Aiseya 16 - ALLALA KUMƐ

Mohabu Kɛnu Yigi-Tɛgɛ-Koe

¹ Mohabu kɛ minnu siginɛ Sela soe burɔ wulɛ rɔ, wonu tara saga-dan la Yerusalɛm mansɛ sanbayɛ la ka a kɔntɔ diya bawo anu bara taran a kɔrɔ.

² Anuna musinu tara anu nabɛn tinɛ Anɔn bɛ dafɛ. Anu makinikininɛ sɔnɛ nyɔ iko fen ba porokɔlɔ koni-dannu ma anu nyagan rɔ.

³ Kilayɛ wonu ya a fɔ Yuda kɛnu ye ko, “Ma si min ma, wo ni wo fɔ ma ye. Ma ni taran wo kɔrɔ iko mɔgɛ tenbi kɔlɔma-ninɛ kɔrɔ taraba-tele-wati. Kɛlɛ-kɔrɔ-burilɛ le male la. Wo ni ma dogon kan do rɔ, mɔgɔ ti sui ma ma kan min.

⁴ A sɔgɛ ye ma la, ma ni sigi wo fɛ wola nyamanɛ rɔ alako wo ni ma lakanan ma yogenu ma.” Lunyɛ do, tɔrɔyɛ anubɛ kasarɛ si bɔ nyamanɛ wo kun na, yɔ! Nyamani-tinyanɛnu si bɔ nyɔ kuma lunyɛ do.

⁵ Wo wati rɔ, Dawuda bɔnsɔn-mɔgɛ do si ma mansɛ la. A si ala mɔgɛnu mara keninteyɛ anubɛ lanayɛ la. A la si tiriya ko-latelennɛ ladanna. A si mɔgɛnu sɔ telenbagayɛ kilɛ rɔ.

⁶ Yuda kɛnu ko, “Ma ya a lamɔɛn ko Mohabu kɛnu wasira dɔgɔma-ma-de! Hali anu wasinɛ ka a dan-natenbi kɔnɔ anu kɔgɔ-raka-koe, fufafu le wo la.”

⁷ Mohabu kɛnu si di ka a tɛgɛ anuna tɔrɔyɛ ma. Anu ba anu miri dɔn-fen-diyamɛnu bara-koe ma anu duruta min dɔnna Kiri-Harɛsɛti soe burɔ, wo si a ma, anu yisi ma ni gboya dɔgɔma-ma-de!

⁸ Nɔnbɔ-sɛnɛ min bi Hɛsibɔn soe anubɛ Sibima soe dafɛ, sibolo-gbɛrɛ-mansɛnu bara wonu tinya feu! Fɔlɔ nun, nɔnbɛ wonu yili si ta furr fɔɔ Yasa soe pon, anubɛ wulɛ min bi tele-bɔɛ wara la. A ye tala tun furr fɔɔ Dalɛ Faganɛ kan kɔma tele-yigi wara la.

⁹ Nna diyi-kɛ-kɔrɛ tɛgɛnɛ Sibima anubɛ Yasa nɔnbɛnu denu tinya-koe ma. N ya-yi ye yigila Hɛsibɔn anubɛ Ɛlɛyela soenuna ko la bawo fui-fen-tɛgɛta fenfen sa nyɔ min si mɔgɛnu nasewa.

¹⁰ Mɔgɔ-wo-mɔgɔ nyagalenni ma anuna sɛnɛ rɔ tun. Sewa-sigi fenfen sa nyɔ rɔ. Nɔnbɔ-gbɔ-burunna fanan sa nyɔ tun. Sewa-sɔnkɔ-sɔnkɔ bɛɛ ara ban.

¹¹ N bi kurunna Mohabu kɛnuna ko la iko anu tenbi bɔlɔn fɔla saya-koe kuma. N yisi tinyanɛ Kiri-Harɛsɛti soela ko la.

¹² Mohabu kɛnu bi tala anuna bɛsi-kɔ-tinɛnu tɔ kɔnkɛnu kuma min kɛ, anu bi anu nyɛrɛ fɛrɛ tinyana wola ko la kɔnɔ anu ti tɔnɔ sɔrɔn wonu tɔ.

¹³ Mari ya sarakanɛ min don nde, Aiseya bolo Mohabu kɛnuna ko la fɔlɔ nun, wo le kɛ la.

¹⁴ Mari ara a fɔ kaka tun ko, “San fila a sawa nyɔgɛ, Mohabu kɛnuna nɔnfuli si ban anu bolo feufeu! Mɔgɔ-dande le si to a niyi la, ado wonu fanan ta si faga kuluba!”