Kɛwɔlɛnu 26 - ALLALA KUMƐ

Pɔli Nyɛrɛ Fɛka-Koe Mansa Agaripa Yala

¹ Mansa Agaripa ya a fɔ Pɔli ye ko, “Nba, itɛ lakaran!” Pɔli ya a bole layɛlɛ. A ya a nyɛrɛ fɛka ka le, a ko,

² “Mansa Agaripa! N na-kelen-nyɔgɔ Yahudiyanu bi n maburila minna ko la, a ara a diya don n tɔ ko n bara fɛrɛ sɔrɔn bi ka n nyɛrɛ fɛka i yala wo bɛɛla ko la

³ bawo ile ya Yahudiya-namu anubɛ mala sɔsɔli-kurinu lɔn feu! Woletɔ n bi i madiyala ko i ni i munyu n kɔrɔ ka i wɔlɔ matɔlɔ.

⁴ “Yahudiya bɛɛ ya n sɔn lɔn kebi n dennɛ. Anu ya a lɔn n bara ma nya min n nyɛrɛta nyamanɛ rɔ anubɛ Yerusalɛm soe burɔ.

⁵ Ni anu si sɔn ka wo sereyɛ bɔ, anu ya a lɔn serr, ko kebi fɔlɔ n tora Farisiyɛ rɔ iko mala dina-gbɛlɛmɛ ye nya min.

⁶ Nba, Alla ya lanyiri min kiri ma benbanu ye, anu bi n kitila wola ko la gbɛ!

⁷ Su-ni-tele, ma bɔnsɔn tan-ni-filɛ bɛɛ ye Alla batola ka anu yigi sa lanyiri kelan wo kuma. Mansɛ, Yahudiyanu bi n maburila wo yigi lela ko la!

⁸ Ka a fɔ ko Alla ye furinu nawulila, nfenna a gbɛlɛ wo ya la ka la wo la?

⁹ “Nde nyɛrɛ ya n miri ko fɔ n ni wuli Yisa Nasarɛti kɛ kan ma ka a tɔgɛ tinya-koe bɛɛ rɔ.

¹⁰ Ka a dabira Yerusalɛm, n ya wo ma. N ya sarati sɔrɔn saraka-masɔla-wɛnu bolo ko n ni Allala mɔgɔ siyaman nadon yele la. Anu faga-koe fɔra tumɛ min, nde nyɛrɛ sɔnta wo ma.

¹¹ N ya anu tɔrɔ mata dina-bɔnnu na kinyama siyaman. N ya n taya ko anu ni anuna dɛnkɛninyɛ boloka. N yisi bɔra anu kan ma ha n tara sibolo-gbɛrɛnuta soenu tɔ anu tɔrɔ tinɛ.

Pɔli Yɛlɛma-Nya Fɔ-Koe

¹² “Nba, Mansɛ, saraka-masɔla-wɛnu sɔnta nun ko n ni ta Damasika soe burɔ anu bira-koe la.

¹³ N bi Damasika kilɛ la tumɛ min tele-latelen-wati, n ya wan-belebele yen min waan tenbira teletɛ la. Waan wo bɔra san ma ka yigi mabɛ n ta-nyɔgɛnu dafɛ.

¹⁴ Ma dama buira dugi ma. N ya kuman-kan do lamɔɛn. A ye a fɔla n ye Hiburu-kan rɔ ko, ‘Sɔli, Sɔli, i ye n tɔrɔla nfenna? I ye i nyɛrɛ le madumala dɔrɔn iko turɛ min bi a kiri-kɔlɔma tɛnna.’

¹⁵ N ya nyinikalɛ kɛ ko, ‘N fa, yon bi ile la?’ Mari ya n yabi ko, ‘Yisa le nde la i ye min tɔrɔla.

¹⁶ Nba, i lasɔ. N bara bɔ gbɛ rɔ i ye ka i ma nna wɔli-kɛlɛ la. I wara min yen n bolo bi, anubɛ n bi nala min yirala i la, i ye wo le fɔla mɔgɛnu ye.’

¹⁷ A ko, ‘N bi i latala Isirɛla mɔgɛ anubɛ sibolo-gbɛrɛ minnu ma, n si i kisi wonu masibɛ ma.

¹⁸ I ni anu yɛ laka alako anu ni bɔ pinpi rɔ ka anu nana waan rɔ. I ni anu bɔ Setanɛta sɛnbɛ kɔrɔ ka anu nana Alla ma alako anuna hakɛ ma si koto anuna dɛnkɛninyɛ fɛ nya min. Anu si anuna sɔ tinɛ sɔrɔn Allala mɔgɔ-yabɔnɛnu tɛma.’

Pɔlita Wɔli Fɔ-Koe

¹⁹ “Woletɔ Mansa Agaripa, ko-rayirɛ min bɔra san-kole rɔ, n ma wo masɔsɔ.

²⁰ Ka a dabira Damasika ha ka ke Yerusalɛm anubɛ Yudiya nyamanɛ bɛɛ ha sibolo-gbɛrɛnu tɛma, n ya kawandili bɔ wo bɛɛ rɔ. N ya a fɔ anu ye ko anu ni fara hakɛ kɛla ko anu ni na Alla wara. N ko anu ni kɛwɔlɛ wonu kɛ min si a yira ko anu bara yɛlɛma.

²¹ Wo le ya a to, Yahudiyanu ya n bira Alla-Bato-Bɔn la ka anu taya n faga-koe ma.

²² Kɔnɔ ha bi, Alla ye n dɛnbɛna. Woletɔ n sɔnɛ yan ka sereyɛ bɔ mɔgɛ bɛɛ ye, a nɔnfulu-tigi wo, a bolo-kolon wo, a filɛ bɛɛ. Nɛbi Musa anubɛ nɛbi doinu ya wɔlɔyiya-kumɛ minnu fɔ, n bi wonu denu fɔla anu ye.

²³ Anu ko a fɛrɛ sa, fɔ ale Allata-Mɔgɔ-Yabɔnɛ ni tɔrɔ. Wo kɔma, a ni ma a mɔgɔ fɔlɔtɛ la min si wuli ka bɔ furinu tɛma. Anu ko a ni na waan la Yahudiyanu anubɛ sibolo-gbɛrɛnu ye.”

²⁴ Pɔli ye a nyɛrɛ fɛkala tumɛ min, Sigisɔn-Mansa Fɛsitasi kumara a ma kan-mayɛlɛnɛ la ko, “Pɔli, i wara yuwaya. Ila karan-wɛ kɛ ye i layuwayala.”

²⁵ Kɔnɔ Pɔli ya a fɔ a ye ko, “N tigi Fɛsitasi, n yuwayani ma. N bi kuma-kɛndɛ anubɛ tonya-kumɛnu denu fɔla,

²⁶ ado ale Mansa Agaripa ya koe kɛnu lɔn serr! Woletɔ n si ke kumala i ye yisi-latɛgɛ rɔ. N lanɛ a la ko i wara koe kɛnu lɔn bɛrɛkɛ, bawo koe kɛnu ma kɛ dogɔn tɔ.”

²⁷ Pɔli ya a fɔ Mansa Agaripa ye ko, “Mansɛ, i lanɛ nɛbinuna kumɛnu na, nyɛ? N ya a lɔn ko i lanɛ wonu na!”

²⁸ Mansa Agaripa ya Pɔli fanan manyinika ko, “I ye i mirila ko i si ke a mala, n ni dɛnkɛninya Yisa ma wati-kundu-nɛ kɛ kɔrɔ, wa?”

²⁹ Pɔli ya a yabi ko, “Ni a mara wati-kundu-nɛ la wo, ni a mɛra wo, n bi Alla matarala ko wobɛ min bɛɛ wɔlɔ matɔlɔnɛ n na bi, wo ni ma iko nde ye nya min kɔnɔ anu kana yɔlɔkɛ kɛ wo ma!”

³⁰ Wo kɔma, Mansa Agaripa wo, Sigisɔn-Mansa Fɛsitasi wo, Bɛnasi wo, anubɛ mɔgɛ toe bɛɛ ya anu nasɔ.

³¹ Yanni anu ni bɔ nyɔ tumɛ min, anu ya a fɔ anu nyɔgɔn ye ko, “Kei kɛ ma ko-wo-ko kɛ a si faga minna ko la. A ma ko tinya a si sa yele la min na.”

³² Mansa Agaripa ya a fɔ Sigisɔn-Mansa Fɛsitasi ye ko, “Ni kei kɛ ma Romu nyamanɛ kun-tigi-ba wo yen-koe fɔ nun, a si boloka le nun.”