Aiseya 24 - ALLALA KUMƐ

Duninya Tɔrɔ-Koe Mari Bolo

¹ Mari si duninya kuma kolɔnya filili. A si dugi raburun sagbayi! A si duninya-mɔgɛnu tanyɛnsɛn.

² A si duninya mumɛ kɛ daga kelen tɔ. A saraka-masɔla wo, a saraka-masɔbɛli wo, a yɔɔn wo, a yɔɔn-tigi wo, a fen-mayirala wo, a fen-sanna wo, a sinkali-kɛla wo, a ye sinkala min ma wo, a fen-tigi wo, a bolo-kolon wo, wo bɛɛ si kɛ daga kelen tɔ.

³ Duninya-ratiinɛ si to ka tinya. Mari ara ban a fɔla, ado wo ye mala le serr!

⁴ Dugi si gbala ha a ra ni farafara. Duninya mumɛ si to kɔlɔbɔ! San-kole anubɛ dugu-kole si tuli ka a mafɔsɔ.

⁵ Duninya la ara tinya bawo mɔgɛnu bara Allata tɔnnu tinya ka ata habadan-sarama-kan boloka.

⁶ Woletɔ Alla ara dugi danka ka mɔgɛnu sara anuta ko-yogomɛla ko la. Minnu bara to anu niyi la, donu bi tola bɔla wonu na.

⁷ Nɔnbɔ-kurinu na si fɔsɔ. Anu gbɔɛnu, yi ti taran anu tɔ tun! Mɔgɛ min bɛɛ sewanɛ, wonu yisi ma si gboya.

⁸ Tɔn si sigi anuna bɔlon-fɔɛ anubɛ kɔbɔn-fɔɛ la.

⁹ Sewa-sigi-wo-sigi ti sa tun gbɛɛ min tinɛ. Gbɛɛ ti diya mɔgɔ-wo-mɔgɔ da rɔ tun.

¹⁰ Koe bɛɛ piriki-parakɛ si to soe burɔ. Mɔgɛnu si dɛ balan anu nyɛrɛ ma anu kanan-koe la.

¹¹ Gbɛɛ wa ban, mɔgɛnu si belen worondola soe burɔ. Sewɛ si a buri anu kɔrɔ. A ti taran nyamanɛ rɔ tun.

¹² Anuna soe si ban kasarala feufeu! A don-dɛ si keri.

¹³ A ye mala nyamanɛ bɛɛ la ka le duninya mumɛ bɛɛ rɔ. Duninya si ma iko mɔgɔ wa kɔlɔma anubɛ nɔnbɔ-gbɔɛ bɛɛsi keri. Fenfen ma to.

¹⁴ Kɔnɔ mɔgɔ-dande-nɛ min bi tola, wonu si sigi sa sewɛ bolo. Minnu bi tele-yigi wara la, wonu si Alla makawa-koe fɔ.

¹⁵ Minnu bi tele-bɔɛ wara la, wonu si a tanto. Minnu siginɛ kɔgɔ-yi dafɛ, wonu si Isirɛlata Mari Alla matɔgɔ.

¹⁶ Mɔgɛnu si na Yerusalɛm ka bɔ wula-yan-bɛnu na ka tantoli-bɛtinu bɔ nyɔ. Kɔnɔ yigi-wo-yigi sa nde, Aiseya ma. N fɛrɛ ye banna n ma. N yogenu bi tola n bolo labirala. Anuna wunduyogoyɛ kuma ye tala sala.

¹⁷ Bɛɛ ni a tole masɔ n na. Kumakɔ-gbansan de wo yarɔ. Gbɛrɛ sufa bɛɛ lasiginɛ wo ye ka wo makɔni.

¹⁸ Min tenbi a burila ko-makilannɛ do kɔrɔ, wo ye tala buila denkɛ rɔ. Min tenbi bɔla denkɛ rɔ, wo ye tala birala gbɛrɛ la. San-kole si a dɛ bɔ bandɛ kɔrɔ, ado dugu-kurukɛ-tinɛ nyɛrɛ si yɛrɛyɛrɛn.

¹⁹ Dugi ra si fara, a ra si tii, a dɛ la ni ka.

²⁰ Dugi si to tonko-tankanna iko gbɛɛ-minna-wɛ. A si to magala iko fɔnyɔ si to bugi lamagala nya min. Hakɛ ara a ma, dugi ara gbiliya kirimimi! A wa bui, a ti a lasɔ tun!

²¹ Wati ye nala, Mari si duninya-kun-tiginu anubɛ san-kolo-sɛnbɛ-tiginu tɔrɔ.

²² Alla si kun-tigi wonu nadɛn dugi-kɔrɔ-yele la. Anu namaranɛ si to nyɔ furr ha anu tɔrɔ-wati ni ke.

²³ Karɛ si miliya, tele si a yɛ dogon ka a tɛgɛ Mari Sɛnbɛ-Bɛɛ-Tigita gbiliyɛla ko la. A si a mayigi Yerusalɛm kɔnkɔ-sɛnimɛ kuma ka duninya mara. Kun-tiginu si ata gbiliyɛ yen anu yɛ la.