Aiseya 25 - ALLALA KUMƐ

Tantoli-Bɛti

¹ Mari, nta Alla le ile la. N si i matɔgɔ ka i gbiliya. I wara kabana-koenu kɛ. I wara min miriya nun, i wara wonu natɔnbagaya, bi ko ma.

² I wara soenu ma sundu-kunyɛ la ka so-latankanɛnu kasara pɔ! Ma yogenu ya bon-hakikɛ min bɛɛ sɔ, wo bɛɛ ara tii mɛmɛ!

³ Nyamani-makawanɛ-mɔgɛnu si i matɔgɔ. Hali karagbɛlɛnu siginɛ soe minnu tɔ, wonu si kilan i la.

⁴ Bolo-kolɔnnu anubɛ fugarɛnu dimatoe ara na i wara anu dɛnbɛn-koe rɔ. Anu bi tɔrɔyɛ rɔ tumɛ min, i ya anu kumafunfan. Fɔn-digidigi-wɛ nanɛ, i mara anu ye bɔn la. Ala kunayɛ tele bolo anu kuma, i mara anu ye ninɛ la. Karagbɛlɛnu taranta anu kan ma iko banda tenbi gbesila dandan la.

⁵ Anu wuyan kolo iko tele-mara-tele. Kɔnɔ ile Mari ya yili kiri ma yogenu wara-koe dan la. I ya tɔn sigi anuna sɔnkɔ-sɔnkɛ la iko banda-finyɛ wa sa tele ya ma.

Ladiyɛ Rabɛn-Koe Alla Bolo

⁶ Mari Sɛnbɛ-Bɛɛ-Tigi si ladiyɛ rabɛn duninya-mɔgɛ bɛɛ ye ata kɔnkɔ-sɛnimɛ kuma. Dɔn-fen-hakikɛ anubɛ minni-fen-diyamɛ su bɛɛ si taran nyɔ.

⁷ Anu tenbi nyɔ, Mari si yisi-magboyɛ bɔ anu ya-denkɛ rɔ iko banda-finyɛ wa bɔ tele ya ma.

⁸ Ma Tigi Mari si tɔn sigi sayɛ la burubukai! A si bɛɛ ya-yi firan a ya-denkɛ rɔ. Ata mɔgɛnu bara yarabiyi min bɛɛ sɔrɔn duninya rɔ, a si miliyɛ wo bɔ anu yɛ la. Mari nyɛrɛ kuman-kan le kɛ la.

⁹ Wo wa ma tumɛ min, bɛɛ si a fɔ ko, “Mata Alla le ale la. Ma ya a ma ma yigi la min kɛ, a ara ma lakanan. Ale le mata Mari la. Ma ara la a la. Ma ara sewa kaka bawo a ara ma lakisi.”

Mohabu Tɔrɔ-Koe Alla Bolo

¹⁰ Mari si ata kɔnkɔ-sɛnimɛ lakanan kɔnɔ Mohabu kɛnu ta si tɛntɛn iko binyɛ anubɛ ninki-nyɛ yabasannɛ ninki kɔrɔ nya min.

¹¹ Alla si anu mayɛlɛn ka anu digin dugi la iko mɔgɛ tenbi a maminna dumɛ tɛma.

¹² A si Mohabu so-latankanɛ bɛɛ tii mɛmɛ hali tarɛ min bi yɛlɛla fulufele! Wo bɛɛ si bui gbangban rɔ.