Aiseya 23 - ALLALA KUMƐ

Sarakanɛ Wara-Koe Taya Soela Ko La

¹ Sarakanɛ le kɛ la Taya kɛnuna ko la. Wole kulun-tawɔli-kɛlɛ minnu bi kɔgɔ-yi kuma, wo ni wo dɛ bolobɔ di-kɛ-tinɛ. Wo bɔra Taya soe min tɔ, wo ara kasara pɔ! Nyɔ-bɔnnu wo, a kulun-nasɔ-tinɛ wo, wo bɛɛ ara tinya pɔ! Wo wa sɛgi ka bɔ Saiparasi tumɛ min, wo si a mankan lamɔɛn.

² Wole Saidon yilanu! Wo ni wo made diyi-kɛ la. Wola kulun-naburilɛnu bara wo ma nɔnfulu-tiginu na.

³ Wonu bi anu burila kɔgɔ-yi kuma ka ta fui-fannu bi Iyipiti nyamanɛ min fɛ-yan yan na! Wonu bi fere-kɛ-tinayɛ la nyamanɛ bɛɛ rɔ.

⁴ Ile Saidon soe. I wara yarabi pɔ! Hali kɔgɔ-yi-dumɛ-tɛmɛ ara a ban i la. Kɔgɔ-yi si a fɔ ko a ma den-wo-den sɔrɔn. A ma den-wo-den makolo.

⁵ Iyipiti kɛnu ba a lamɔɛn ko Taya soe ara tii, anu yisi si tɔrɔ anu ma.

⁶ Wole Tasisi kɛnu, wo ni wo dɛ sa-a-rɔ di-kɛ-tinɛ ka a tɛgɛ Taya bu-koe ma. Wo sɛgi wo warɛ Sipeni nyamanɛ rɔ.

⁷ Bi ko ma, Taya so-diyamɛ min da ara tɛgɛ nun, ile Taya wo le kɛ la bi, wa? Mɔgɛnu ma taran bɔla soe kɛ la nun ka ta so-kurɛnu datɛgɛ?

⁸ Duninya mumɛ bɛɛ ye so-karantan kɛ yilanu gbiliyala nun. Yon ya Taya kɛ tinya-koe rabɛn nun?

⁹ Mari Sɛnbɛ-Bɛɛ-Tigi le ya a rabɛn. A ya ko-rabɛn-kɛ alako ka tɔn sigi ila wasinteyɛ la anubɛ ka ila mɔgɔ-banu namiliya.

¹⁰ Wole Taya kɛnu, fɔ wo wa ma sɛni-salɛnu na iko Iyipiti kɛnu bi nya min bawo kulun-nasɔ-tina woo sa wola nyamanɛ rɔ tun.

¹¹ Mari ara a kɔɛn kɔrɔbi kɔgɔ-yi dafɛ-nyamanɛnu kasara-koe la. A ara a latɛgɛ ko fɔ a wa Kenan kɛnuna so-gbɛlɛmɛnu kasara.

¹² Ile Saidon soe, ita sewɛ ara ban. Ila mɔgɛnu bi tɔrɛ rɔ. Hali anu ya anu buri tala Saiparasi yi-tɛma-dugi rɔ, anu kunyɛ ti bɔ gbaran rɔ.

¹³ Wo ni wo yɛ lata Babilɔn nyamanɛ ma. Nyamani ma a la tun. Asiriyanu buira anu ma ka anuna tarɛnu nabui ka a tonbon-nɛ to. Sogo-feremɛnu denu siginɛ nyɔ gbɛ!

¹⁴ Wole min bi kulun naburila kɔgɔ-yi kuma, wo ni wo dɛ bolobɔ di-kɛ-tinɛ! Wo lanɛ soe min na bɛrɛbɛrɛkɛ, wo le ara tinya kɛ la pɔ!

¹⁵ San bi-wɔrɔnfila si tenbi, mansa kelenta wati, kɔni, mɔgɔ ti a miri Taya soe ma wo wati rɔ. Ni san wonu bara ban, Taya soe kɛ si ma iko anu bi yɛlɛn-musi min sigi sala ko,

¹⁶ Ile yɛlɛn, keinu bara nyina ila ko la. Ila bɔlɔn bi ka soe ratagama. Ila siginu sa ka ila bɔlɔn fɔ min si a ma, keinu yili ni to i ko tun!

¹⁷ San bi-wɔrɔnfilɛ wo wa ban, Mari si sɔn wole Taya kɛnu ni sɛgi anuta wɔli-kɔrɔ-yogomɛ ma tun. Wo si fen-mayirɛ-kɛ duninya mumɛ ma tun.

¹⁸ Wo ye tɔnɛ min bɛɛ sɔrɔnna yilayɛ rɔ, wo si a lasɛgi ale Mari ma fɔrɔsɛ la. Wo ti a lamara wo nyɛrɛ ye. Kɔnɔ wo ye Marita wɔli-kɛlɛnu sarala wodi wonu denu na.