Aiseya 15 - ALLALA KUMƐ

Mohabu Kasara-Koe Alla Bolo

¹ Kilayɛ le kɛ la Mohabu kɛnuna ko la. Ari soe anubɛ Kira soe kasarata su kelen de kɔrɔ. Mohabu nyamanɛ mumɛ bɛɛ siginɛ a la yen!

² Dibon so-burɔ-mɔgɛnu ye tala anuna bɛsi-kɔ-tinɛ kɔnkɛ kuma kesi-koe la. Mohabu kɛnu ya Nibɔ anubɛ Midaba so-tinyanɛ yen min kɛ, anu donta anu sɔnsɔn rɔ diyi-kɛ bolo. Anu ya anu kunyɛ gbanna ka anu dɛ masii ka a yira ko anu yisi tinyanɛ.

³ So-burɔ-mɔgɛnu ya kasa-kurɛ don anu kan na. Mɔgɛnu bi dila anuna kundɛn tinɛnu tɔ anubɛ anuna bɔnnu burɔ.

⁴ Hɛsibɔn kɛnu anubɛ Ɛlɛyela kɛnu bi anu dɛ sala-a-rɔ. Anu di-kɛ-kan ye tala fɔɔ Yehasi soe. Anuta kɛlɛ-dannu tora yɛrɛyɛrɛnna yutoyɛ bolo.

⁵ Nde, Aiseya yisi tinyanɛ Mohabu kɛnuna ko la. Minnu ya anu buri, wonu tara fɔɔ Sohari soe anubɛ Igilati-Sɛlisiya soe burɔ. Donu bi yɛlɛla dila Lohati soe kilɛ la. Donu bi tala anu dɛ sala-a-rɔ Hɔrɔnayim soe burɔ.

⁶ Yi-nɛ min tɔgɛ Nimirim, wo ara gbala todo, ado binyɛ min bi a dala, wo bɛɛ ara fɔsɔ. Fenfen nanfani ma to nyɔ.

⁷ Filon min tɔgɛ Arabin, mɔgɛnu bi buri kɛla dogon tɔ anu bolo-fan na nyɔ le.

⁸ Nyamanɛ minnubɛ Mohabu kɛnu dan-masanɛ, wonu bi Mohabu kɛnu worondo-kan lamɔɛnna. Ɛkilayim so-burɔ-mɔgɛnu anubɛ Biyɛrilim so-burɔ-mɔgɛnu bi anu worondo-kan lamɔɛnna fanan.

⁹ Bɛ min bi yigila Dibon soe dafɛ, yele sanɛ ye yigila wo kuma nyɔ rɔ kɔnɔ koe do lamaranɛ Alla bolo min gbɛlɛ a fɔlɔtɛ kɛ ko. A mɔgɛ toe minnu tonɛ Mohabu nyamanɛ rɔ, wonu faga-bole si ma iko yarɛ wa kɛ mɔgɛ min ma.