Aiseya 3 - ALLALA KUMƐ

Yerusalɛm Soe Rabasan-Koe

¹ Hadama-dan minnu bi Yerusalɛm soe anubɛ Yuda nyamanɛ rɔ, wonu tonɛ fan min bɛɛ ma anubɛ anu tonɛ mɔgɛ min bɛɛ ma, Mari Sɛnbɛ-Bɛɛ-Tigi si na wo bɛɛ bi anu bolo. A si anu beli-fan anubɛ anuna yi bi anu bolo.

² A mara kɛlɛ-nyana la wo, a mara kɛlɛ-den na wo, a mara kiti-sala la wo, a mara nɛbi la wo, a mara bolo-tafɛlɛnna la wo, a mara nyamani-tigi la wo,

³ a mara kɛlɛ-kurugba la wo, a mara a mɔgɔ-ba-sɛbɛni na wo, a mara kun-tigi-nyinina la wo, a mara duru la wo, a si wo bɛɛ bi wo bolo.

⁴ Mari si a ma, denni-pɔipɔinu ni nyamanɛ mara.

⁵ Mɔgɛnu si to anu nyɔgɔn niyi ragbɛrɛnna. Kemini-mɛsɛnu si yo kinanu ma. Kuntannu si yo mɔgɔ-gbiliyanɛnu ma.

⁶ Wati ye nala, kebilɛ do si a fɔ anu kebila-nyɔgɛ do ma ko, “Fɛrɛya-bɔɛ ye i bolo min kɛ, a bɛnta, ile ni ma mala mansɛ la yakɔrɔ-mamɔ-wati kɛ kɔrɔ.”

⁷ Kɔnɔ wo si a fɔ ko, “Ade. N ti ke wo dɛnbɛna. Fɛrɛya-bɔ fenfen sa nde fanan bolo bɔn la. Dɔn-fen fanan sa n bolo. Wo kana nde ma wola kun-tigi la.”

⁸ Ɔnde! Yerusalɛm tinya-koe ara to a ma. Yuda nyamanɛ fanan bi nala bui tinɛ le kɛ la. Anu ya ko-wo-ko fɔ, Mari tanama-koe le wo la. Anu ya ko-wo-ko ma, Mari gboyana-koe le wo la. Anu bi Alla rasɛla bɛɛ yala.

⁹ Hali anu yala-yen si a yira ko anu yilikinɛ. Anu hakɛ sanɛ gbɛ rɔ iko Sɔdɔm kɛnutɛ mara nya min. Anu tinya-koe ara to a ma, ado anu nyɛrɛ gbɛ le wo la, yɔ!

¹⁰ Mɔgɔ-telennɛnu si sewa, ado anu bara-koe si ta yarɔ. Anu si anu tɔrɔ-gbɛnu tɔnɛ sɔrɔn.

¹¹ Kɔnɔ ko-yogoma-kɛlɛnu tinya-koe ara to a ma. Anu ya koe min sigi mɔgɛnu na fɔ wo wa sigi anu denu fanan ma.

¹² Kemini-mɛsɛnu bi nna mɔgɛnu tɔrɔla. Musinu bi kun-tigiyɛ kɛla anu kuma. Anuna mɔgɔ-banu bi anu bolo labirala, ado anu ma a lɔn anu si anu ya-lamunun kun-tigi minnu na.

Mɔgɛnu Kiti-Sa-Koe Mari Bolo

¹³ Mari ara ala sɔ-tinɛ bi kiti fɔ tinɛ. A ara a lakɔɛnma ala mɔgɛnu kiti-koe rɔ.

¹⁴ A ara kumɛ rabɛn ala mɔgɛnuna kun-tiginu anubɛ anuna mɔgɔ-banu kan ma. A ko, “Wo ara bui mɔgɛnu ma ka anuna ki-fannu bi anu bolo. Wola bɔnnu nafanɛ bolo-kolɔnnuna fannu na.

¹⁵ Sereya sa wo bolo ka bui nna mɔgɛnu ma ka bolo-kolɔnnuna bolo-fannu bi anu bolo.” Ale wo Tigi Mari Sɛnbɛ-Bɛɛ-Tigi kan le kɛ la.

Yerusalɛm Musinu Makawandi-Koe

¹⁶ Mari ko, “Yerusalɛm musinu wasi-nya mafɛlɛn. Anu sungban siginɛ tala san ma. Anu bi keminɛnu wululula anu yɛ tɔnkɔn la. Anu bi tala anu tɛbulan ramagala. Anu kin-na-yɔlɔkɔ-kan ye tala bɔla anu kian la se se se.”

¹⁷ Mari ko a si anu tɔrɔ. A ko a si anu kunyɛ gbana ka anu kunya-sondokore to.

¹⁸ Wati ye kela, Yerusalɛm musinu wasinɛ minnu tɔ, Mari si wonu bi anu bolo. Anu kin-na-yɔlɔkɔ wo, anuna kan-na-fen wo, anu kun-na-kɔnɔ wo,

¹⁹ anuna bolo-kalama-dɛɛn wo, a si wonu bi anu bolo. Anu ya-laburun-kura wo,

²⁰ anuna kun-yili wo, anuna makiri-fɛlɛ minnu kirinɛ anu kɛɛ anubɛ anu tɛmɛ la wo,

²¹ anuna bolo-kɔlɔnina-dɛɛn wo, anuna sunna-dɛɛn-koloni wo,

²² anuna duruku-bonni wo, anuna fɛrɛya-bɔ-hakika wo, anuna kura-kɔrɔ-kiri wo, anu bolela bɔrɔ wo,

²³ anuna duruku-kɔrɔ-don wo, anuna da-lafiran-fen wo, anuna kun-makiri-kurɛ wo, anubɛ anuna kan-makɛ-kura wo, a si wo bɛɛ bi anu bolo.

²⁴ Kaka, anu suma-diyamɛ ye bɔla iko tulu-suma-diyamɛ kɔnɔ anu suma-yogomɛ ye nala bɔla tutu! Kaka, anu bi anu buta kirila fen-hakikɛ la kɔnɔ yarɔma, anu bi gbamɛ mala anu butɛ-kiri-fannu na. Kaka, anu kun-sigi-nyimɛ si taran anu kuma kɔnɔ yarɔma anu kunyɛ gbananɛ si to. Kaka, anu bi anu nyɛrɛ makirila kura-nyimɛ la kɔnɔ yarɔma, kura-kore, wo le si taran anu ma. Anuna kinyɛ si ma miliyɛ la.

²⁵ Hali soe wola kɛlɛ-kurugbɛnu, anu kunyɛ si to kɛlɛ rɔ.

²⁶ Kiti-fɔ-tinɛnu si ma di-kɛ-tinɛnu na. Yerusalɛm soe rakolonyanɛ si to iko anu bara digin musi min ma.