Aiseya 33 - ALLALA KUMƐ

Dɛnbɛnɛta Madiyalɛ Wara-Koe

¹ Ma yogenu si halaki. Hali mɔgɔ ma anu denu yanfa ka anu kankan, anu denu bi mɔgɛnu yanfala ka anu kankan. Kɔnɔ koe wo dama katoe le a-la bawo mɔgɛnu bi nala anu denu yanfala ka anu kankan.

² Mari, kinikini ma ma. Ma yigi bɛnnɛ ile le ma. To ma lakananna tele-wo-tele ka ma lakisi yakɔrɔ-mamɔɛ rɔ.

³ I wa mala kɛlɛ kɛ tuma-wo-tuma, i mankan si a ma, sibolo-gbɛrɛnu si anu buri kɛlɛ-sɔnkɔ kɔrɔ.

⁴ Wo si wo yogenu bolo-fannu toronde anu na iko tunbinu bi binyɛnu banna nya min.

⁵ Mari makawara! A ye mansayɛ la fan bɛɛ kun na. A ya Yerusalɛm lafa telenbagayɛ anubɛ ko-nyimɛ la.

⁶ A si a ma, Yerusalɛm ni sigi yiri! A si wole, ala mɔgɛnu kumafunfan. A si hɛnkili anubɛ ko-kɔrɔ-lɔn di wo ma. Min di wo ye wo dama ko, wo le Allata gbiliyɛ la.

⁷ Hali kerintenu si keleli kɛ anu dɛnbɛn-koe rɔ. Hali nyamani-yɛ minnu bi yisi-kimɛ lanala nun, wonu ya-yi si to yigila biribiri!

⁸ Hali kila-wɛnu, mɔgɛ ti tenbi nyɔ ka a tɛgɛ bumali-kɛlɛnu ma. Lanyirinu kirinɛ nyamanɛnu tɛma fu! Mɔgɔ-wo-mɔgɔ ti to gbiliyɛ rɔ tun.

⁹ Nyamanɛ lakolɔnnɛ si to wo nya na le. Lɛbanan gbɔngbɔn-lafɔsɔnɛ si to. Sarɔn lɛɛ si ma iko wula-da-rakolɔn. Yanba-kunyɛ bɛɛ ye yalanna Basan nyamanɛ anubɛ Kamɛli kɔnkɛ ma.

Mari Yogenu Makawandi-Koe

¹⁰ Mari nyɛrɛ ye a fɔla sibolo-gbɛrɛnu ye ko a si atɛ ma. A ko ale si a yira anu na ala fanka ye nya min.

¹¹ Anu miriya bɛnnɛ min ma wo, anu bi min kun na wo, a ko fufafuyi le wonu na. A ko ata Sɛnbɛ mani de iko tɛ min bi anu halakila.

¹² Mɔgɛnu si mintan, anu kolenu ni ma iko kore. Anu si mintan tiriya iko tiri-gbalɛ wa mintan ka ma bugurɛ la.

¹³ A ko mɔgɛ bɛɛ, a mara wo dafɛ-mɔgɔ la wo, a mara wula-yanna-mɔgɔ la wo, a ara min bɛɛ sigi wole ma, wonu ni wo lamɔɛn ka a lɔn ko fanka-tigi le ale Mari la.

¹⁴ Yerusalɛm hakɛ-tiginu bi yɛrɛyɛrɛnna kilan bolo. Anu bi a fɔla ko, “Marita kiti mani de iko tɛ min ti sa mumɛ! Ta-sufa wo si male do to a niyi la?”

¹⁵ Kɔnɔ ni wole tora ko-telennɛ mala ka tonyɛ fɔ, wo si to wo niyi la wo rɔ. Wo kana wo raya ka bolo-kolɔnnu bolo labira, ni wo ma, ka dogonta-fan bira mɔgɛnu bolo. A karagbɛlɛ wo, a mɔgɔ-fagala wo, wo kana kofu wonu ma.

¹⁶ Wo si a ma, wo la ni tanka. Wo la si kanan iko wo ye kan-tina-gbɛlɛmɛ do le tɔ. Dɔn-fan anubɛ yi ti dasa wo ma muk!

Yarɔ Gbiliyɛ Wara-Koe

¹⁷ Wo si mansɛ yen gbiliya-wɛ rɔ tun. Ala nyamanɛ kolo dɔgɔma-ma-de!

¹⁸ Wo kilannɛ sibolo-gbɛrɛ duti-makelelɛ anubɛ ko-lakɔrɔsilɛ minnu na nun, wo si to wo hɛnkili ma dɔrɔn!

¹⁹ Sibolo-gbɛrɛ-wasitenu ti kuma sɔ wo ma tun minnu kan ma gbɛ wo bolo.

²⁰ Yerusalɛm so-lafɛrɛnɛ mafɛlɛn, ma ye mala ladiya-sarakɛnu bɔla kan min, nyɔ-sigi di ma ye dɔgɔma-ma-de! Wo si ma iko fani-bɔn min bi a gbɛ rɔ tolon! A balan-yili anubɛ a balan-kɔlɔmanu ra ti maga dɛɛ!

²¹ Mari si ata gbiliyɛ yira ma la. Ma si sigi ba-wɛ donu dafɛ minnu tayan kɔnɔ kulun ti taran ma yogenu bolo bɛ wonu kuma.

^22-23 Fenfen ma kulun-matelen-fannu na. Kurɛ min si kulɔn lata, wonu ta ma fulen. Ma si ma yogenu bolo-fannu toronde anu na. Wo si siyaya ma bolo, hali namarɛnu si do sɔrɔn anu tɔ. Mari nyɛrɛ si ma mala mansɛ la. Ale si ma lamara ka ma lakanan.

²⁴ Mɔgɔ-wo-mɔgɔ ti kiraya-koe fɔ mala nyamanɛ rɔ, ado hakɛ bɛɛ ma si koto.