Kɛwɔlɛnu 28 - ALLALA KUMƐ

Pɔli Ke-Koe Malita Yi-Tɛma-Dugi Rɔ

¹ Ma kɛndɛ kera gbele ma tumɛ min, ma nara a lɔn ko yi-tɛma-dugi wo tɔgɛ le Malita.

² Bandɛ nara ka ma bɛɛ kimɛ, woletɔ nyɔ-dugurannu ya ma rabira a kin na ka tɛ ladɛn ma ye.

³ Pɔli ya sɔgɛ do ladɛn. A ye wo sala tɛ la tumɛ min, ta-wuyan ya fɔnfɔnɛ fafa. A bɔɛ, a ya Pɔli bole kin.

⁴ Nyɔ-dugurannu ya fɔnfɔnɛ dunnɛ yen Pɔli bole la. Anu ya a fɔ anu nyɔgɔn ye ko, “Mɔgɔ-fagalɛ le kei kɛ la feu! Nba, hali a ara kisi kɔgɔ-yi ma kɔnɔ bɛsɛ min bi ko-latelennɛ kun na, wo ti sɔn a ni beli.”

⁵ Kɔnɔ Pɔli ya a bole lalɛsi, fɔnfɔnɛ buira tɛ rɔ. A ma a madumɛ hali!

⁶ Anu ya anu miri ko a fɛrɛ si yiri nun. Ni wo ma, a si na bui ka faga. Kɔnɔ anu mɛra a makɔnɔna, anu ya a yen, ko-wo-ko ma ma Pɔli la. Anu ya anu miriya yɛlɛma worɔ. Anu ko, “Alla-su do le kei kɛ la!”

⁷ Nyɔ-mansɛ min tɔgɛ Pubiliyasi, a halala-dugi do ye a bolo nyɔ wara la. Ma ya tele sawa kɛ a warɛ nyɔ. A ya ma rabira a kin na!

⁸ Mansa Pubiliyasi fa kirɛ sanɛ fɛrɛma-kaliyɛ anubɛ yele-kono-dumɛ bolo. Pɔli donta ala konko la ka a bole sa a kuma. A ya Alla matara a ye. A kɛndɛyara.

⁹ Wo mara tumɛ min, kirayatoe min bɛɛ ye yi-tɛma-dugi wo rɔ, anuna mɔgɛnu nara anu na anu dandan tinɛ.

¹⁰ Anu ya ma gbiliya ka fen siyaman di ma ma. Ma ye bɔla nyɔ tumɛ min, ma makoe ye fan min bɛɛ la mala tagamala ko la, anu ya wonu nadon kulɔn rɔ.

Bɔ-Koe Malita ka Ke Romu Soe Burɔ

¹¹ Karɛ sawa kɔma, ma donta kulɔn do rɔ min tɔgɛ, “Bɛsɛ-Fɛrannu.” Kulɔn wo bɔnɛ Alɛsandariya soe Iyipiti nyamanɛ rɔ kɔnɔ a ara samɛ kɛ Malita yi-tɛma-dugi wo rɔ nun.

¹² Ma kera Sirakusi soe ma ka tele sawa kɛ nyɔ.

¹³ Ma bɔra nyɔ ka ta ke Rigiyam soe ma. Wo banda kɛ, dugula-fɔnyɔ bɔra. Ma ya tele fila kɛ kilɛ la, ma kera Putiyoli soe ma.

¹⁴ Ma ya Marita mɔgɛ donu taran nyɔ. Wonu ya ma madiya ko ma ni lɔgɔkun kelen kɛ anu fɛ. Wo kɔma, ma bɔra nyɔ ka ta Romu.

¹⁵ Marita mɔgɛ do minnu bi Romu soe burɔ, wonu ya ma wara-koe lamɔɛn tumɛ min, anu nara fɔ feri-kɛ-tinɛ min tɔgɛ Apiyai anubɛ Sundan-Yiya-Bon-Sawɛ ye kan min ka ma labɛn. Pɔli ya wonu yen tumɛ min, wo ya a sɛnbɛ don. A ya baraka bira Alla ye.

Pɔli ye Romu Soe Burɔ Wati Min

¹⁶ Ma kera Romu tumɛ min, anu sɔnta ko Pɔli ni to a nyɛrɛ ma bɔn do la. Kɛlɛ-dan do sɔnɛ a dafɛ.

¹⁷ Tele sawa kɔma, Pɔli ya Yahudiya mɔgɔ-banu kele ladɛn rɔ. Anu nadɛnta tumɛ min, a ya a fɔ anu ye ko, “N na-kelen-nyɔgɛnu! N ma ko-wo-ko kɛ mala mɔgɛnu kan ma. Ma ya namu minnu sɔrɔn ma benbanu bolo, n ma wo fenfen tinya. Hali wo, anu ya n sa yele la Yerusalɛm ka n don Romu kɛnu bolo.

¹⁸ Wonu ya n fɛsɛfɛsɛ. Anu bi a fɛ nun ka n boloka bawo anu ya a yen ko n ma ko-wo-ko kɛ n si faga minna ko la.

¹⁹ Kɔnɔ Yahudiyanuna kun-tigi wonu sa kan kelen tɔ min kɛ, n ya a fɔ ko n ni Romu nyamanɛ kun-tigi-ba yen. Maburu-kuma sa n bolo nna mɔgɛnu kan ma,

²⁰ wo le ya a to, n ya madiyali kɛ ko n ni wo yen ka kuma wo la. Male Isirɛla mɔgɛnu yigi sanɛ min kuma, yɔlɔkɛ kɛnu bi n ma wo lela ko la.”

²¹ Anu ya a fɔ Pɔli ye ko, “Ma ma kɛdi-wo-kɛdi sɔrɔn ka bɔ Yudiya ila ko la. Ma na-kelen-nyɔgɔ fenfen ma bɔ nyɔ ka koe do fɔ hali ka i tɔgɔ rasɛ.

²² Kɔnɔ a di ma ye ka i burɛ lɔn bawo ma ya a lɔn ko i ye dina kɛ min tɔ, mɔgɛnu bi kumala wo ma dinkirɛ bɛɛ rɔ.”

²³ Woletɔ anu ya wati do latɛgɛ Pɔli ye. Pɔli yiyanɛ kan min, anu siyaman nara nyɔ wo tele rɔ. Ka a dabira sɔgɔ ma ha wurɛ la, a ya Allala mansayɛ faranfasi anu ye ka anu kawandi wola ko la. Pɔli ya Musata tɔn karan anubɛ Alla ya min fɔ nɛbinu ye alako mɔgɛnu si dɛnkɛninya Yisa ma nya min.

²⁴ Anu donu lara ala kumɛ la kɔnɔ donu ma la a la.

²⁵ Woletɔ anu wulita bɔla kelen-kelenyɛ ma bawo anu sa kan kelen tɔ. Pɔli ya a fɔ ko, “Allata Ni-Sɛnimɛ ya tonyɛ fɔ ma benbanu ye Nɛbi Aiseya baraka rɔ.

²⁶ A ko, ‘Ta kilayɛ kɛ fɔ mɔgɛnu ye. Hali wo ya wo tole masɔ nya-wo-nya, wo ti a nya-yen. Hali wo tora a mafɛlɛnna nya-wo-nya, wo ti a lɔn min bi mala.

²⁷ Fan do sanɛ mɔgɛnu miriya-ya ma alako anu kana ko nya-yen. Anu tole gberenɛ alako anu kana na ko lamɔɛn. Fen sanɛ anu yɛ ma alako anu kana na ko ragbɛ. Ni anu ya fen yen ka ko lamɔɛn nun, tumado fɔ anu ba anu ya-lamunun n na anu nakɛndɛya-koe la.’ ”

²⁸ Pɔli ko tun, “Wo ni a lɔn serr, ko Allala kisi-ko-kumɛ ara ta ke sibolo-gbɛrɛnu ma, ado wonu denu si anu tole masɔ!” [

²⁹ Pɔli banta kɛ fɔla tumɛ min, Yahudiyanu bɔra. Anu bi anu nyɔgɔn sɔsɔla bɛrɛkɛ!]

³⁰ Pɔli ya san fila kɛ nyɔ. A ye bɔn sarala. Min bɛɛ nara ke a ma, a ya wonu tabira.

³¹ A ya Allala-mansayɛ-kawandili bɔ ka mɔgɛnu karan Mari Yisa, Allata-Mɔgɔ-Yabɔnɛla koe la. A kumara yisi-latɛgɛ bɛɛ rɔ. Mɔgɔ-wo-mɔgɔ ma a lakala.