Kɛwɔlɛnu 8 - ALLALA KUMƐ

^1-2 Sɔli sɔnta Sitifen faga-koe ma. Marita mɔgɛ donu ya Sitifen togon ka di ala ko la bɛrɛkɛ! Tɔrɔya-ba wulita Allata mɔgɛnu kan ma Yerusalɛm soe burɔ wulɔn tele. Dɛnkɛninya-mɔgɛ bɛɛ nyɛnsɛnta Yudiya anubɛ Samariya nyamanɛ bɛɛ rɔ fɔ Marita kilayɛnu.

Allata Mɔgɛnu Tɔrɔ-Koe Sɔli Bolo

³ Sɔli ya a raya ka Allata mɔgɛnu tatinya. A donta bɔn bɛɛ la ka dɛnkɛninya-mɔgɛnu sagan ka anu nabɔ, a keima wo, a musuma wo. A ya wonu sa yele la.

Kibara-Nyimɛ Lake-Koe Samariya Nyamanɛ Rɔ

⁴ Marita mɔgɛ minnu nyɛnsɛnta, wonu tara kan tinɛ bɛɛ kawandili-bɔɛ la.

⁵ Filipi tara Samariya-so-karantan burɔ ka Yisa, Allata-Mɔgɔ-Yabɔnɛla koe kawandili bɔ nyɔ-mɔgɛnu ye.

⁶ Filipi ya min fɔ, nyama bɛɛ ya anu tole masɔ wo la a kin na ka ala kabana-koenu tayen.

⁷ Nyina-yogomɛnu bɔra gbele-gbelenna mɔgɔ siyaman fɛ. Mɔgɔ fɛrɛ-faganɛ anubɛ namarɛ siyaman fanan kɛndɛyara.

⁸ Woletɔ sewa-belebele kera Samariya so-burɔ-mɔgɛnu ye.

⁹ Mɔgɛ do ye soe wo burɔ nun, a tɔgɛ Saimon. Wo ara Samariya kɛnu nakawa duriya-kɛ-tinɛ, ado a ara a nyɛrɛ ma mɔgɔ-ba la.

¹⁰ Mɔgɔ-su min bɛɛ ye soe wo burɔ, a nɔnfulu-tigi wo, a bolo-kolɔn wo, wo bɛɛ ya a tole masɔ a la bɛrɛkɛ! Anu tora a fɔla ko, “Bɛsɛ min sɛnbɛ kolo bɛsɛ bɛɛtɛ ko, wo nara kei kɛla muninyɛ rɔ.”

¹¹ Anu ya anu tole masɔ a la wati bɛɛ bawo a ara mɛ duriyɛ kɛla anu tɛma ka anu nakawa wo nya.

¹² Kɔnɔ Filipi ya Allala mansayɛ anubɛ Allata-Mɔgɔ-Yabɔnɛ wo kibara-nyimɛ lake tumɛ min, anu dama dɛnkɛninyara ka batasi, a keima wo, a musuma wo.

¹³ Hali Saimon nyɛrɛ fanan dɛnkɛninyara ka batasi. A tora Filipi dafɛ bawo kabana-ko-wɛnu anubɛ tamasere minnu kɛra, a ya wonu yen tumɛ min, ale fanan kawara kati!

¹⁴ Kilayɛ minnu bi Yerusalɛm, wonu ya Samariya kɛnuna dɛnkɛninya-koe wo lamɔɛn. Woletɔ anu ya Pita anubɛ Yɔni lata anu ma.

¹⁵ Wonu ke nyɔ, anu ya Alla matara dɛnkɛninya-mɔgɛnu ye alako anu fanan ni Allata Ni-Sɛnimɛ sɔrɔn.

¹⁶ Anu ya wo ma bawo Allata Ni-Sɛnimɛ ma yigi wɛ Samariya kɛ fenfen kuma nun. Anu bara batasi le nun Mari Yisa tɔgɛ rɔ dɔrɔn!

¹⁷ Wo kɔma, Pita anubɛ Yɔni ya anu bole sa wonu kuma. Anu fanan ya Allata Ni-Sɛnimɛ sɔrɔn.

¹⁸ Saimon ya a yen ko Marita kilayɛnu ba anu bole sa min kuma, wo si Allata Ni-Sɛnimɛ sɔrɔn. Wo ya a ma, a ya wodi do yira Pita anubɛ Yɔni la.

¹⁹ A ko, “Wo ni sɛnbɛ kɛ di nde fanan ma, woletɔ n ba n bole sa mɔgɔ-wo-mɔgɔ kuma, wo si Allata Ni-Sɛnimɛ sɔrɔn.”

²⁰ Kɔnɔ Pita ya a fɔ a ye ka a gbɛ ko, “I mirinɛ ko i si Allala kɔ-fan san wodi la min kɛ, wobɛ ila wodi ni halaki nyahanama rɔ!

²¹ Ita mumɛ sa mala wɔlɛ rɔ bawo i yisi ma telen Alla yala.

²² I ni miriya-yogomɛ kɛ boloka ka Mari madiya. A ni i makoto miriya sifa kɛla ko la.

²³ N bara a yen ko i fanɛ keliyɛ la kati! I hɔrɔyani ma hakɛ bolo.”

²⁴ Saimon ya a fɔ Pita anubɛ Yɔni ye wo rɔ ko, “Wo yandi, wo ni Mari madiya n ye ko i wara min bɛɛ fɔ kɛ la, wo fenfen kana na ma n na.”

²⁵ Pita anubɛ Yɔni ban sereyɛ bɔla tumɛ min ka Marila kumɛ lake, anu sɛgira Yerusalɛm. Anu sɛgimatoe, anu ya kibara-nyimɛ-kawandili bɔ Samariya so siyaman tɔ kilɛ la.

Filipi anubɛ Itiyopiya Kun-Tigila Koe

²⁶ Mari kumara Filipi ye melikala muninyɛ rɔ ko, “I ni i rabɛn ka ta dugula. Kilɛ min bi bɔla Yerusalɛm ka ta Kesa soe burɔ, i ni kilɛ wo bira.” (Ado nfan, mɔgɛnu sa bɔla kilɛ wo fɛ kaka.)

²⁷ Woletɔ Filipi ya a rabɛn. A ya kilɛ wo bira. Nba, Itiyopiya-kun-tigi do ye bɔla kilɛ wo fɛ ka ta a warɛ. Kun-tigi-ba le wo la nun. Ale le ye Itiyopiya musu-mansɛ Kandasila nɔnfuli bɛɛ kun na. A tara Alla bato tinɛ Yerusalɛm.

²⁸ A sɛgimatoe, a sigini ala kirindi rɔ, ado a tagamatoe, a ye Nɛbi Aiseyata buku karanna.

²⁹ Allata Ni-Sɛnimɛ ya a fɔ Filipi ye ko, “Ta i madon ala kirindi la.”

³⁰ Filipi ya a buri ka ta. A ya a lamɔɛn, a ye Nɛbi Aiseyata buku karanna. Woletɔ a ya a manyinika ko, “I ye min karanna wo la, i wara hɛnkili sɔrɔn wo ma, wa?”

³¹ Kun tigi wo ya a yabi ko, “Ni mɔgɔ ma a fɛsɛfɛsɛ n ye, n si a nya-yen kama?” Wo kɔma, a ya Filipi kele ko a ni yɛlɛ ka sigi a fɛ ala kirindi rɔ.

³² A ye min karanna nun Allata kitabu rɔ, wo le kɛ la. A sɛbɛnɛ ko, “A madenɛ iko anu bi nala saga-dan min mala sarakɛ la. A radenɛ don iko anu bi nala sagɛ min siyi matɛgɛla. Hali da fa kelan, a ma tɛgɛ.

³³ Anu ya a lafɛya. Anu ma sɔn ala kiti tɛgɛla a kila-telennɛ la. Mɔgɔ-wo-mɔgɔ ti ke a bɔnsɔnla koe fɔla bawo a niyi ara ban duninya rɔ.”

³⁴ Kun-tigi wo ya a fɔ Filipi ye ko, “Nɛbi kɛ ye kɛ fɔla yonna ko la? Wo fɔ n ye. A ye a nyɛrɛ le ma, ka, mɔgɔ-gbɛrɛ?”

³⁵ Woletɔ Filipi ya a dabira Allata kitabu dinkirɛ kɛ nyɛrɛ ma gben, ka Yisala kibara-nyimɛ fɔ a ye.

³⁶ Anu bi tala kilɛ la tumɛ min, anu kera yi do ma. Woletɔ kun-tigi wo ko, “Yi kɛ mafɛlɛn. Nfen bi a tola gbɛ, n sa batasila?” [

³⁷ Filipi ya a fɔ a ye ko, “Ni i wara dɛnkɛninya i yisi bɛɛ la, i si batasi.” A ya a yabi ko, “N bara dɛnkɛninya. N bara la a la ko Allala dan le Yisa la.”]

³⁸ Kun-tigi ya a fɔ ko anu ni ala kirindi sɔ. Filipi anubɛ kun-tigi wo yigira yi rɔ. Filipi ya a batasi.

³⁹ Anu bɔra yi rɔ tumɛ min, Marita Niyi ya Filipi bɔ a fɛ. Kun-tigi wo ma a yen tun. Kɔnɔ a sewanɛ tara a warɛ.

⁴⁰ Filipi tɛrɛnara a nyɛrɛ la Asadadi soe burɔ. A tara kibara-nyimɛ kawandili bɔ soe bɛɛ rɔ ha a kera Sɛsariya soe burɔ.