Aiseya 10 - ALLALA KUMƐ

¹ Gbalo ye wole sereya-radunɛ nadannɛnu ma minnu bi nna mɔgɛnu tɔrɔla.

² Wo kɛ-nya le wo la alako bolo-kolɔnnu kana na yo sɔrɔn, ado wo ye kɛɛ-musinu anubɛ kelennɛnu kankanna wo nya na le.

³ Alla wa a lasɔ wole tɔrɔla, wo si nfen ma gbɛ? A wa kasarɛ lana wo kuma ka bɔ nyamani-yan rɔ, wo si na nfen ma? Wo burimatoe si ta yon bara wo dɛnbɛn-koe rɔ? Wo si wola fen-da-gbɛlɛnu dogon mintɔ?

⁴ Wo kunyɛ si to kɛlɛ rɔ, ni wo ma, kɛlɛ si ta wo la pon! Kɔnɔ hali wo, wo ti a ma, Marita fondo-bɔɛ ni ban. Ha bi, Mari kɔɛn kɔrɔbinɛ wo tɔrɔ-koe la.

Asiriya Mansɛ Ma-Koe Kɛlɛ-Miran la Alla Bolo

⁵ Mari ko wole Asiriya kɛnu! A ko a fonde bɔnɛ mɔgɛ minnu kan ma, a si wole bi ka wo ma gbelekɛ la anu kɛlɛ tinɛ.

⁶ A ko a ara wo latugu Alla-lɔnbɛlɛ donu kan ma bawo anu bara a ladiminya. A ara wo lata bumalɛ anubɛ kankanyɛ anubɛ Yuda kɛnu tatɛntɛn tinɛ ka anu ma iko gbangban.

⁷ Mari ko karagbɛlɛyɛ rabɛnnɛ Asiriya mansɛ nyɛrɛ bolo sibolo-gbɛrɛnu kan ma. A ara a wakila ka anu siyaman kasara.

⁸ Ale mansɛ ye a nyɛrɛ matɔgɔla ko, “Nna kɛlɛ-kurugbɛ, wo bɛɛ mansa!

⁹ Kalano soe wo, Kakemisi soe wo, Hamati soe wo, Arapadi soe wo, Samariya soe wonubɛ Damasika soe, n bara soe kɛ bɛɛ bira-a-la.

¹⁰ Nyamanɛ minnu bi bɛsɛnu kɔla, n bara ban wonu tɔrɔla, ado nyamanɛ wonuna bɛsɛnu makawara ka tenbi Yerusalɛm anubɛ Samariya kɛnutɛ la.

¹¹ N bara ban Samariya kɛnubɛ anuna bɛsɛnu tinyana, ado n bi wo le nyɔgɔn mala Yerusalɛm kɛnu anubɛ anuta bɛsɛnu na.”

¹² Kɔnɔ Mari ko min di a ye, a wa ban wo sigila Yerusalɛm kɛnu ma, a ni to a ya-lamununna Asiriya mansɛ kɛ la ka a tɛgɛ ala nyɛrɛ-matɔgɛ anubɛ ala wasinteyɛ ma.

¹³ Asiriya mansɛ ye a nyɛrɛ matɔgɔla ko a kelen pe le ya wo dama ma ata sɛnbɛ anubɛ kɛwuyɛ la. A ko ale le ya nyamani-siyaman nana ata fanka kɔrɔ. Fan min bɛɛ maranɛ nyɔnu tɔ, a ko ale le ya wonu toronde anu na. A ko a ya nyɔ-mansɛnu don a kian kɔrɔ iko tura-feremɛ wa bore radondon.

¹⁴ A ko sibole min bɛɛ ye duninya rɔ, wonu mani de iko sisi-kililamɛ. A ko a ya anu bolo-fan bi anu bolo iko mɔgɛ ye sisi-kili bila nya min. A ko a ma kanban tagbesi a ma, ni wo ma ka a gbɔnkan.

¹⁵ Kɔnɔ ale Mari ko tɛgɛran si a fɔ ko a sɛnbɛ kolo a lawɔlilɛtɛ ko? Sɛrɛ sɛnbɛ kolo a lawɔlilɛtɛ ko? A ko gbelekɛ ti mɔgɛ kɔrɔbi. Mɔgɛ le si gbelekɛ kɔrɔbi.

¹⁶ Ma Tigi, Mari Sɛnbɛ-Bɛɛ-Tigi ko kɛlɛ-den bu lafanɛ minnu bi nyɔ, a si kiraya-fitinɛ lana wonu ma alako wonu si bara wao! A ko anu fɛrɛ-kaliyanɛ si to kodokodo, iko tɛ wa sigi fen na.

¹⁷ Alla min bi kala-malanyɛ la Isirɛla mɔgɛnu ye, wo ko a si ma ta-wɔnkɔrɔmɛ la. Isirɛla mɔgɛnuta Mari-sɛnimɛ si yɛlɛman ta-mɛlan la. A ko a si fan bɛɛ mintan tele kelen kɔrɔ hali wɔnɔ-firɛ.

¹⁸ A gbɔngbɔn wo, a sɛni-sa-tina wo, wo bɛɛ si mintan gburr, ado a ko kirayɛ si to mɔgɛnu fagala wo nya na le tolon!

¹⁹ A ko kɔlɔma kelen-kelan minnu bi tola, hali denni-pɔipɔi si ke wonu danna le.

Mɔgɛ Dande-Nɛ Sɛgi-Koe

²⁰ Wati ye nala, a Isirɛla mɔgɛ toe min bi tola wonu ti anu yigi sa nyamanɛ wo la min bara a raya anu kasara-koe ma. Wo wati le tɔ, anu si anu yigi sa Isirɛlata Mari Alla-sɛnimɛ rɔ.

²¹ Isirɛla mɔgɛnu kolo-dande si anu kɔ-sɛgi anuta Alla Sɛnbɛ-Bɛɛ-Tigi ma.

²² Isirɛla mɔgɛnu siya iko kɛnkɛn kɔnɔ anu kolo-dande-nɛ le sɛgila dɔrɔn. Kasarɛ lamaranɛ bondɔn la Isirɛla mɔgɛnu ye, ado a bɛnta, anu ni a sɔrɔn de, yɔ!

²³ Ma Tigi, Mari Sɛnbɛ-Bɛɛ-Tigi si kasarɛ lana nyamanɛ mumɛ bɛɛ rɔ iko a ara ban a latɛgɛla nya min.

Asiriya Kɛnu Tɔrɔ-Koe Mari Bolo

²⁴ Ma Tigi, Mari Sɛnbɛ-Bɛɛ-Tigila mɔgɛ minnu siginɛ Yerusalɛm soe burɔ, wo ye a fɔla anu ye ko anu denu kana kilan Asiriya wonu na hali Asiriyanu bara a lakunaya anu kuma iko Iyipiti kɛnu ya a ma nya min nun.

²⁵ A ko wati-kundu-ni ba tenbi, a si a fara wo tɔrɔla. A ko wo kɔma, a ni a ya-lamunun Asiriyanu na ka anu tɔrɔ.

²⁶ A ko a si anu natɛn gbɛn la iko a ya Midiyannu natɛn gbɛn la nya min Ɔrɛbu kuri dafɛ. A si anu tɔrɔ iko a ya Iyipiti kɛnu tɔrɔ nya min nun Kɔgɔ-Yi-Wulan dala.

²⁷ Mari ko wati wo wa ke, a ko a si wo bɔ Asiriyanu bolo la. Wo ti ma yɔɔnnu na anu kɔrɔ tun.

Asiriyanu Bui-Koe

²⁸ Ma yogenu bara Eyai soe bira-a-la. Anu tenbira Mikirɔn soe burɔ. Anu ya anuna dɔn-fannu to Mikimasi soe burɔ.

²⁹ Anu bara tenbi kɔnkɔ-gbɛran la ka ta ki Kiba soe burɔ. Rema so-burɔ-mɔgɛnu kun ma ara kɔ dɔgɔma-ma-de! Kibiya soe, Mansa Sɔli sɔrɔnta kan min, nyɔ-mɔgɛ bɛɛ ara anu buri.

³⁰ Wole Kalimu mɔgɛnu, wo di soee! Wole Layisa kɛnu, wo ni wo tole rabalan. Wole Anatɔti kɛnu, wo kofu wo ta-nyɔgɛnu ma di-kɛ-tinɛ.

³¹ Wole Madimɛna kɛnu anubɛ Kebim kɛnu, wo ye wo burila wo niyila ko la.

³² Ma yogenu daga-makɛnɛ Nobi soe burɔ bi. Anu bi nyɔ, anu bi anu kɔnkɔnna Yerusalɛm soe ma.

³³ Kɔnɔ Ma Tigi, Mari Sɛnbɛ-Bɛɛ-Tigi si anu murundu iko kɔlɔma-bolɔn wa bɔ kala san ma, wo ramurundula dugu ma nya min. Minnu bara anu nyɛrɛ kɔrɔbi ka ma iko kɔlɔma-layan-bɛ sore, wonu si keri anu kun tɔ ka yarabi.

³⁴ Mari si ta wo yogenu sala a ma nɛnɛrɛ, iko mɔgɔ wa don tɛgɛrɛn damɛ la i bolo gbɔngbɔn-kɔgɔnɛ rɔ. Iko anu bi Lɛbanan kɔlɔma-kolomɛnu tɛgɛla nya min, wo yogenu bi tala fagala wo nya na le.