Kɛwɔlɛnu 9 - ALLALA KUMƐ

Sɔli Yɛlɛma-Koe Dɛnkɛninya-Mɔgɛ La

¹ Wo wati rɔ, Sɔli tora a kɔnkɔnna Marila karan-dannu ma anu faga-koe la. A tara saraka-masɔla-kun-tigi-wɛ wara

² ka kɛdinu manyinika a bolo minnu si ale Sɔli wara-koe fɔ Yahudiyanuna dina-bon-kun-tiginu na Damasika soe burɔ. Kɛdi wonu ko ni a ya mɔgɔ-wo-mɔgɔ taran Marita kilɛ fɛ nyɔ, a ni wo bira ka ta wo la Yerusalɛm, kei wo, musu wo.

³ A ye tala Damasika soe magbenna tumɛ min, ado a ara gbɛrɛn nyɔ ma, wan-belebele bɔra san-kole rɔ ka ala foolɛ bɛɛ lamalan.

⁴ Sɔli buira dugi ma. A ya kuman-kan lamɔɛn. Wo ye a fɔla a ye ko, “Sɔli! Sɔli! I ye n tɔrɔla nfenna?”

⁵ Sɔli ya nyinikalɛ kɛ ko, “N fa, yon bi ile la?” Kuman-kan wo ko, “Yisa le nde la, i ye min tɔrɔla.

⁶ Kɔnɔ i lasɔ. I ni ta soe. I ye nala min mala gbɛ, mɔgɛ do si na wo fɔ i ye nyɔ.”

⁷ Nba, minnu bi tala Sɔli fɛ, wonu sɔnɛ tora. Anu ma ke kumala. Anu ya kuman-kan wo lamɔɛn kɔnɔ anu ma mɔgɔ-wo-mɔgɔ yen.

⁸ Sɔli ya a lasɔ gbɛ! A ya a yɛ laka kɔnɔ a ma ke fen yenna. Woletɔ anu ya a bole bira ka ta a la Damasika soe burɔ.

⁹ Tele sawa, a ma ke fen yenna. A ma fenfen dɔn hali ka a min wo wati mumɛ bɛɛ kɔrɔ.

¹⁰ Yisata mɔgɛ do ye Damasika nun, a tɔgɛ Ananayasi. Mari kumara wo ye ko-rayirɛ rɔ ko, “Ananayasi.” A ya a labira ko, “Mari, n bi yan.”

¹¹ Mari ya a fɔ a ye ko, “I ni i rabɛn. I ni ta Yudasila bɔn la kilɛ dafɛ min tɔgɛ Kila Telennɛ. I ni Tarasa kɛ Sɔli manyinika. A ye madiyali kɛla nyɔ.

¹² Ale Sɔli fanan ara ko-rayen-kɛ nun. A ara kei do yen nala a wara ala ko-rayirɛ wo rɔ nun min tɔgɛ Ananayasi. A ke nyɔ, a ya a bole sa a kuma ko-rayirɛ wo rɔ alako a yɛ la ni ka.”

¹³ Ananayasi ya a yabi ko, “Mari, kei wo ara ko-yogomɛ min kɛ ila mɔgɛnu na Yerusalɛm soe burɔ, mɔgɔ-siyaman bara wo wara-koe fɔ n ye,

¹⁴ ado a ara sɛnbɛ sɔrɔn saraka-masɔla-wɛnu bolo ka Damasika mɔgɛnu bira minnu bi ile Alla matarala i tɔgɛ rɔ.”

¹⁵ Mari ya a fɔ a ye ko, “Ta! Nde le ara a yabɔ ko a ni wɔlɛ kɛ n ye. A si a ma, sibolo-gbɛrɛnu anubɛ anuna mansɛnu ni n tɔgɛ lamɔɛn, hali Isirɛla mɔgɛnu,

¹⁶ ado a ye nala tɔrɔyɛ min bɛɛ sɔrɔnna ndela ko la, nde nyɛrɛ si na wo yira a la.”

¹⁷ Woletɔ Ananayasi tara bɔn wo la. A ke nyɔ, a ya a bole sa Sɔli kuma. A ko, “N na-kelen-nyɔgɛ Sɔli, i ya Mari Yisa min yen kilɛ la, wo le ara n sɔ i wara. A ara n sɔ alako i yɛ la ni ka tun. Wo kɔma, i si fa Allata Ni-Sɛnimɛ la.”

¹⁸ Tiriyante wo rɔ, fan min manɛ iko yɛgɛ-wɔrɛ bɔra Sɔli yɛ ma. A ya fen yen tun. A ya a lasɔ. Wo kɔma, a batasira.

¹⁹ A ya fen-dɔn-kɛ tumɛ min, a ya sɛnbɛ sɔrɔn tun. Sɔli tora Yisata mɔgɛnu fɛ Damasika soe burɔ wati-ni kɔrɔ.

Sɔlila Kawandili Bɔ-Koe Damasika

²⁰ Wo kɔma, a wulita ka ta Yahudiya-dina-bɔnnu na Yisala koe fɔ tinɛ anu ye. A ko Yisa le Allatalata dan la.

²¹ Min bɛɛ ya a kan lamɔɛn, wonu kawara ka nyinikalɛ kɛ ko, “Yerusalɛm kɛ minnu bi Alla matarala Yisa tɔgɛ rɔ, kei kɛ ma wonu faga nun? Ale le ma wonu faga? Ado nfan, a ye nala yan wo lela ko la alako a ni wonu bira ka ta anu na saraka-masɔla-wɛnu bara.”

²² Sɔlila kawandili-sɛnbɛ tora koloyala. A ya a ragbɛ bɛrɛkɛ ko Allata-Mɔgɔ-Yabɔnɛ le Yisa la. Yahudiya minnu siginɛ Damasika soe burɔ, wonu ma ke a nɔla kumɛ rɔ tun.

²³ Tele siyaman tenbinɛ, Yahudiyanu ya anu nadɛn ka ale Sɔli faga-koe rabɛn.

²⁴ Kɔnɔ wonu bi min kun na, mɔgɛ do ya wo fɔ ale Sɔli ye. Anu tora soe tarɛ-don-dɛnu mafɛlɛnna su-ni-tele alako anu si a faga nya min.

²⁵ Kɔnɔ su kelen kera, Sɔli gba-fɛ-bilalɛnu ya a sigi sende rɔ ka a layigi tarɛ kɔma.

Sɔli Ta-Koe Yerusalɛm

²⁶ Sɔli tara Yerusalɛm. A ya a raya ko a ni kofu Yisata mɔgɛnu ma nyɔ kɔnɔ wonu ma la a la ni Yisata mɔgɔ-bɛrɛ le ale la. Anu dama kilannɛ a la.

²⁷ Nba, Banabasi nara a dɛnbɛn tinɛ ka ta a la Marita kilayɛnu bara. Sɔli ya Mari yen kilɛ la nya min anubɛ Mari ya min fɔ a ye, a ya wo bɛɛ rakaran anu ye. Sɔli ya kawandili bɔ yisi-latɛgɛ rɔ nya min Yisa tɔgɛ rɔ Damasika, a ya wo fanan takaran anu ye.

²⁸ Woletɔ Sɔli tora anu fɛ. A tara Yerusalɛm fan bɛɛ ka kawandili bɔ yisi-latɛgɛ rɔ Mari tɔgɛ rɔ.

²⁹ A kumara Yahudiya Kiriki kan-fɔlɛnu ye fanan ka anu sɔsɔ, woletɔ wonu ya a faga-koe rabɛn.

³⁰ Kɔnɔ a na-kelen-nyɔgɔ dɛnkɛninya-mɔgɛnu ya wo lamɔɛn tumɛ min, anu tara Sɔli la Sɛsariya soe burɔ. Wo kɔma, anu ya a lata Tarasa soe burɔ.

³¹ Nba, Allata mɔgɛ min bɛɛ ye Yudiya anubɛ Kalili sigisɔnnu tɔ anubɛ Samariya nyamanɛ rɔ, wo bɛɛ ya yisi-kimɛ sɔrɔn wo wati le tɔ. Anu tora Mari batola min kɛ, Allata Ni-Sɛnimɛ ya anu dɛnbɛ alako anu ni siyaya nya min ka sabati.

Pita Ta-Koe Lida anubɛ Yapa Soenu Tɔ

³² Pita ya kan tinɛ bɛɛ ratagama. Lunyɛ do, a tara Marita mɔgɛnu kɔndɔn tinɛ Lida soe burɔ.

³³ A ya kei do taran nyɔ, a tɔgɛ Eniyasi min fɛrɛ-faganɛ a ma. San segin kɔrɔ, a ma ke a lasɔla.

³⁴ Pita ya a fɔ a ye ko, “Eniyasi, Yisa, Allata-Mɔgɔ-Yabɔnɛ ara i lakɛndɛya. I lasɔ. I ni ila nyandan lamini.” Eniyasi ya a lasɔ tiriya!

³⁵ Lida anubɛ Sarɔn kɛnu ya ale Eniyasi kɛndɛ yen tumɛ min, anu dɛnkɛninyara Mari ma ka ma ata mɔgɛnu na.

³⁶ Musi do fanan bi Yapa soe burɔ nun, wo tɔgɛ Tabita. Dɛnkɛninya-mɔgɛ le. (Kiriki-kan rɔ, a tɔgɛ le Dɔrɔkasi. Wo kɔrɛ le “Mina.”) A ya ala wati bɛɛ kɛ ko-nyimɛ kɛ-koe la bolo-kolɔnnu dɛnbɛn tinɛ.

³⁷ A gbandɛyara wo wati le tɔ. A sayara. Anu ya a ku ka a furi layɛlɛ san-bɔn do rɔ.

³⁸ Yapa soe anubɛ Lida soe tɛmɛ ma fɛ-yan. Yisata mɔgɛ minnu bi Yapa, wonu ya a lamɔɛn tumɛ min ko Pita ye Lida soe burɔ, anu ya anu sara kemini mɔgɔ fila la. Anu ya wonu nata a ma ko, “I yandi, i ni na ma wara tiriya!”

³⁹ Woletɔ Pita wulita ka sɛgi anu fɛ. A kera tumɛ min, anu tara a la furi sanɛ kan min san-bɔn wo la. Kɛɛ-musi bɛɛ ya anu nadɛn Pita dafɛ. Anu bi Dɔrɔkasi dila kosɛbɛ! Ale Dɔrɔkasi ya duruku-kɔrɔ-donyɛ anubɛ duruku-wɛ minnu nadan a kɛndɛ tumɛ min, anu ya wo siyaman yira Pita la.

⁴⁰ Pita ya anu dama labɔ bɔn la. Anuna bɔɛ kɔma, a ya a nyɛnkin ka Alla matara. Wo kɔma, a ya a yɛ lamunun furi la. A ko, “Tabita, i lasɔ.” Tabita ya a yɛ laka. A ya Pita yen tumɛ min, a ya a sigi.

⁴¹ Pita ya a bole bira ka a dɛnbɛ a lasɔla. Wo kɔma, a ya dɛnkɛninya-mɔgɛnu anubɛ kɛɛ-musinu kele ka a yira anu na, a kɛndɛ.

⁴² Koe kɛ mankan nyɛnsɛnta Yapa soe burɔ kan tinɛ bɛɛ. Mɔgɔ siyaman dɛnkɛninyara Mari ma wola ko la.

⁴³ Pita ya tele siyaman bɔ kei do warɛ Yapa min tɔgɛ Saimon. Wo si karankɛ-wɔlɛ kɛ.