Aiseya 11 - ALLALA KUMƐ

Yisi-Kima-Mansayɛ Wara-Koe

¹ Dawudata mansaya-bɔn manɛ iko kɔlɔma min tɛgɛnɛ a la, a kɔn-kundi tonɛ dugi rɔ. Iko kɔn-kundi wo ye a matiila nya min, mansɛ do si fɛrɛn Dawuda kegeyɛ rɔ wo nya na le.

² Marita Sɛnbɛ si hɛnkili di mansɛ wo ma. A si hɛnkilimayɛ anubɛ mɔgɛnu-namara-hɛnkili di a ma. A si Mari sako lɔn ka a gbiliya.

³ A si sewa Marita kuma-birɛ la. A wa mɔgɔ kiti, a ti mɔgɔ yiliki anu koe fɛ, ni wo ma, a yen-nya fɛ.

⁴ A si bolo-kolɔnnu kiti telenbagayɛ la. A si mɔgɔ-tɔrɔnɛnu dɛnbɛn anu yoe wara-koe rɔ. A wa ban min yilikila, wonu si tɔrɔyɛ le sɔrɔn, ado a si wunduyogenu faga.

⁵ A si ala mɔgɛnu mara lanayɛ anubɛ telenbagayɛ la.

⁶ Wati wo, sagɛnu anubɛ sulukinu si to anu nyɔgɔn fɛ kan-tina-kelen. Kulinu anubɛ baanu si anu sa kan-tina-kelen. Ninki-dan anubɛ yara-dan si fan dɔn kan-tina-kelen, ado dennɛ si to anu fɛ-birala.

⁷ Ninkinu anubɛ sogo-feremɛnu si anu de-nyini kan-tina-kelen. Wonuna dannu si anu sa yisi-kimɛ rɔ. Yarɛ si binyɛ tɛgɛ iko ninki.

⁸ Dennɛ si tolon duguma-fen-maralamɛ da fɛ, ko-wo-ko ti ma dennɛ wo la.

⁹ Kɛnu fenfen ti ko ma anu nyɔgɔn na. Anu ti anu nyɔgɔn kasara Yerusalɛm kɔnkɔ-sɛnimɛ ma. Iko kɔgɔ-yi siya nya min, nyamanita-mɔgɛnu hɛnkili ye siyayala wo nya na le.

Kɛlɛla Mɔgɔ-Biranɛnu Sɛgi-Koe

¹⁰ Wati ye nala, mansa-kurɛ do si bɔ Dawuda bɔnsɔn rɔ, wo si ma tamasere la duninya bɛɛ ye. Sibolenu na si dɛn ata mansaya-soe burɔ ka nyɔ gbiliya.

¹¹ Wo wati wa ke, Mari si ata sɛnbɛ lawɔli alako ata mɔgɛ minnu bi Asiriya anubɛ Iyipiti ni sɛgi anu barɛ tun. Iyipiti nyamanɛ dugu la wo, Sudan nyamanɛ wo, Ilam nyamanɛ wo, Babilɔniya nyamanɛ wo, Hamati nyamanɛ wo, kɔgɔ-yi-dafɛ-nyamanɛnu wo, yi-tɛma-nyamanɛnu tɔ wo, anu si na ka bɔ wo bɛɛ rɔ.

¹² Mari tenbi Isirɛla mɔgɛnu anubɛ Yuda mɔgɛnu kundɛnna ka bɔ duninya-tonko-nanɛ bɛɛ rɔ, a si falafalɛ layɛlɛ tamasereyɛ la ka wo yira duninya bɛɛ la.

¹³ Isirɛla mɔgɛnu ti Yuda mɔgɛnu makeliya tun, ado Isirɛla yoge ti ma Yuda la tun.

¹⁴ Anu dama si ta anu nyɔgɔn fɛ ka bui Filisitinu ma tele-yigi wara la. Anu si ta anu yogenu bolo-fan toronde anu na tele-bɔɛ wara la. Idɔm kɛnu wo, Mohabu kɛnu wo, Amonnu wo, wonu damasi si to anuna sɛnbɛ kɔrɔ.

¹⁵ Mari si a ma, Kɔgɔ-Yi-Wulen bolɔn doi ni gbala todo! A si fɔn-kalamɛ lana min si Yufereti bɛ gbala todo! Fɔ yi-ni wɔrɔnfila, wonu denu dɔrɔn bi tola anu worɔn la. Mɔgɛ si a kian latenbi anu kuma.

¹⁶ Isirɛla mɔgɛ minnu bi bɔla Asiriya, a si ma kila-wɛ la wonu ye. A si ma anu na iko a mara anu benbanu na, wo tumɛ anu bi bɔla Iyipiti.