Aiseya 22 - ALLALA KUMƐ

Sarakanɛ Wara-Koe Yerusalɛmna Ko La

¹ Sarakanɛ kɛ nanɛ lɛɛla ko la min bi Yerusalɛm tɔgɔ fɛ. A tɔgɛ le Ko-Rayira-Lɛɛ. Nfen bi ma-tinɛ wo la? Wole so-burɔ-mɔgɛnu, wo ye nfen sewala wola bɔnnu kuma?

² A lasɔnkɔnɛ so-burɔ-mɔgɛ bɛɛ bolo. Mɔgɛ bɛɛ sewanɛ. Wola kɛlɛ-dan minnu bara faga kɛlɛ rɔ, wonu ma faga kɛlɛ-kɛ-tinɛ.

³ Yanni wo yogenu ni gbɛrɛn wo ma, wo ya a taran, wola kun-tiginu wulita anu burila. Kɔnɔ yanni kun-tigi wonu ni anuna kalabɛnnu tasagan, anu yogenu ya anu bira.

⁴ Wo ni nde, Aiseya kelan to, woletɔ n si di biribiri nna mɔgɛnuna ko la minnu bara faga nun kɔrɔma la. Hali wo ma n madiya.

⁵ Ko-Rayira-Lɛɛ wo rɔ, fenfen sa nyɔ fɔ kumakɔɛ anubɛ nɔ-koe anubɛ yisi-tɛgɛ, ado ma Tigi Mari Alla Sɛnbɛ-Bɛɛ-Tigi ya wonu nana ma kuma. Tarɛ min mininɛ mala soe ma, wo ara bui. Diyi min bɛɛ kɛra, kɔnkɛnu ya wo kuli wonu nabira.

⁶ Ilam kɛlɛ-dannu bi nala anu siginɛ soeenu na. Kalabɛn ye anu dama bolo tɛrr! Kɛlɛ-dan minnu bɔra Kira nyamanɛ rɔ, wonu tabɛnnɛ kɛlɛ-kɛ-koe la anuna kɛlɛ-mirannu bi anu bolo.

⁷ Lɛɛ dugu lamonɛ min bɛɛsi ye Yuda nyamanɛ rɔ, wo bɛɛ lafanɛ kɛlɛ-kɛ-kirindinu na. Kɛlɛ-dan-so-laburilɛnu sɔnɛ Yerusalɛm don-dɛ telen tɔ.

⁸ Yuda kɛnu ma ke anu nyɛrɛ kumafunfanna mumɛ! Wo mara tumɛ min, wo ya kɛlɛ-miran bɛɛ labɔ anu namara tinɛ.

^9-10 Tarɛ kan tinɛ min takerinɛ, wo ara wonu yen wo yɛ la. Wo ara bon-korenu tii alako wo si bɔn wonu kurinu bi nya min ka tarɛ ladan wonu na.

¹¹ Wo ya yi lamara tinɛ ladan soe dugu la alako wo si kantɔ-yi lamara min tɔ. Kɔnɔ wo ma wo tole masɔ Alla la muk! Bi ko ma, Alla ara ban kɛ bɛɛ miriyala nun, woletɔ a ara ma fanan.

¹² Wo wati rɔ, ma Tigi Mari Sɛnbɛ-Bɛɛ-Tigi ya a fɔ wo ye ko wo ni wo kunyɛnu gbana ka kasa-durukinu bila wo kan na di-kɛ-tinɛ

¹³ kɔnɔ wo ma wo ma. Wo ya wo nyɛrɛ ladiyɛ anubɛ tolon-minyɛ buta a ma. Wo ya kolo-fannu faga ka anu dɔn iko a di wo ye nya min. Wo ya wo min kolikoli! Wo ya a fɔ ko, “Min fisa, a bɛnnɛ ma ni fen dɔn ka ma min bawo ma ye nala fagala le sina.”

¹⁴ Ma Tigi Mari Sɛnbɛ-Bɛɛ-Tigi nyɛrɛ le ya a fɔ n ye ko fananta anu bi anu niyi la, a ti anu makoto anu sɔn-yogomɛ kɛla ko la muk! Ale Mari Sɛnbɛ-Bɛɛ-Tigi kan le kɛ la.

Mansɛla Fen-Fɛ-Biralɛ, Sɛbana Makawandi-Koe

¹⁵ Ma Tigi Mari Sɛnbɛ-Bɛɛ-Tigi ya a fɔ n ye ko n ni ta mansɛla fen-fɛ-biralɛ wara, min tɔgɛ Sɛbana. A ko n ni a fɔ a ye ko,

¹⁶ “Ile miri ko nfen bi ile la mansɛ wara yan? Yon ya a fɔ i ye ko i ni i nyɛrɛ kanbɛ sin farɛ rɔ yan?

¹⁷ Hali mɔgɔ-ba le ile la, Mari si i fɔrɔn ka i lakɛ a rɔ pirr!

¹⁸ A si i lamondo ka i lakɛ-a-rɔ nyamani-wɛ do rɔ iko bɔli. I yɛ bɔnɛ kirindi min bɛɛ la, i si faga wonu dafɛ. I wara yarabiyi ladon i tigi warɛ bɔn la.

¹⁹ Ale Mari si i wurun ila sɔ tinɛ rɔ ka i wara-koe layigi don!

²⁰ “Wo wa ma tumɛ min, ale Mari ko a si kilayɛ lata Helikayala den Ilayakim ma ko a ni na.

²¹ Wo wa na tumɛ min, Mari ko a si ila sɔ tinɛ di ale Ilayakim ma ka ila mɔgɔ-baya-duruki don a kan na anubɛ a butɛ-kiri-fan. Wo si ma Yuda kɛnu anubɛ Yerusalɛm kɛnu fa la.

²² Ale si ma mansɛla kandɛ la Mansa Dawudala kebilɛ rɔ. Ale si ma da-nyin-maralɛ la. Ni a ya min naka, wo la ara ka. A wa min balan, wo ara balan.

²³ A si ma iko kɔlɔma min gbangbannɛ dandan ma, a lamagala fenfen ti taran. Ale wara-koe si a ma, ala kebilɛ ni gbiliyɛ sɔrɔn.

²⁴ “Kɔnɔ hali wo, a kebilɛ mumɛ si ma dunɛ la a kuma. Anu dunnɛ si to a la iko mɔgɛ wa kɔlɔma gbangban bon-kɔgɔ rɔ ka dunu-gbilimɛ dun a la.

²⁵ Ado nfan, wo wa ma, kɔlɔma min gbangbannɛ bon-kɔgɔ rɔ gben, wo si to magala ka bui dugu ma. Min bɛɛ dunnɛ a la, wo bɛɛ wara-koe si ka-a-la.” Mari kan le kɛ la.