Aiseya 21 - ALLALA KUMƐ

Ko-Rayirɛ Wara-Koe Babilɔn Labui-Koe Rɔ

¹ Sarakanɛ le kɛ la Babilɔn wara-koe rɔ. Kasarɛ si na firifirila iko tɔnkɔlɔn ka bɔ nyamani-makilannɛ do rɔ.

² N ya min yen ko-rayirɛ wo rɔ, yanfɛ anubɛ kasarɛ. Ilam kɛlɛ-dannu, wo ni wo sɛbɛ don! Midiya kɛlɛ-dannu, wo ni wo bui soenu ma! Babilɔn kɛnu bara tɔrɔyɛ min nana, Alla si yili kiri wo dan la.

³ N bara min tayen anubɛ n bara min namɔɛn ko-rayirɛ kɛ rɔ, wo ara dumɛ anubɛ kumakɔɛ tenbi n tɔ iko musi wa wuli a nyɛrɛ-masɔrɔn la.

⁴ N bi yɛrɛyɛrɛnna yisi-tinyɛ bolo. N hɛnkili latɛgɛnɛ wura-makɔnɛ ma kɔnɔ yaga, wo ye a labanna n bolo kumakɔɛ le la.

⁵ N ya min yen ko-rayirɛ wo rɔ, ladiya-wati ara ke. Gbolo-rafulennɛ ye sala fen-dɔnnɛnu ye. Bɛɛ ye fen-dɔn kun na. Tiriyante wo rɔ, kuman-kan bɔra ko, “Kɛlɛ-dannu, bɛɛ ni ala kɛlɛ-miran bi!”

⁶ Wo kɔma, Mari ya a fɔ n ye ko n ni ta kila-mafɛlɛnnɛ sigi. Ni wo ya ko-wo-ko rayen, a ni wo fɔ.

⁷ Ni a ya soeenu yen nala fila-filanyɛ ma mɔgɛnu siginɛ wonu na, ado a ni donu siginɛ yen nala sofɛlɛ anubɛ nyomɛnu na, a ni wonu nakɔrɔsi bɛrɛbɛrɛ-wɛ-kɛ!

⁸ Wo kɔma, kila-mafɛlɛnnɛ ya a fɔ ko a sɔnɛ a gbɛ rɔ su-ni-tele.

⁹ A ma mɛ lefan, a ya so-laburilɛ wonu yen nala fila-filanyɛ ma. So-laburilɛ ya a kan lake ko, “E, Babilɔn ara bui! Anu bi bɛsɛ minnu kɔla, wonu takerikerinɛ belenna Babilɔn soe burɔ.”

¹⁰ Nta Isirɛla mɔgɛnu, Babilɔn bu-koe kɛ ara wo mankulan bɔ wo ma. Wo ara gbesi iko fui-fan kɔnɔ n bara kuma-nyimɛ lamɔɛn Isirɛlata Mari Alla Sɛnbɛ-Bɛɛ-Tigi la.

Sarakanɛ Wara-Koe Idɔm Kɛnuna Ko La

¹¹ Sarakanɛ le kɛ la Idɔm kɛnuna ko la. Mɔgɛ do ye n takelela ka bɔ Idɔm nyamanɛ rɔ, a ko, “Ile kila-mafɛlɛnnɛ, wati yili tonɛ gbɛ yanni bandɛ ni ka?”

¹² N ya wo yabi, n ko, “Bandɛ sa mɛla kala tun kɔnɔ suyi bilanɛ wo kɔma. Ni nyinikali-sa-soge ye i la, tana ma, nyinikalɛ sa tun.”

Sarakanɛ Wara-Koe Arebiya Kɛnuna Ko La

¹³ Sarakanɛ le kɛ la Arebiya kɛnuna ko la. Wole Didan kɛ minnu bi wo daga makɛla wula-da-rakolɔn rɔ,

¹⁴ mɔgɔ kan-nagbalanɛ minnu bi nala wo wara, wo ni yi di anu ma. Wole Tema kɛnu, wo ni dɔn-fan di kɛlɛ-kɔrɔ-burilɛnu ma.

¹⁵ Kalabɛn wo, faan wo, kɛlɛ-masibɛ wo, mɔgɛ kɛnu bi anu burila wonu denu kɔrɔ.

¹⁶ Wo kɔma, Mari ya a fɔ n ye tun ko yanni san kɛ ni tenbi, Kedari kɛ minnu makawanɛ, wonu wara-koe si ka-a-la.

¹⁷ Hali a kalabɛn-lakɛla-wɛ minnu bi Kedari, wonu dande le si to anu niyi la. Ale Mari Isirɛlata Alla kan le kɛ la.