ le tɔ ka ala mɔgɛnuna yili sara anu yogenu na.

⁹ Idɔm bɛnu si ma nagatikali, iko kolota. Nyɔ-dugi si yɛlɛma munku-gbɛ la. Nyamanɛ wo mumɛ si mintan iko ta-yi le rawuyanɛ a ma.

¹⁰ Tɛ si to sigini a la dɔnkɔnyɔ, su-ni-tele. A sisi si to yɛlɛla kulakula! Nyamanɛ tinyanɛ si to burubukai! Mɔgɔ-wo-mɔgɔ ti tagama nyamanɛ wo rɔ tun!

¹¹ Nyamanɛ wo si ma gbingbinnyagan anubɛ mansa-wala-konanu nyagan sa tinɛ la. Duduyi-gbansan si to nyɔ. Mari si a ma wula-da-rakolɔn la.

¹² Mansa ti taran Idɔm nyamanɛ wo rɔ, ado a kun-tigi bɛɛ ara ta bɛɛ ta tinɛ.

¹³ Wɔnɔ-sufa bɛɛ si fɛrɛn kun-tiginuna bɔn la anubɛ tarɛ mininɛ soe minnu ma. Fɔ sulukinu anubɛ gbingbinnyagan denu dɔrɔn si taran nyɔ.

¹⁴ Sogo-feremɛnu si to yilan-yilanna nyɔ. Nyinɛnu si to anu nyɔgɔn takelela nyɔ. Nyina-musu-kɔrɛ si to tala a sulenna nyɔ.

¹⁵ Gbingbinnyagannu si anu nyagan sa nyɔ ka anu kili sa ka anu natii. Anuna dannu si koloya nyɔ. Nyɔ si ma dogɛnu bara la.

¹⁶ Wo ni Marita dali-fannuta buku bi ka a karan. Nima-fan kɛ su bɛɛ si taran nyɔ. Nima-fan bɛɛnubɛ ala musi si taran nyɔ. Mari nyɛrɛ ara ban a latɛgɛla wo nya na le. Ale nyɛrɛ-nyɛrɛ le si anu kele nyɔ.

¹⁷ Mari si nyamanɛ wo ratala nima-fan wonu na. Bɛɛ si ata sɔrɔn. Nyɔ si ma anu halalɛ la. Anu si to sigini nyɔ tolon!