Aiseya 27 - ALLALA KUMƐ

¹ Ninkinankɛ min bi kɔgɔ-yi rɔ, hali a ye a mamagala a buri tinɛ, wo wulɔn nyɛrɛ rɔ, Mari si wo tɔrɔ ata faan-damɛ sɛnbɛmɛ la.

Sundu-Nyimɛ Wara-Koe

² Wo wulɔn nyɛrɛ rɔ, Mari ko mɔgɛnu ni sigi kɛ sa ata ki-fannuna ko rɔ. A ko

³ ale nyɛrɛ le ye anu yi kɛla tuma-wo-tuma. A ye nyɔ makandanna su-ni-tele alako ko kana ma a la.

⁴ A fondo-magboyani ma sundi wola ko la tun. Ni wɔnɛnu si taran nyɔ a si minnu kɛlɛ, fɔ a wa anu mintan gbur!

⁵ Ni a sɔgɛ ye ala mɔgɛnu yogenu na, a ni minnu kumafunfan, a ko anu ni yisi-kimɛ sa a rɔ. Anu ni na anu tɛmɛ rabɛn.

⁶ Wati ye nala, Yakoba kebilɛnu, Isirɛla mɔgɛnu, kɔni, anu si anu suli layigi pon iko kɔlɔma. Anu si gbusu ka fere. Anu gbɔɛ min bi sɔrɔnna nyɔ, duninya mumɛ si tɔnɛ sɔrɔn wo rɔ.

⁷ Ale Mari ya Isirɛla mɔgɛnu yogenu tɔrɔ nya min, anu denu ma tɔrɛ sɔrɔn Mari bolo wo nya. Isirɛla ma foo kei-siyaman na iko anu yogenu.

⁸ Mari ma ala mɔgɛnu tɔrɔ wo nya na fɔ kɛlɛ tara anu na min kɛ. A tara anu na iko fɔn-gbɛlɛmɛ min bi bɔla tele-bɔɛ wara la wo ye tala fen-gbalɛ la nya min.

⁹ Alla-lɔnbɛlɛnuna saraka-mintan-tinɛnu ba ma gbangban la tumɛ min Isirɛla mɔgɛnu bolo, Mari si Isirɛla mɔgɛnu makoto anu hakɛ la wo wati le tɔ. A ti anu makoto fɔ wusura mintan tinɛnu ba ban. A sa nyinina fenfen-lɛsɛni ma tun iko anuna bɛsi-musumɛ Asura manɛ nya min.

¹⁰ Anuna so-gbɛlɛmɛ si to tonbonyɛ la. A ra si kolonya filili iko wula-da-rakolɔn. A si ma tubali-kɛ-tinɛ la ninkinu ye iko anu bi yanba-kun-kurannu dɔnna kan min.

¹¹ Nyɔ-kɔlɔmanu nafɔsɔnɛ, anu bolɔnnu kerikerinɛ. Musinu si nyɔ ma sɔgɔ-nyini-tinɛ la. Mari ya mɔgɛ wo minnu dan, anuna hina-wo-hina ma taran ale rɔ bawo anu ya anu ban a nya-yen-koe ma.

¹² Wo tele-nyɛrɛ rɔ, ka a bi Yufereti bɛ ma ha ka ta a sigi Iyipiti dan la, Mari ko a si ala mɔgɛnu tɔnbɔn kelen-kelenyɛ ma iko mɔgɛ ye dɔn-fan tɔnbɔnna a fofe ya la nya min.

¹³ Wo tele-nyɛrɛ wa ke, buru-kan si bɔ min bi mɔgɛnu takelela ka bɔ Asiriya anubɛ Iyipiti nyamanɛnu tɔ, kɛlɛ tara minnu na, kɔni. Anu si na Mari bato Yerusalɛm soe burɔ ata kɔnkɔ-sɛnimɛ kuma.