Aiseya 29 - ALLALA KUMƐ

Yerusalɛm Danka-Koe

¹ Ile Yerusalɛm so-nyɛrɛ ye dankɛ kɔrɔ, Marita saraka-mintan-tinɛ ye kan min, kɔni. Mansa Dawuda ya ile so-kunbɛ ma a daga makɛ tinɛ la nun. San-dande ladiyɛ wa tenbi,

² Alla si kasarɛ lana soe kɛ ma mɔgɛnu bi min kelela ko, “Allata saraka-mintan-tinɛ.” Di-kɛ anubɛ gbele-gbelan si taran ile rɔ. Soe mumɛ bɛɛ si ma iko saraka-mintan-tinɛ min yamatogonnɛ yele la.

³ Alla nyɛrɛ si i kɛlɛ ka mini ile soe nyɛrɛ ma.

⁴ Yerusalɛm kɛ si ma iko furi tenbi huma-humana kanbɛ rɔ. A kuman-kan ra ti ban gbɛla.

⁵ Sibolo-gbɛrɛ minnu bi nala ile Yerusalɛm kɛlɛla, wonu si fɛ iko fɔnyɔ wa ta gbangban la. Anuna kɛlɛ-den-makilannɛnu, fɔnyɔ si ta wonu na iko bin-gbalɛ. Wo dama si ma tiriya!

⁶ Mari Sɛnbɛ-Bɛɛ-Tigi si na san-sɛran anubɛ dugu-yɛrɛyɛran la wo lakanan-koe la. Mari si wo lakisi fɔnyɔ anubɛ ta-wɛ la.

⁷ Sibolo-gbɛrɛ kɛlɛ-dan minnu bi Yerusalɛm soe kɛlɛla, wonu si tunu yen, iko ko-rayirɛ suyi rɔ. Anuna kɛlɛ-miran bɛɛ si tunu anu ma yen!

⁸ Sibole min bɛɛ kundɛnnɛ Yerusalɛm kɛlɛ-koe la, wonu si ma iko kɔnkɔtoe wa kiyo dɔn-fan la kɔnɔ a kɔnkɔtoe ni kunden. Wonu si ma fanan iko kan-nagbalatoe wa kiyo ko a ye a minna yi la kɔnɔ a ni a lasɔ kan-nagbalɛ la todo!

Tolo-Gbɛlɛyɛ Makawandili-Kumɛnu Ma

⁹ Nba, i raya, i ni ma iko kuntan. I nyɛrɛ ma fiyɔn la alako i kana fen yen. Hali i ma i min, i ni to tonko-tankanna iko gbɛɛtoe.

¹⁰ Mari ara a ma, ile Yerusalɛm ara kinɔgɔ fogbo! Nɛbi minnu bi i yayɛ la, Mari ara wonu yɛ lakiri.

¹¹ Nɛbinuna ko-rayen fenfen-kɔrɛ ti lɔn i bolo bawo anu dogonnɛ i ma. I mani de iko kɛdi min balanta. I wa ta a la karan-mɔgɔ do wara ko a ni a rakaran, a si a fɔ ko a ti ke a karanna bawo a balannɛ.

¹² Ni i tara a la karanbɛlɛ wara ko a ni a karan, a si a fɔ ko a ma a karan-nya lɔn.

¹³ Mari ko mɔgɛ kɛnu bi a fɔla anu da rɔ ko ale Mari di anu ye kɔnɔ a wara-koe sa anu yisi-kunyɛ la. Anuna dina manɛ tɔn anubɛ namunya-gbansan le la. Wo le manɛ anu bolo kuntɔ-karan la.

¹⁴ Woletɔ a ko a si to anu mabanna fitina-gbesili la. Minnu hɛnkili kolo, a ko wonu si ma kun-takolɔn la. Anuna kɛwuyɛ bɛɛ si ma fufafuyi la.

Sinan Yigi Wara-Koe

¹⁵ A sɔgɛ ye minnu na ka anu miriya dogon Mari ma, wonu si halaki. Anu bi pinpirɔ-koe minnu nadanna, anu miri ko mɔgɔ ya sa anu na. Anu ya a lɔn ko mɔgɔ ma a lɔn anu bi min kun na.

¹⁶ Koe bɛɛ rabasannɛ anu bolo. Bɔnku-dagɛ anubɛ a ladannɛ, nyamintan kolo? Hadama-dan ye fan min nadanna, wo si ke a fɔla a ladannɛ ye ko, “Ile ma n nadan.” A ti ke a fɔla a ladannɛ ye ko, “I ye min kun na, i ma wo nya lɔn.”

¹⁷ Iko mɔgɛnu bi a fɔla nya min ko a ti mɛ, fɔgbɛ si ma sɛni sa tinɛ la, sɛni sa tinɛ si ma fɔgbɛ la tun.

¹⁸ Wo tele wa ke tumɛ min, tolo-gberenu tole la si ka ka kɛdi wo karan-kan lamɔɛn. Fiyɔn min bara mɛ a bolo mɛmɛla pinpi rɔ, wonu yɛ la si ka ka fen yen.

¹⁹ Isirɛlata Mari Alla-sɛnimɛ ye sewɛ min dila mɔgɛnu ma, bolo-kolɔn anubɛ mɔgɔ-famayiginɛnu si wo sɔrɔn tun.

²⁰ Minnu si mɔgɔ niyi ragbɛrɛn wo, minnu si Alla rasɛ wo, wonu wara-koe si ka-a-la feu! Hakɛ-tigi bɛɛ si kasara pɔ!

²¹ Mɔgɔ-tɔgɔ-tinyanɛnu wo, minnu bi yo dila ko-yogoma-kɛlɛnu ma wo, minnu bi foninyɛ fɔla alako mɔgɔ-telennɛnu kana yo sɔrɔn wo, Alla si wonu dama halaki.

²² Isirɛlata Mari Alla min ya Iburayima kunyɛ bɔ nanparan rɔ, wo le wara kɛ fɔ Isirɛla mɔgɛnu ye ko, “Wole Yakoba kebilɛnu, wo ti to yarabiyi kɔrɔ tun. Wo kunyɛ si bɔ miliyɛ rɔ.”

²³ A wa ban dan latasakarala wo ma tumɛ min, a ko wo si a lɔn wo le ma ko ale le Isirɛlata Mari Alla-sɛnimɛ la. A ko wo si a gbiliya ka kawa a ma.

²⁴ Kun-takolɔnnu si wuli ko-nya-yenna. Min bi gbunyala karan kɔrɔ, wonu si sewa karan la.